सौ. उज्वला सुहास सहस्रबुद्धे
☆ या वळणावर… ☆ सौ. उज्वला सुहास सहस्रबुद्धे ☆
☆
उभी आहे मी एका वळणावर..
वाट पुढची अनोळखी!
कशी शोधू मी माझी मला,
झाले मी तुम्हास पारखी!..१
*
झाली नव्हती मनाची तयारी!
रहावे लागेल तुमच्या विना!
समजूत घालून जगते आहे,
साथ दे रे माझ्या मना!…२
*
सप्तपदी चाललो आपण,
साथ होती जन्मांतरीची!
सात जन्माची गाठ बांधली,
वचने दिली तू निष्ठेची !..३
*
सोडून गेलात अचानक,
विसर पडला माझा तुम्हांस !
जग रहाटीस सामोरे जाण्या,
मन करते मी घट्ट आज !..४
*
कठीण आहे वाट पुढची,
समजावते मी मनाला!
तुम्ही पाठीशी आहात माझ्या,
देत आधार थकल्या मनाला!…५
☆
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈