Category: कवितेचा उत्सव 2

प्रा. सौ. सुमती पवार

 कवितेचा उत्सव 

☆ .. भारूड… ☆ प्रा. सौ. सुमती पवार ☆

☆

मी अनरसे तळते बाई..

मी चकल्या पाडते बाई…

लई जाळीदार अनरसे त्यावर खसखस पेरली

अन् माझ्या नंदेने ती खसखस नेमकी हेरली..

अगंऽऽऽ नको खाऊ म्हंनलं, पन ऐकती कुठं

खसखसनं घेरली तिला न मंग मळमळ सुटं…मी….

*

चकलीची भाजणी लई खमंग लई चटकदार

काटेरी मसालेदार चकली लई लई काटेदार

ववा नि तीळ घातला पोट दुखू नये म्हनून

पनं ऐकती कुठं खाल्या की खनून खनून….

मंग व्हायचं तेच झालं की.. पळतीया परसदारी…

वळखा तुमीच काय म्हनून…?. मी

*

लाडूचा घेतलाय धसका तिनं आता नग नग म्हनती

पन दिसतांच गळतीया लाळ नि चार चार हानती

पोटातं बसलेत गच्च नि तळमळतोय आता जीव

अन् तिच्याकडं पाहून मलाच भरलंय् आता हिवं

काय करू बाई मी कसं ग करू..

ह्या नंदेचं त्वांड मी कसं ग धरू..

*

मी सांगते, सुमती पवार,

अन्न लोकांचं असलं तरी, पोट लोकाचं नाही…

बाई.. बाई. पोट सांभाळून खाल्लं पाहिजे की नाही…? नाही, विचार करून खाल्लं नाही तर… ? असे पोटाचे हाल, होतात बाई…

मी अनरसे तळते बाई… मी चकल्या पाडते बाई…

☆

© प्रा.सौ.सुमती पवार 

 नाशिक

(९७६३६०५६४२)

svpawar6249@gmail.com

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अनिल वामोरकर

 कवितेचा उत्सव 

☆ दूर तरी दूर तरी… जवळ ☆ श्री अनिल वामोरकर ☆

☆

दूर तू तेथे

मी मात्र येथे

तरी मी आत्मानंदात

डुंबतो येथे…

 

जाग येताच

मनोमनी घालीतो दंडवत,

चरणस्पर्ष करून

दिनक्रमाची करितो सुरवात…

 

कर्म ते आवश्यक

करीतो कृष्णार्पण

फलापेक्षा नच मज

सद्गुरू करी पाठराखण…

 

क्षण न ऐसा एक

विस्मरण ते सदगुरुंचे

देहभान विसरून

गातो स्तवन तयांचे..

 

अष्टौप्रहर मी

मानस सानिध्यात

सांगा बरं मी

दूर दूर कसा?

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

श्री प्रमोद वामन वर्तक  

  चित्रकाव्य  

बगळे, कावळे आणि कडबोळे ! ☆ श्री प्रमोद वामन वर्तक ☆

☆

असते राजकारण गल्लीतले फारच वेगळे 

तेच असते प्रत्येक हायकमांडचे कल्पनातीत निराळे – –

*

सारे नेते वावरती नेहमी चेहऱ्याचे करून ठोकळे

करून सवरून सदा राहती नामा निराळे – –

*

करू शकत नाही कार्यकर्ते नेत्यांसमोर मन त्यांचे मोकळे

मनांत शिरण्या नेत्यांच्या पहावे लागतात अनेक पावसाळे – –

*

कधी झेलावी लागती कार्यकर्त्यांना अपमानाची ढेकळे

अशा ठिकाणी टिकत नाहीत कोणी कार्यकर्ते दुबळे – –

*

उभे इथे पदोपदी एका पायावर ध्यानस्थ बगळे

कळत नाही कोण नेता कोणता खेळ खेळे – –

*

बोलण्यात असून चालत नाही मोकळे ढाकळे

नाहीतर वेळ नाही लागणार स्वप्नांचे होण्या खुळखुळे – – 

*

पिंड खायला जागो-जागी टपले काळे गोरे कावळे

वाटे राजकारण्यांना निघाले जनतेच्या अकलेचे दिवाळे

शेवटी सत्तेवर येणार “यांचे” नाहीतर “त्यांचे” कडबोळे…

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ आभाळाचे काळिज ज्यांचे… ☆ श्री हरिश्चंद्र कोठावदे ☆

☆

आभाळाचे काळिज ज्यांचे, दुःखहि त्यांचे आभाळागत

हास्य जयांचे बुद्धागत ते, कधि ओघळती सुळि चढल्यागत

*

असिधारेवर अवघे जीवन, पदोपदी अन् अग्निपरीक्षा

देवदूत ते देवपणाची, अखंड देती सत्त्वपरीक्षा

*

प्रेषित होउन आले येथे, हाच तयांचा मुळी गुन्हा हो

सजा भोगण्या वनवासाची, राम जन्मतो पुनः पुन्हा हो

*

थोर महात्मे युगानूयुगे, प्राशत आले प्याले जहरी

तप्तलाल अन् तीक्ष्ण कट्यारी, द्रष्ट्यांच्याही घुसल्या नेत्री

*

युगपुरुषांच्या विटंबनेची, जन्मोजन्मी हीच कहाणी

साक्षीला ती कठोर नियती, खेद खंत ना डोळां पाणी!

☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. अर्चना गादीकर निकारंगे

 कवितेचा उत्सव 

☆ पांगारा… ☆ सौ. अर्चना गादीकर निकारंगे ☆

☆

अंगावरून तुझ्या अलगद ओघळलेली ती,

पाण्यातून पावसाच्या मार्गस्थ होत होती.

अंगार्‍यासम भासणारी जरा पाण्यात सुखावली,

जलस्पर्शाने आनंदित ती, नयनसुखानेआंनदित मी

 जणू एकच वाटत होतो.

 

गळलेल्या फुलांकडे पाहून जणू काही

पागोळ्यांतूनन तुझे रुदन चालले होते

भारदस्त विशाल देह धारण कर्ता तू

पण मन मात्र खूपच हळवे वाटत होते.

 

एक दिवस असा उजाडला की नकळत तुझ्या

तुझी आंतरिक शक्तीक्षीण होऊ लागली होती,

भारदस्त, विशाल म्हटल्या जाणार्‍या तुझ्या मुळांनी

जमीन सोडली

आणि तू जीवंतपण.

तुझ्या विना त्या जागेला जाणवत राहील रितेपण.

☆

© सुश्री अर्चना गादीकर निकारंगे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ ऐवज… ☆ श्रीशैल चौगुले ☆

☆

थंडिचा हिवाळा

काळीज धडके

हेमंत जिव्हाळा.

*

हरिते पाखरे

कधीची सकाळ

आळस भिनून

दुपार धुकाळ.

*

मनात मिठीची

अनोखीच ओढ

ओहोळही वाहे

आठवणी गोड.

*

क्षितीज सांजेत

कडाकी बिलग

हुडहुड अंग

शेकोटी सजग.

*

मनाला उमज

भावना समज

भोवती आगीच्या

ऋतूचा ऐवज.

☆

© श्रीशैल चौगुले

श्री राजकुमार दत्तात्रय कवठेकर

 कवितेचा उत्सव 

☆ पुन्हा एकदा… ☆ श्री राजकुमार कवठेकर ☆

☆

तुझी आठवण मनी उतरली पुन्हा एकदा

ग्रीष्म कधी श्रावण-सर झरली पुन्हा एकदा

*

बोलायाचे बरेच काही गेले राहुन

शब्दांची पाखरे बिथरली पुन्हा एकदा

*

शुक्राची होऊन चांदणी उगवलीस तू

पहाट रात्रीला फटफटली पुन्हा एकदा

*

ठेवताच तू तळहातावर फूल जुईचे

ओंजळ ही स्वप्नांनी भरली पुन्हा एकदा

*

तुझे वागणे नाटक आहे पक्के कळले

पण फसलो जेंव्हा तू हसली पुन्हा एकदा

*

पुन्हा तुझ्या येण्याने फुललो विसरुन सारे

घडी मनाची मी अंथरली पुन्हा एकदा

*

परतलीस नि:शंक मनाने लाटेसम तू

खूण प्रितीची अपुल्या पटली पुन्हा एकदा

*

तुझे मेघ आषाढी, वा-यासवे पांगले

हिरवटती आशा कोळपली पुन्हा एकदा

*

शांत सागरी जीवन-नौका होती माझी

भेटलीस तू अन् वादळली पुन्हा एकदा

*

नांव तुझे नकळतसे येता ओठांवरती

जखम वाळलेली ठसठसली पुन्हा एकदा

*

आठवणीतुन भेटलीस तू अवचित जेंव्हा

मजला ‘माझी’ भेटहि घडली पुन्हा एकदा

*

तुझी आठवण, अर्ध्यामुर्ध्या भातुकलीची

हसताना आसवे निसटली पुन्हा एकदा

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– ज्ञानराजा – ☆ श्री आशिष  बिवलकर ☆

☆

इंद्रायणी काठी ! विसावला ज्ञाना !

आत्मसमाधाना ! समाधिस्थ !!१!!

*

कृपाळू माऊली ! बुद्धीचा सागर !

मायेचे माहेर ! ज्ञानराजा !!२!!

*

कैसा चमत्कार ! रेड्या मुखी वेद!

गर्विष्ठांचा भेद ! वदवूनी !!३!!

*

बसुनी भावंडे ! चालवली भिंत !

चांगदेवा खंत ! पाहुनिया !!४!!

*

पाठीवरी मांडे ! मुक्ताई भाजती !

क्षुधा भागवती ! जठाराग्नी !!५!!

*

भावार्थ दीपिका ! या गीतेचा अर्थ !

ज्ञानी नाम सार्थ ! ज्ञानेश्वरी !!६!!

*

अमृताचा घडा ! एक एक ओवी !

स्व अनुभवावी ! वाचूनिया !!७!!

☆

(चित्र – साभार श्री आशिष  बिवलकर)

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ यज्ञ… ☆ प्रा तुकाराम दादा पाटील ☆

☆

अवचित आठवली

गाथा हृदयी भिडली

द्वाड झाल्या आठवणी

रात ढळाया लागली

*

अंगावरचा धडपा

त्याचा पदर फाटका

झाकू पहातो संसार

माझा फाटका नेटका

*

कुणा मदतीचा हात

नाही मागायचा आता

शब्द सुखाचे गाठोडे

हीच सारी मालमत्ता

*

गेली मरून मनशा

तिचे दु:ख नाही मला

चार दिसाचे जगणे

त्याचा किती बोलबाला

*

नको आवर्तन पुन्हा

जन्म मरणाच्या दारी

आहे पदरी बांधली

आर्धी सुखाची भाकरी

*

नको निवारा आणखी

नको वैभव कसले

लेखणीला आले बळ

त्याने जगाला जिंकले

*

नाही पुजला दगड

तेच आहे समाधान

दिलदार मैत्र माझे

माझ्या जगण्याचे धन

*

राना वनात भेटते

मला माझेच संचीत

जळे चंदनाची चूड

भोवतीच्या वादळात

*

खोड चंदनी जळता

दरवळ मुलुखात

यज्ञ झाला जगण्यचा

हेच घडले आक्रीत

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈