कविराज विजय यशवंत सातपुते
कवितेचा उत्सव
☆ पाडवा ☆ कविराज विजय यशवंत सातपुते ☆
कार्तिकाची प्रतिपदा
येई घेऊन गोडवा.
दीपावली दिनू खास
होई साजरा पाडवा. . . . !
तेल, उटणे लावूनी
पत्नी हस्ते शाही स्नान.
साडेतीन मुहूर्ताचा
आहे पाडव्याला मान. . . . !
रोजनिशी, ताळमेळ
वही पूजनाचा थाट
येवो बरकत घरा
यश कीर्ती येवो लाट. . . . !
सहजीवनाची गाथा
पाडव्याच्या औक्षणात
सुख दुःख वेचलेली
अंतरीच्या अंगणात.. . . . !
भोजनाचा खास बेत
जपू रूढी परंपरा.
व्यापारात शुभारंभ
नवोन्मेष स्नेहभरा.. . . . !
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 9371319798.
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
