श्रीशैल चौगुले
कवितेचा उत्सव
☆ वारकरी नाचे… ☆ श्रीशैल चौगुले ☆
(उत्कृष्ठच !वाखरीचे रिंगण असो देहु-आळंदीहून पालखींचे प्रस्थान हा सोहळाही नयनरम्य भक्तीचा असतो)
आकाशाला गवसणी घालणारा
पांडुरंगाशी अभंगी बोलणारा
आषाढाचा थेंबसरी झेलणारा
संसाराचे सुख-दुःख पेलणारा.
आत्मज्ञान साक्षात्कार तो दैणारा
दिंडी-दिंडीत पाप-पुण्य घेणारा
काय महती पंढरीस नेणारा
भेदाविन भक्तासंगे संत होणारा.
हाच तो कृष्ण सावळा घन सांडतो
पंढरीच्या वाळवंटी खेळ मांडतो
मुक्ता जनाईसवे दैवही कांडतो
पुंडलीक सावतासंगे जो भांडतो.
असा हा विठ्ठल तिन्ही लोका सांभाळे
वारकरी नाचे टाळ गर्जे आभाळे.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈