मराठी साहित्य – कवितेचा उत्सव ☆ संस्कार… ☆ सुश्री वृंदा (चित्रा) करमरकर ☆

By Hemant BawankarNo Comments

सुश्री वृंदा (चित्रा) करमरकर

? कवितेचा उत्सव ?

☆ संस्कार… ☆ सुश्री वृंदा (चित्रा) करमरकर ☆

उपेक्षिसी माणसा का

काळ्या तुझिया आईला ?

आजवरी वाढविले

अरे लेकरा तुजला —

 

एक बीज तू पेरता

धान्य देते ओंजळीने

संस्कार ते दातृत्वाचे

विसरला तू कशाने —

 

शिक्षणाने प्रगतीची

उघडली रे कवाडे

परी विकूनी मजला

जाशी दूर कुणीकडे? —

 

शेतीतच प्रगतीचा

ओघ अरे वाहू देत

नव्या जोमाने कर तू

बाळा कष्टाची शिकस्त — 

 

घाम गाळता शेतीत

 मोती घर्माचे बनती 

अरे बळीच्या रे पोरा

किती श्रमाची श्रीमंती ! —

  

संस्कारांना जपता तू

खरा माणूस होशील

जीवनाचा अर्थ सारा

खरा तुज गवसेल —

© वृंदा (चित्रा) करमरकर

सांगली

मो. 9405555728

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ सुजित साहित्य #164 ☆ संत कान्होपात्रा… ☆ श्री सुजित कदम ☆

By Hemant BawankarNo Comments

श्री सुजित कदम

? कवितेचा उत्सव ?

☆ सुजित साहित्य # 164 ☆ संत कान्होपात्रा…☆ श्री सुजित कदम ☆

कान्होपात्रा कवयित्री

शामा नर्तिकेची लेक

गाव मंगळवेढ्यात

जन्मा आली संत नेक…! १

 

अप्रतिम लावण्याने

कान्होपात्रा आकारली

पुर्व पुण्याई लाभती

विठू भक्ती साकारली…! २

 

नायकीण पेशाची त्या

मोडुनीया परंपरा

कान्होपात्रा जपतसे

विठू भक्ती भाव खरा…! ३

 

देह मंदिराचा सोस

त्यागुनीया झाली संत

संकीर्तन प्रवचन

चिंतनात भगवंत…! ४

 

कान्होपात्रा घेई भेट

ज्ञानेश्वर माऊलींची

संत संगतीचा लाभ

ठेव कृपा साऊलीची…! ५

 

केले अभंग गायन

हरीनामी सदा दंग

गावोगावी  पोचवीला

अंतरीचा भक्ती रंग…! ६

 

तेहतीस अभंगाचे

कान्होपात्रा निजरूप

संत सकल गाथेत

प्रकटले शब्द रुप….! ७

 

नित्य पंढरीची वारी

पदोपदी हरीभक्ती

घात केला सौंदर्याने 

नाही जीवन आसक्ती…! ८

 

बिदरचा बादशहा

करी तिची अभिलाषा

शील रक्षणाच्या साठी

बदलले मूळ वेषा..! ९

 

वेष बदलून  गेली

कान्होपात्रा महाद्वारी

भोग लालसा यवनी

पाठलाग अविचारी…! १०

 

पांडुरंगी झाली लीन

पंढरीत समर्पण

भक्तीभाव अभंगाने

केले जीवन अर्पण…! ११

© श्री सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ जन्मांतरीचे साथी… ☆ सुश्री वर्षा बालगोपाल ☆

By Hemant BawankarNo Comments

सुश्री वर्षा बालगोपाल 

?️?  चित्रकाव्य  ?️?

☆ ? जन्मांतरीचे साथी… ? ☆ सुश्री वर्षा बालगोपाल ☆

☆

किती भाग्य थोर लिहिले आपल्या माथी

तू आणि मी, आपण जन्मांतरीचे साथी॥

☆

किती हिवाळे उन्हाळे अन पावसाळे

पाहिले आपण आनंदाने सोबतीने

दिस कष्टाचे जरी  केल्या सुखाच्या राती

तू आणि मी, आपण जन्मांतरीचे साथी॥

☆

एक झालो आपण सुखाच्या या संसारी

हसत लावल्या दु:खा सुखाच्या झालरी

दोन वाती असूनही एक झाली ज्योती

तू आणि मी, आपण जन्मांतरीचे साथी॥

☆

मुले नातवांसवे सजे संसाररथ

प्रेमजिव्हाळ्याच्या  हिरवळीचा हा पथ

दूरदेशी सारे  पण, हात तुझा हाती

तू आणि मी, आपण जन्मांतरीचे साथी॥

☆

चल जाऊ मंदिरी प्रार्थूया ईश्वराला

मुलांना यश किर्ती जोगवा पदराला

विनात्रास जिणे त्यांचे ही आम्हा पावती

तू आणि मी, आपण जन्मांतरीचे साथी॥

☆

© सुश्री वर्षा बालगोपाल

9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ “एक इवलंसं रोपटं ..” – अज्ञात ☆ प्रस्तुती – सुश्री मंजुषा सुनीत मुळे ☆

By Hemant BawankarNo Comments

सुश्री मंजुषा सुनीत मुळे

?️?  चित्रकाव्य  ?️?

☆ “एक इवलंसं रोपटं ..” – अज्ञात ☆ प्रस्तुती – सुश्री मंजुषा सुनीत मुळे ☆

(जागतिक पर्यावरण दिनाच्या हार्दिक शुभेच्छा..!)

इवलंसं रोपटं मी

तू म्हणालास तर मरून जाईन –

 

ओंजळभर पाणी दे मला

आयुष्यभर तुझ्या कामा येईन –

 

दिलं जीवदान मला तर 

तुला जगायला प्राणवायू देईन –

 

जगवलंस मला तर 

तुझ्या देवांसाठी फुलं देईन –

 

फुलवलंस मला तर

तुझ्या मुलांसाठी फळं देईन –

 

तळपत्या उन्हामध्ये 

तुझ्या कुटुंबाला सावली देईन –

 

तुझ्या सानुल्यांना खेळावया

माझ्या खांद्यावर झोका देईन –

 

तुझ्या आवडत्या पाखरांना 

मायेचा मी खोपा देईन –

 

कधी पडला आजारी तर 

तुझ्या औषधाला कामा येईन –

 

झालो बेईमान जरी मी 

शेवटी तुझ्या सरणाला कामा येईन –

 

कवी : अज्ञात 

प्रस्तुती : सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – मराठी कविता ☆ कवितेच्या प्रदेशात # 185 ☆ अर्धस्वप्न… ☆ सुश्री प्रभा सोनवणे ☆

By Hemant BawankarNo Comments

सुश्री प्रभा सोनवणे

? कवितेच्या प्रदेशात # 185 ?

☆ अर्धस्वप्न… ☆ सुश्री प्रभा सोनवणे ☆

(मृगचांदणी मधून…)

☆

प्रतिबिंब आरशातले,

दिसते आजकाल,

प्रौढ….निस्तेज!

केसातली पांढरी बट

तारूण्य ढळल्याची साक्षी असते,

डोळ्या भोवतीचे काळे वर्तुळ

वय वाढल्याची नोंद घेते !

मन उदास पुटपुटते,

“गेले ते दिन गेले !”

पण तुझ्या डोळ्यात जेव्हा,

पहाते मी स्वतःला,

तेव्हा मात्र असते मी,

तुला पहिल्यांदा भेटले

तेव्हाची,

तरूण आणि टवटवीत!

या दोन्ही प्रतिबिंबातली

खरी कोण?

प्रसाधनाच्या आरशातली,

की तुझ्या डोळ्यातली ?

तुझ्या माझ्या नात्यातली,

सुकोमल तरुणाई,

बनवते तरुण मला,

तुझ्या डोळ्यातल्या प्रतिबिंबात!

माथ्यावर लिहून जातात

तुझे डोळे—-

“तू अर्धी स्त्री आणि अर्ध स्वप्न”

खरंच की रे —-

स्वप्न कधीच होत नाहीत म्हातारी,

त्यांना नसते मरण कधी,

स्वप्न असतात चिरंजीव,

म्हणूनच ती दोन्ही प्रतिबिंब,

होतात एकजीव!

सनातन….नित्यनूतन!

© प्रभा सोनवणे

(१ जानेवारी १९९९)

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ तूच तू… ☆ श्री शरद कुलकर्णी ☆

By Hemant BawankarNo Comments

श्री शरद कुलकर्णी

? कवितेचा उत्सव ?

☆ तूच तू… ☆ श्री शरद कुलकर्णी ☆

श्वासाहून प्रिय तू,

सत्य तू अन् भास तू.

 

जीवन-मरण तूच तू,

तूच श्वास,ध्यास तू.

 

घुसमट तू, तूच वारा,

तू नभीचा स्थिर तारा.

 

नीरवता तू, तू कविता,

तूच दर्या जो उसळता.

 

तूच वृक्ष ,तूच सळसळ ,

पालवी तू ,तू पानगळ .

 

तूच वास्तव ,स्वप्न तू,

दृष्टी तू, दृष्टिकोन तू.

 

विसर्जित झालो कधीचा ,

मात्र केवळ तूच तू.

 

माझे-तुझे अद्वैत घडता,

मग,काय मी अन् काय तू? …

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ श्रीधान्ये… ☆ सुश्री दीप्ती कुलकर्णी ☆

By Hemant BawankarNo Comments

सुश्री दीप्ती कुलकर्णी

 

? कवितेचा उत्सव ?

☆ श्रीधान्ये… ☆ सुश्री दीप्ती कुलकर्णी ☆

श्री धान्यांचे स्वागत करु या

चला तुम्ही या हो  |

 

     ‌रुक्ष भूमीला मान देऊया

     तृण धान्यासी पहा हो |

 

रागी,वरीची रास करु या

सारे संगे या हो  |

 

     ‌बाजरीलाही स्थान  देऊ या

     राळ्याचे गुण गा हो  |

 

पोषणास नि ऊर्जा द्याया

धान्य ही सिद्ध पहा हो  | 

 

        कणाकणांना इवल्याशा या

        आपण नमू चला हो |

 

मधुमेहाशी लढा देऊ या

रोडगा खाऊ चला हो |

 

    रक्तदाब ही स्थिर ठेवू या

    साथ तयांची घ्या हो |

 

श्रीधान्यांसह जीवनात या

मजा लुटू चला हो ||

© सुश्री दीप्ती कोदंड कुलकर्णी

हैदराबाद.

भ्र.९५५२४४८४६१

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #191 ☆ खडावा… ☆ श्री अशोक श्रीपाद भांबुरे ☆

By Hemant BawankarNo Comments

श्री अशोक श्रीपाद भांबुरे

? अशोक भांबुरे जी यांची कविता अभिव्यक्ती # 191 ?

☆ खडावा… ☆ श्री अशोक श्रीपाद भांबुरे ☆

☆

एकेक शब्द माझा भक्तीरसात न्हावा

हृदयात नांदतो रे कान्हा तुझाच पावा 

☆

वारीत चालताना म्हणतात पाउले ही

देहात विठ्ठलाचा संचार साठवावा

☆

रामास भरत म्हणतो सत्ता नकोय मजला

तू फक्त दे मला रे पायातल्या खडावा

☆

पंडीत ज्या शिळेला पाषाण म्हणुन पाही

पाथरवटास त्यातच ईश्वर उभा दिसावा

☆

काळ्याच चादरीवर आकाश पांघरोनी

झाडात भर दुपारी घेतोय कृष विसावा

☆

ब्रह्मास्त्र काल होते अणुबॉम्ब आज आहे

युद्धामधील जहरी संहार थांबवावा

☆

चातुर्य वापरावे उद्धारण्यास जीवन

भोंदूपणास कुठल्या थारा इथे नसावा

☆

© अशोक श्रीपाद भांबुरे

धनकवडी, पुणे ४११ ०४३.

[email protected]

मो. ८१८००४२५०६, ९८२२८८२०२८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – वाचताना वेचलेले ☆– रक्तामध्ये ओढ मातीची…– कवयित्री : श्रीमती इंदिरा संत ☆ संग्रहिका : सुश्री पद्मजा फेणाणी जोगळेकर ☆

By Hemant BawankarNo Comments

सुश्री पद्मजा फेणाणी जोगळेकर

 वाचताना वेचलेले 

☆ – रक्तामध्ये ओढ मातीची…– कवयित्री : श्रीमती इंदिरा संत ☆ संग्रहिका : सुश्री पद्मजा फेणाणी जोगळेकर ☆

(काल साजऱ्या झालेल्या जागतिक पर्यावरण दिनाच्या अनुषंगाने ..कवयित्री इंदिरा संत यांची एक सुंदर कविता. सुश्री पद्मजा फेणाणी जोगळेकर यांनी या कवितेला सुरेख स्वरसाज चढवून ती सादर केलेली आहे)

५ जून, जागतिक पर्यावरण दिन…… आपला सभोवताल नयनरम्य करणार्‍या पर्यावरणातून आपण अनेक गोष्टी शिकतो, मनमुराद आनंद घेतो, आणि त्यावर मनापासून प्रेमही करतो….या पर्यावरणाशिवाय आपलं अस्तित्त्व नाही.. 

याच पर्यावरणाबद्दल वाटणारी कृतज्ञता जेष्ठ कवयित्री इंदिरा संत यांनी त्यांच्या खालील कवितेतून व्यक्त केली आहे… त्या मातीचा एक भाग आपणही आहोत, याचं भान आपल्याला सतत असायला हवं आणि म्हणून पर्यावरणाचं संवर्धन आपण करायला हवं, हो ना !

☆

रक्तामध्ये ओढ मातीची, 

मनास मातीचें ताजेपण,

मातींतुन मी आलें वरती, 

मातीचे मम अधुरें जीवन…..  

☆

कोसळतांना वर्षा अविरत, 

स्नान समाधीमधे डुबावें; 

दंवात भिजल्या प्राजक्तापरी

ओल्या शरदामधि निथळावें; ….. 

☆

हेमंताचा ओढुन शेला 

हळूच ओलें अंग टिपावें;

वसंतातले फुलाफुलांचें, 

छापिल उंची पातळ ल्यावें;….. 

☆

ग्रीष्माची नाजूक टोपली,

उदवावा कचभार तिच्यावर;

जर्द विजेचा मत्त केवडा

तिरकस माळावा वेणीवर; ….. 

☆

आणिक तुझिया लाख स्मृतींचे

खेळवीत पदरांत काजवे, 

उभें राहुनी असें अधांतरिं

तुजला ध्यावें, तुजला ध्यावें….

☆

कवयित्री : श्रीमती इंदिरा संत

संग्रहिका : पद्मजा फेणाणी जोगळेकर

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ – कुष्ठरोग नाही भोग…– ☆ श्री आशिष बिवलकर ☆

By Hemant BawankarNo Comments

श्री आशिष  बिवलकर

?️?  चित्रकाव्य  ?️?

?– कुष्ठरोग नाही भोग…– ? ☆ श्री आशिष  बिवलकर ☆

☆

कुष्ठरोग्याचे जीवन,

समाजाकडून सारखी उपेक्षा !

झडलेल्या हातांनाही असते,

मेहंदीने रंगण्याची अपेक्षा !

☆

कोणी हिणवे तयास,

झालाय देवाचा कोप !

कोणी म्हणे गतजन्माच्या 

पापाचे आले आहे रोप !

☆

समाजात जगताना,

पदोपदी भोगतात यातना !

हद्दपारीचे जीवन नशिबी,

वाळीत टाकल्याची भावना !

☆

कोणी एक महात्मा येई ,

तयांच्या उद्धारासाठी !

बाबा आमटेंचे महात्म्य,

अधोरेखित या जगजेठी !

☆

आनंदवनात चालू आहे,

अविरत सेवेचे महान कार्य !

पाहून जुळती कर दोन्हीही,

माणसातल्या देवाचे औदार्य !

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares
image_print