Tag: #मराठी-कविता

श्री सुहास रघुनाथ पंडित

 कवितेचा उत्सव 

☆ प्रतीक्षा… ☆ श्री सुहास रघुनाथ पंडित ☆

तू केव्हाही ये … 

मी वाट पहातच आहे …. .

फक्त एक लक्षात ठेव,

फार उशीर लावू नकोस … 

कारण….

पांगारा पुन्हा फुलू लागला आहे

वेलीवर कुंदाची फुलं डुलू लागली आहेत 

गुलमोहोर सर्वांगानी खुलू लागला आहे….

कसं फुलायचं असतं

कसं डुलायचं असतं

कसं खुलायचं असतं

हे सारं पहायचं असेल तर …. .

…. फार उशीर लावू नकोस…… 

☆

© सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री शोभना आगाशे

 इंद्रधनुष्य 

☆ चांगदेव पासष्ठी – भाग-10…  ☆भावानुवाद-  सुश्री शोभना आगाशे ☆

 पाण्याची खोली मोजण्यासि

मीठ तेथ जाई बुडी मारण्यासि

स्वतःच तेथे विरघळून ते जाता

कशी पाण्याची खोली, मोजे हाता

आत्मभाव तुझा मापु न शकतो

माझा आत्मभाव तयात विरतो

एकरूप होता पाणी व लवण

कोण कोणा करी उपदेश जाण॥४६॥

नसे जिथे मी स्वतः, तुज जातो पाहू

आत्मरूपी लीन तूही, तुज कैसे पाहू॥४७॥

जागा राहुनिया निद्रेसि कसा पाहू

स्वरूपी एकरूप तुला कसा पाहू॥४८॥

अंधार असता प्रकाश नसे, परि

स्वतः असण्याची जाणीव उरी

अंधार दूर करि जरी सूर्यप्रकाश

पाहू न शके तो कधी अंधारास

जंव पाही मी तुजकडे चांगदेवा

मज दिसे केवळ आत्मस्वरूप ठेवा

मम स्वरूपे, पहावे तव स्वरूप

मम देह, तव देहाचे न पाही रूप

इंद्रियस्थ केवळ पाहणे, दिसणे

आत्मतत्वी भेटता, विरून जाणे॥४९॥

तव आत्मस्वरूपा मी शोधू जाता

माझे मीपण, तुझे तूपण नष्ट होता

अशा भेटी, अद्वैत आत्मतत्वांचे

घेशील सुख आत्मसाक्षात्काराचे॥५०॥

© सुश्री शोभना आगाशे

सांगली 

दूरभाष क्र. ९८५०२२८६५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ नभ दाटलं दाटलं… ☆ सुश्री अरूणा मुल्हेरकर ☆

आलं आभाळ भरून

नभ दाटलं दाटलं

धरित्रीच्या कुशीमधी

बियं बियाणं पेरलं —

वावरात बळीराजा

आस धरून बैसला

कृपा झाली वरूणाची

मनापासून हासला —

पिकतील मोती दाणं

काळ्या आईच्या पोटात

रोप लागतील डुलू

पीक येईल जोमात —

आल्या पावसाच्या धारा

सुटे थंडगार वात

तप्त धरा विसावली

झाला क्षोभ आता शांत —

सुकलेली पाने फुले

टवटवी त्यांना आली

नद्या निर्झर वाहती

सृष्टी पावसात न्हाली —

कृपा करी बा वरूणा

बरस तू चार मास

नको मारू कधी दडी

भरवी मायेने घास —

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ कैफ… ☆ श्री रवींद्र सोनावणी ☆ 

कैफात रंगताना, पाऊल डगमगावे

तालात चालतांना, बेताल विश्व व्हावे

आरक्त नेत्र होता, स्नेहात विरघळावे

आकाश पुष्प ताजे, हलके खुडून घ्यावे

लाजून चांदण्यांनी, प्याल्यांत चिंब न्हावे

हरवून होष मी ही, प्याला पिवून जावे

प्राजक्त होवूनीया, चौफेर मी फुलावे

बेहोष त्या क्षणाला, जवळी कुणी नसावे

वाऱ्यातल्या स्वरांचे, धुंदीत वेध घ्यावे

हृदयातल्या सलांचे, संगीत गुणगुणावे

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ ॐ तत् सत्… ☆ श्रीशैल चौगुले ☆

(७२५व्या ज्ञानेश्वरीस ज्ञानचरणनत् ज्ञानेश ज्ञानसमृध्दी शुभेच्छार्पण !)

त्रिगुणे त्रैलोक्यज्ञानी

ब्रम्हांड बीज सुखांनी

ज्ञान देई ज्ञानेश्वरी

ओवी-श्लोकादि मुखांनी.—

पसायदान श्रेष्ठ

संत ज्ञानेश ज्येष्ठ

देव लोक प्रसन्न

कृपासेवेशी पृष्ठ.—

ताटी उघडी तव

कष्ट जीवाशी डंक

मुक्ता होई माऊली

ऐसा ज्ञानी निःशंक.—

अठरा अध्यायादि

मोक्षप्रबंध वर

जन्म-मृत्यू रहस्य

टिका गीता सादर.—

सकळ मानवासी

कर्म-भक्ती साक्षात

प्रत्यक्ष लिही ज्ञाना

महात्म्य युगे बोलती

आम्ही बालके गुन्हा.——

© श्रीशैल चौगुले

मेहबूब जमादार 

 कवितेचा उत्सव 

☆ डोली… ☆  मेहबूब जमादार ☆

सालोसाल चढती गड 

जरी  तुटतात पाय

तुडविती   त्याच वाटा

सवे  लेक आणि  माय —

वारा  शहराचा  तसा 

इथं फिरलाचं नाही

दार  शाळेचे कुणीही 

त्यांना उघडले  नाही —

कधी भेटतो प्रवासी

किती अर्जव करून

दोन वेळेच्या  पोटाला

मिळे  भाकरी  कष्टून —

 त्यांनी पाहिलेच  नाही 

 जग वेगळे बाहेर

 डोलीतच  जीव  सारा 

 नाही वेगळं माहेर —

अशा  कित्येक पिढ्यांनी

फक्त डोलीच वाहिल्या

डोली वाहता वाहता

जशा आल्या  तशा गेल्या —

डोली वहायाची रोज 

डोली दिसते स्वप्नात

डोलीत बसलंय कोण 

त्यांना नसतं माहित —

दिसेना का  शासनाला

त्यांच्या हृदयाचा पीळ ?

 सारं  दिसले  तरीही 

त्याचा  नुसताच  खेळ — 

© मेहबूब जमादार

मु. कासमवाडी,पोस्ट -पेठ, ता. वाळवा, जि. सांगली

मो .9970900243

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈