श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 195
☆ ‘झकास’ आहे… ☆ श्री अशोक श्रीपाद भांबुरे ☆
☆
असा कसा रे तुझा जीवना प्रवास आहे
रस्त्यामधला खड्डा सुद्धा उदास आहे
☆
डोळ्यामधला अश्रु झाकतो आहे मुखडा
ओठावरचा शब्द बोलला ‘झकास’ आहे
☆
अडचण झाली सामान्यांना कोरोनाने
पण नेत्यांचा कुठे थांबला विकास आहे
☆
जडले होते प्रेम गुलाबी नोटांवरती
बंदी येता अडचण येथे ठगास आहे
☆
तेलासाठी वाळूचे कण रगडत बसलो
जिद्द सोडली नाही करतो प्रयास आहे
☆
सुंदर दिसतो पानांवरती डोलत असतो
क्षणभंगुर का जीवन मिळते दवास आहे ?
☆
विकास होता आनंदाने नाचत होतो
अता कशाला म्हणू जिंदगी भकास आहे
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
