Tag: #मराठी-कविता

सुश्री संगीता कुलकर्णी

 कवितेचा उत्सव 

☆ रोमांच ☆ सुश्री संगीता कुलकर्णी ☆ 

वार्‍यावर उडणाऱ्या केसांना

सावरू नकोस

लाजेने चूर झालेल्या चेहर्‍याला

लपवू नकोस

तुझ्या धडधड  उडणाऱ्या काळजाला

तू बैचेन करू नकोस

आले ढग आकाशी दाटून

शोधू नकोस आडोसा

तुला लपण्यासाठी

स्वतःला भिजवून घे थेंबा-थेंबाने

पावसाचा रोमांच

ये ओलांडून उंबरठा मर्यादेचा

नाही येणार परतून

ते दिवस

अनुभवल्याशिवाय त्यांना

तू राहू नकोस..!!

©  सुश्री संगीता कुलकर्णी 

लेखिका /कवयित्री

ठाणे

9870451020

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री सुहास रघुनाथ पंडित

 कवितेचा उत्सव 

☆ आमुची लिपी – कवी : सोपानदेव चौधरी ☆ प्रस्तुती : श्री सुहास रघुनाथ पंडित ☆

लिपी आमुची नागरी । स्पष्ट उच्चारांचे वर्ण ।

महाराष्ट्रीयां  लाभली । वाणी तैसी ही संपूर्ण ।।

नसे उच्चारांची व्याधी । नसे लेखनात अढी । 

जात धोपट मार्गाने । स्वर-व्यंजनांची जोडी ।।

अहो, हिची जोडाक्षरे । तोड नाही त्यांना कुठे । 

उच्चारातली प्रचीती । जशी ओठांवरी उठे ।।

जैसे लिहू तैसे वाचू । जैसे बोलू तैशा खुणा ।

जे जे लेखी तेच मुखी । ऐसा मराठीचा बाणा ।। 

सर्व उच्चारांचे शोधा । शास्त्रज्ञांनो, यंत्र एक । 

तेच दिसेल तुम्हाला । महाराष्ट्रीयांचे मुख ।। 

नाद-ध्वनी उच्चारांना । देत सदा आवाहन । 

लिपी ऐसी ही प्रभावी । माझ्या भाषेचे वाचन ।। 

कवी : सोपानदेव चौधरी 

प्रस्तुती : श्री सुहास रघुनाथ पंडित

सांगली (महाराष्ट्र)

मो – 9421225491

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

प्रा. सौ. सुमती पवार

 कवितेचा उत्सव 

हृदय ओतले पहा जीव तुझ्या वरती जडे

अंगणात पडती पहा रोज पारिजात सडे ….

रंगले अबोली हात ,साथ तुझी लाभता

बोल सतारीचे बोल हृदयी नाथ आता

वाजंत्री घुमती मनी सप्तपदी चौघडे…..

                   अंगणात पडती पहा …..

अंतरंगी तू असा भरूनी माझ्या राहिला

अश्वारूढ मी तुला नयनातच ठेविला

मेंदिला चढला रंग ओठ हृदय धडधडे

                    अंगणात पडती पहा ….

जाईंचा तो येई गंध मोगऱ्यास बहर ये

सखया रे राजस तू बहरलेच चांदणे

प्राण पाखरूच बघ तुजसाठी फडफडे

                    अंगणात पडती पहा …

                       रोज पारिजात सडे ….

© प्रा.सौ.सुमती पवार ,नाशिक

(९७६३६०५६४२)

[email protected]

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

महंत कवी राज शास्त्री

  साप्ताहिक स्तम्भ – हे शब्द अंतरीचे # 50  

☆ क्षण तो आनंदाचा… ☆

क्षण तो आनंदाचा,

एक तरी असावा

क्षण तो आनंदाचा,

सर्वांनी जोपासवा…०१

क्षण तो आनंदाचा,

मंगल सूर खुलावे

क्षण तो आनंदाचा,

प्राजक्त मुक्त फुलावे…०२

क्षण तो आनंदाचा,

अंकुरित बीज व्हावे

क्षण तो आनंदाचा,

दश-दिशा नाद घुमावे…०३

क्षण तो आनंदाचा,

जीवन बदलून जावे

क्षण तो आनंदाचा,

आनंदाश्रू वहावे…०४

क्षण तो आनंदाचा,

अंत समय गोड व्हावा

कृष्ण सखा मनोहर

मजला नेण्यास यावा…०५

© कवी म.मुकुंदराज शास्त्री उपाख्य कवी राज शास्त्री.

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीशैल चौगुले

 कवितेचा उत्सव 

☆ मुक्तगंध ☆ श्रीशैल चौगुले ☆

फुलवीत जावे   मनात आनंद

विसरुन दुःखी   हृदयाचे स्पंद.

भावना आवेग  आवरीत जावे

आवेशी न व्हावे   जगणेचा छंद.

प्रारब्धाचे भोग   जन्मांतरी योग

नको भवरोग    इंद्रिये आक्रंद.

भक्तियाचा नाद  अंतरीत साद

परमात्म  बोध    कायेशी संबंध.

स्मरावेत  शब्द   संतश्लोक  ऋणा

त्या पाऊलखूणा  मृत्यू मुक्तगंध.

© श्रीशैल चौगुले

९६७३०१२०९०

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ.मंजुषा सुधीर आफळे

  कवितेचा उत्सव 

☆ जीवनयात्रा ☆ सौ. मंजुषा सुधीर आफळे ☆ 

रोज थोडा पथ नवा

जीवन एक तीर्थयात्रा

सुखदुःख “थांबे” असे

प्रवासात या सतरा

भान ठेवू, चालताना

अवघड – सोपी वाट

वळणावळणा वर

आशा निराशेचा काठ

भावनांचा कल्लोळ तो

भार आता साहवेना

काय खरे,काय खोटे

माया मोह तो, सुटेना

पाप पुण्याच्या राशी तू

ओलांडून जात रहा

जन्म मरणाची वेळ

तटस्थ, पाहात रहा

पैलतीर खुणावतो

दोन क्षणांचा विसावा

सत्कर्मी त्या सेवाधर्मी

हृदयीचा राम दिसावा.

© सौ.मंजुषा सुधीर आफळे

२९/३/२०२१

विश्रामबाग, सांगली.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

प्रा. अशोक दास

 ☆ कवितेचा उत्सव ☆ काय करतील गांधीजी ? ☆ प्रा. अशोक दास ☆ 

महात्मा गांधी म्हणायचे

सर्वांनी सत्याने वागायचे

इथे सारेजण सत्य सोडलेले

असत्याचे पाठीराखे झालेले

            काय करतील गांधीजी?

      गांधीजी अहिंसेचा संदेश देती

      इथे दगड प्रत्येकाच्या हाती

      एकमेकावर सारे तुटून पडती

      स्व अस्तित्व  टिकवण्यासाठी

             काय करतील गांधीजी ?

गांधीजी म्हणायचे त्याग करा

इथे भोगवाद हाच खरा

सारेच घ्यायला हावरट झालेले

घरे भरण्यासाठी आसुसलेले

       काय करतील गांधीजी ?

आता तरी बदलूया

 महात्म्याला आठवूया

देश नवा घडवूया

अभिमान वाटेल असे वागूया

नाहीतर काय करतील गांधीजी ?

          सत्य,अहिंसा, स्विकारुया

          भ्रष्टाचाराला त्यागूया

          इतरांसाठी थोडे झटूया

         आणि अभिमानाने म्हणूया

         आमचे राष्ट्रपिता म.गांधीजी

© प्रा. अशोक दास

..इचलकरंजी

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

स्व गजानन दिगंबर माडगूळकर ‘गदिमा’

जन्म – 1 ओक्टोबर 1919  मृत्यु – 14 डिसेंबर 1977 ☆

☆ कवितेचा उत्सव ☆ मेघदूत ☆ महाकवी ग.दि. माडगूळकर ☆  

मेघदूत

जा घेऊन संदेश !

मेघा,जा घेऊन संदेश!

उल्लंघुनिया सरिता,सागर,नानापरिचे देश

रणांगणावर असतील जेथे

रणमर्दांची विजयी प्रेते

गगनपथाने जाऊन तेथे

प्राणसख्याच्या कलेवराचा निरखून घे आवेश

हाडपेर ते थेट मराठी

हास्य अजूनही असेल ओठी

शवे शत्रूंची असतील निकटी

अंगावरती असेल अजूनी सेनापतीचा वेष

अर्धविलग त्या ओठांवरती

जलबिंदूंचे सिंचून मोती

राजहंस तो जागव अंती

आण उद्याच्या सेनापतीला जनकाचा आदेश

डोळ्यांमधली तप्त आसवे

थांबच देत्ये गड्या तुजसवे

पुढे न आता मला बोलवे

सांग गर्भिणी खुशाल आहे पोटीचा सेनेश

ज्योतीसाठी जगेल समई

भिजविल तिजला रूधिरस्नेही

वाढत जाईल ज्योत प्रत्यही

नकाच ठेऊ आस मागची,इतुके कुशल विशेष

जा घेऊन संदेश !

मेघा,जा घेऊन संदेश!

उल्लंघुनिया सरिता, सागर,नानापरिचे देश.

गीतकार- महाकवी ग.दि. माडगूळकर

चित्र : साभार Gajanan Digambar Madgulkar – Wikipedia