मराठी साहित्य – कवितेचा उत्सव ☆ लक्ष्मी पूजन ☆ कविराज विजय यशवंत सातपुते

कविराज विजय यशवंत सातपुते

 कवितेचा उत्सव 

☆ लक्ष्मी पूजन ☆ कविराज विजय यशवंत सातपुते ☆

अमावस्या  अश्विनाची

दिवाळीचा मुख्य सण

अंधाराला सारूनीया

प्रकाशात न्हाते मन. . . . !

धनलक्ष्मी सहवास

घरी नित्य लाभण्याला

करू लक्षुमी पूजन

हवे सौख्य  जीवनाला… !

धन आणि अलंकार

राहो अक्षय टिकून

सुवर्णाच्या पाऊलाने

यावे सौख्य तेजाळून.. . . !

प्राप्त लक्षुमीचे धन

हवा तिचा सहवास

तिच्या साथीनेच व्हावा

सारा जीवन प्रवास. . . . !

सुकामेवा ,  अनारसे

फलादिक शाही मेवा

साफल्याची तेजारती

जपू समाधानी ठेवा.

© कविराज विजय यशवंत सातपुते