सौ.ज्योत्स्ना तानवडे
कवितेचा उत्सव
☆ स्वागताचा दीप ☆ सौ.ज्योत्स्ना तानवडे ☆
सालभर राबूनिया
करू आशा रुजवण
पाच सणांचे मिलन
दिवाळीचा मोठा सण ||
अविचार जळमटे
झाडू मना स्वच्छ करू
घरा समवेत मन
साफ सुशोभित करू ||
नाती कशी दुरावली
याचा उहापोह करू
सारे आपुलेच सगे
स्नेहबंध घट्ट करू ||
विसरुनी चुका करू
एकमेकांचे स्वागत
दिवाळीच्या पर्वामध्ये
पुन्हा प्रेम पल्लवित ||
रांगोळी फराळ भेटी
दिवाळीचे आकर्षण
आठवणीने जपत
देऊ आनंदाचे क्षण ||
© सौ.ज्योत्स्ना तानवडे
वारजे, पुणे.५८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
