Category: कवितेचा उत्सव 2

सुश्री शोभना आगाशे

 कवितेचा उत्सव 

☆ परब्रम्ह… ☆ सुश्री शोभना आगाशे ☆

न मी कधी जन्मतो

न कधी मृत्यू पावतो

मी असे चिरतरुण

मीच तो अपार करुण

मी नसे नाशवंत

अपूर्व मी अन् अनंत

आनंद मी, भयहीन मी

अढळ मी, अचल मी

नसे मजआधी कुणी

नसे मजसम ही कुणी

मी असे अप्रकट

तरीही भासे प्रकट

मी असे सर्वज्ञाता

मीच असे अन् त्राता

मज नसे सुरवात

आणि नसे मज अंत

साधार मी नच राही

आधार मीच परि देई

स्वामी मी सदोदित

स्वयंस्फूर्त अन् सतत

श्रेष्ठ मी, कनिष्ठ मी

विशाल मी, अणु मात्र मी

मी सर्वाभूती वसे

मी सर्वातीत असे

मी असे नवा सदैव 

मी जुना अन् नित्यैव

मी असे एक शून्य

संपूर्ण मी परि अनन्य

मी न करवितसे कांही

मी अलिप्त सर्वा देही

मी एकाकी, नसे लिप्त

हर्ष शोका परे, अलिप्त

व्यापित मी चराचरा

मज व्यापे भक्ती परा

आदिपुरुष, पुरुषोत्तम

पुरुष मी विराट, उत्तम

बोलत मी नच कांही

ऐकत मी नच कांही

अबोल बोल भक्तांचे

ऐकत मी परि साचे

विविध भक्त मज पुजती

विविध रूपे रेखाटती

मजला परी रूप नसे, 

भक्तांच्या हृदयी वसे

पूर्वज मज नच कोणी

वंशज मज नच कोणी

नाही मज एक गोत्र

समदर्शी मी स्वतंत्र

निर्गुण, निराकार, सतत

परब्रम्ह मी शाश्वत

या सर्वा जाणित जो

अद्वैता मानित जो

तो बोधी कोण असे

मजला ते ज्ञात असे

(ज्ञानेश्वरीतील अध्याय १८, ओवी ११९३ ते १२०० वर आधारित)

© सुश्री शोभना आगाशे

सांगली 

दूरभाष क्र. ९८५०२२८६५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– शह – काटशह…–  ☆ श्री आशिष  बिवलकर ☆

☆

राजकारणाचे  झाड,

सत्तेची झुलणारी फांदी !

भिरभिरणारी पाखरे,

बसून होती आनंदी !

 

आज या फांदीवर,

उद्या दुसऱ्या फांदीवर !

शह कटशह देत,

सत्तेचे चाले स्वयंवर !

 

कोणी न येथे नसे,

मित्र वा शत्रू कायम !

अचूक वेळ येई पर्यंत,

पाळतात सारे संयम !

 

कोण कोणाला नसे,

इथे स्पृश्य अस्पृश्य !

पापणी मिटताच,

पलटते पडद्यावर दृश्य !

 

विचारधारेचे घालतात लोणच,

डावपेचांनी घाले फोडणी !

त्यांच्या ताटाची करी चिंता,

कार्यकर्ते ठरतात अडाणी !

 

कार्यकर्ता भिडतो,

हातात मिरवीत झेंडे !

चामडीच नेत्यांची कडक,

शरमतात पाहुन गेंडे !

 

करेक्ट कार्यक्रम चाले,

कोण किती असो मोठा !

समीकरण जुळवत सारे,

शोधतात सत्तेच्या वाटा !

 

तुमच्या आमच्या पिंडावर,

पोसलेले सारेच  कावळे !

टोच मारण्यास तत्पर,

पंचवार्षिक श्राद्धाचे सोहळे !

 

पाच  वर्षात मतदार,

होतो एक दिवसाचा राजा !

पोकळ आश्वासनांचा,

नेते वाजवती रोज बँडबाजा !

 

खाण्याचे दात अन् दाखवण्याचे,

दात असतात वेगळे !

एका पेक्षा एक नग निघती सारे,

एकाच माळेचे मणी सगळे!

 

लोकशाहीचे  कुरण,

चरण्यात सारे वळू होती दंग !

भूक संपता संपत नाही,

सतेचे  उधळीत सारे  रंग !

 

वेश्या जाणे कोणा समीप,

कोणाला लोटावे ते दुर !

मरे आत्मा,भूत सारी,

सत्तेसाठी बडवती उर !

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.ज्योत्स्ना तानवडे

 कवितेचा उत्सव 

☆ चंदेरी क्षण… ☆ सौ.ज्योत्स्ना तानवडे ☆

आठवांच्या चांदराती मनास मोहत येती

धुंद मधुर क्षणांची गाणी ओठांवर येती || ध्रु ||

 

सूर लाभले श्वासांना स्पंदनांची गाणी झाली

चांदण्याची अविरत रम्य बरसात झाली

रसिक चंद्र हासला लोभस उर्मी येती

धुंद मधुर क्षणांची गाणी ओठांवर येती || १ ||

 

त्या क्षणांचेच चांदणे मनात भरुनी राही

अजूनही लाजणे ते गाली विलसत राही

अंतरात पुन्हा अशी आनंद स्पंदने येती

धुंद मधुर क्षणांची गाणी ओठांवर येती || २ ||

 

तूच चांद हृदयीचा तूच रम्य कोजागिरी

तुझ्या सवे विहरता होई पोर्णिमा साजिरी

ज्योत्स्नेची हो बरसात चैतन्य लहरी येती

धुंद मधुर क्षणांची गाणी ओठांवर येती || ३ ||

 

आठवांच्या चांदराती मनास मोहत येती

धुंद मधुर क्षणांची गाणी ओठांवर येती ||

☆

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ विठुमाऊली… ☆ सुश्री अरूणा मुल्हेरकर ☆

नाचत नाचत वारी आली

विठ्ठलाच्या द्वारी

कोसळती सरीवर सरी

भक्त रंगला नाम गजरी

 

पांडुरंग सखा भेटला

भक्तीरसात चिंब भिजला

देहभान नाही उरले

ओलेत्याने नाचू लागला

 

हाक ऐकली भक्ताची

कृपा जाहली भगवंताची

नभ मेघांनी भरून आले

अवघे जीवन तृप्त झाले

 

दिन आजचा एकादशी

जलद वाजविती टाळ

सौदामिनीचा पदन्यास

भक्तीत नाचते आभाळ

 

विठुमाऊली भक्तांची

असे भुकेली भावाची

तिचीच आम्ही असू लेकरे

उदरभरणही तीच करे

 

तिच्या कृपेने पाऊस आला

धरणी माता प्रसवली

तिने ठेविला हस्त शिरावर

बीजातून रोपे अंकूरली

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष मुळे

(टीप: रान ही जुनाट प्रथा, परंपरा, भाकड कथा, अंधश्रद्धा यांचं जे रान माजलं आहे त्याला उद्देशून वापरलेली उपमा आहे)

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

कवितेचा उत्सव

☆ माऊली… ☆ सुश्री प्रणिता प्रशांत खंडकर ☆

 पंढरीच्या राऊळात

 रखुमाई संगे नाही

 म्हणे पांडुरंगा मला

 आज सवडच नाही.

 

            देवा तुम्ही उभे रहा

            विटेवरी, दर्शनासी

            साद नका घालू मला

            पळभरी वेळ नाही.

 

 आज सण आषाढीचा

 पाहुण्यांची मांदियाळी

 दिंडी-पालखी, पंढरी!

 गावागावातून आली

 

           फोड फुटले पायाला

           मुखी अभंग या तरी

           चंद्रभागेच्या स्पर्शाचा

           ध्यास आहे मनोमनी!

 

     गुज-गोष्टी करा तुम्ही

     गळा-मिठी, कोणी घाली

     पायावरी ठेवून डोई

     लागे ब्रह्मानंदी टाळी!

   

         तहान-भूक हरपली

         दर्शनाने या भक्तांची

         तृप्ती होईल हो कशी

         गृहिणीच्या या मनाची?

 

   लेकी आल्या माहेरासी

   करू त्यांची सरबराई

   संगे कुटुंब – कबिला

   रांधू-वाढू, गोड काही!

 

          एकादशीचा उपास

          टाळ-चिपळ्या – कीर्तन

          लेकरांच्या मुखी घास

          तेव्हा सुखावेल मन !

©  सुश्री प्रणिता प्रशांत खंडकर

संपर्क – सध्या वास्तव्य… डोंबिवली, जि. ठाणे.

ईमेल [email protected] केवळ वाॅटसप संपर्क.. 98334 79845.

ही कथा आवडल्यास लेखिकेच्या नावासह आणि कोणताही बदल न करता अग्रेषित करण्यास हरकत नाही.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈