श्री तुकाराम दादा पाटील
कवितेचा उत्सव
☆ आम्ही वारकरी… ☆ प्रा तुकाराम दादा पाटील ☆
आम्ही वारकरी /आमुची पंढरी
नांदतो संसारी / दृढ भावे
अखंड चिंतन / शब्दब्रह्मी लीन
देतसे प्रमाण / वैराग्याचे
घ्यावा समाचार / करावा संसार
प्रेमे चराचर / आदरावे
उदर भरण / नव्हे देव ध्यान
दांभिकाचे मन / ओळखावे
मानावा अभाव / खोटा भेदभाव
करावा स्वभाव / मृदुतेचा
आत्ममग्न मन / वैभवाची खाण
विश्वाचे कल्याण / घ्यावे चित्ती
जीवनाचा सार / सात्विक विचार
दैवी साक्षात्कार / मानावा तो
सुखाची ही वारी /पंढरीच्या दारी
संतांची चाकरी /स्वर्ग सुख
तुकोबा महान / करी विवेचन
तोडतो बंधन / देहाचे या
तुकाम्हणे मज / भेटला विठ्ठल
संसाराचा झोल / सोडवाया
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈