मेहबूब जमादार
कवितेचा उत्सव
☆ डोली… ☆ मेहबूब जमादार ☆
सालोसाल चढती गड
जरी तुटतात पाय
तुडविती त्याच वाटा
सवे लेक आणि माय —
वारा शहराचा तसा
इथं फिरलाचं नाही
दार शाळेचे कुणीही
त्यांना उघडले नाही —
कधी भेटतो प्रवासी
किती अर्जव करून
दोन वेळेच्या पोटाला
मिळे भाकरी कष्टून —
त्यांनी पाहिलेच नाही
जग वेगळे बाहेर
डोलीतच जीव सारा
नाही वेगळं माहेर —
अशा कित्येक पिढ्यांनी
फक्त डोलीच वाहिल्या
डोली वाहता वाहता
जशा आल्या तशा गेल्या —
डोली वहायाची रोज
डोली दिसते स्वप्नात
डोलीत बसलंय कोण
त्यांना नसतं माहित —
दिसेना का शासनाला
त्यांच्या हृदयाचा पीळ ?
सारं दिसले तरीही
त्याचा नुसताच खेळ —
© मेहबूब जमादार
मु. कासमवाडी,पोस्ट -पेठ, ता. वाळवा, जि. सांगली
मो .9970900243
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈