Tag: #मराठी-कविता

 इंद्रधनुष्य 

☆ मराठी थाळी— ☆ प्रस्तुती – सौ.स्मिता पंडित ☆

अशी थाळी – Rice plate बहुतेक फक्त मराठीतच असावी — आवडीने जेवा. 

बोलाचा भात, 

बोलाची कढी, 

चापट पोळी, 

अक्षतांच्या वाटाण्याची उसळ 

पुराणातील भरले वांगे

मनातले मांडे

खुशीतल्या गाजराची कोशिंबीर

बिरबलकी खिचडी

ऊत आणलेली शिळी कढी

नावडतीचं अळणी मीठ

धम्मक लाडू

तिळपापड 

नाकाला झोंबणारी मिरची 

नाकाने सोललेले कांदे 

भ्रमाच्या भोपळ्याचं भरीत

भेंडी गवार मसाला

लपवलेल्या भांड्यातलं ताक 

ताकास लावलेली तूर

हातावर दिलेली तुरी

पाठीवरच्या धिरड्याने केलेला पचकावडा 

आंबट द्राक्षे न खाणारा कोल्हा आणि त्याला राजी असलेली काकडी

चिमणीच्या दाताने तोडलेल्या गोळ्या

वाजणारी गाजराची पुंगी

सर्वात शेवटी गोड/उर्दू पदार्थ म्हणून 

खयाली पुलाव

इज्जतचा फालुदा

आणि मुखशुद्धीला 

पैजेचा विडा !

असे जेवण झाल्यावर पाहुण्याला भरल्यापोटी नारळ देण्याची प्रथा आहेच !!

संग्राहिका :  स्मिता पंडित

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री गायत्री हेर्लेकर

 कवितेचा उत्सव 

☆ आधुनिक ओव्या– ☆ सुश्री गायत्री हेर्लेकर ☆

अरे  न्याहारी ,न्याहारी —

ठेवा पॅन गॅसवरी–

भाजी,लोणी ,चटणी–

पसरा ग—डोश्यावरी  ||१||

सुंदर माझा मिक्सर ग–

शोभतो– ओट्यावर,

पीठ रुबते भराभर–

वडा ईडली वरचे वर  ||२||

लाडका ग माझा फ्रीज,–

जसा राधेचा ग कान्हा,

ग्रेव्ही करुन एकदा,–

करते भाजी पुन्हा पुन्हा ||३||

ओव्हनची ग माझ्या–

कथा आहे न्यारी न्यारी,

त्याच्या कुशीत फुलते —

बिस्किट केकवरची चेरी ||४||

चैत्री सजली चैत्रगौरी–

श्रावणात मंगळागौरी,

आता करु पुरणपोळी —

 गणराया संगे आली गौरी ||५||

स्क्रीनपुढे सदा असतो–

लाडका ग बाळ माझा,

खायला न दुजे मागे–

देता मॅगी ,बर्गर, पिझा ||६||

लेक माझी ग लाडकी —

शिकाया दुरदेशी,

डोळा  का ग येते पाणी–

विडीयो कॉल रात्रंदिशी ||७||

माझ्या ग अंगणी—

ऊभी स्कुटर देखणी,

फिरते मी तिच्या संगे–

सखी माझी ग साजणी ||८||

हॉल सजला सजला–

टी,व्ही. मोठा भिंतीवर,

मालिकेतली भांडणे —

मौने पाहे घरदार ||९||

मन कंटाळे कंटाळे–

विसरले राम नाम,

हाती असता मोबाईल–

कसे करु कामधाम ?||१०||

मागे गेले नऊवार–

नको झाले सहावार,

नानाविध कुडत्यांसंगे–

पुरते एक सलवार ||११||

फ्लॅटमघला ग फ्लॅट–

हव्या बेडरुम तीन,

फुलवेन टेरेसवर —

जाईजुई ग मी छान ||१२||

© सुश्री गायत्री हेर्लेकर

201, अवनीश अपार्टमेंट, कोथरुड, पुणे.

दुरध्वनी – 9403862565

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

श्री सुहास सोहोनी

 कवितेचा उत्सव 

☆ प्राणायाम… ☆ श्री सुहास सोहोनी ☆ 

श्वास हिणवतो निश्वासाला

कनिष्ठ तू, मी श्रेष्ठ,

जीवनदायी, सत्वशील मी

प्रदूषीत तू भ्रष्ट — ॥

सात्विक, तेजस रुपडे माझे

शुद्ध नि जीवनदायी

श्वास खिजवितो निश्वासाला

तू तर धोकादायी —॥

प्राणवायु आधार जिवांचा

माझ्यातुन वाहतो

कर्ब विखारी दूषित तूझा

जीवांना संपवितो — ॥

श्वासाचे  वक्तव्य ऐकुनी

झाला अवमानित

जळफळतो निश्वास, करोनी

मुद्रा क्रोधीत — ॥

रागाने मग निश्वासाने

चढवुनिया आवाज

दिधले प्रत्युत्तर श्वासाला

चढला तुजला माज — ॥

जाइन ना बाहेर यापुढे

निश्चय करतो पक्का

दार बंद तूज, तुला न आता

आत यावया मोका — ॥

श्वास तसे निश्वास जाहले

ठप्प जेथल्या तेथे

शरिर तळमळे, प्राण विव्हळे

जीव घुटमळे जेथे — ॥

एकच मग कल्लोळ उडाला

विश्वी, तीन्ही लोकी

सूर्य चंद्र अन् इंद्रहि स्वर्गी

भीतीने कांपती — ॥

कलह मिटविण्या अवतरला मग

ब्रह्मदेव साक्षात

नाण्याच्या दो बाजू तुम्ही

भांडत बसलात — ॥

लहान मोठे बंधू तुम्ही

छापा कांटा जसे

तुमच्या मधील नाणे तुमचा

मधला भाऊ असे — ॥

जाणे-येणे, येणे-जाणे

काही क्षण मध्येच थांबणे

कर्तव्यासी करा साधुनी

अखंड आवर्तने — ॥

प्राणवायु तू घेउन येसी

नाम तुझे पूरक

कोंडुन धरिसी श्वास रोखुनी

नाम तुझे कुंभक

सर्व अशुद्धे फेकुन देसी

नाम तुझे रेचक

तुमच्या एकोप्याच्या मधुनी

जन्मतील ‘साधक’ — ॥

पूरक कुंभक रेचक यांचे

कथिले रामायण

रोज करावी क्रिया अशी जिस

म्हणती ‘प्राणायाम’ — ॥

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

 कवितेचा उत्सव 

☆ ऐन थंडीत… ☆ श्रीमती उज्ज्वला केळकर ☆

या आश्वस्त वृक्षांनीच

विश्वासघात केला आमचा

ऐन थंडीत.

आसरा अव्हेरणं

त्यांना अशक्य झालं,

तेव्हा त्यांनी

विटा काढून घेतल्या

आपल्या घराच्या भिंतींच्या

आता उघडे पडलेले आम्ही

वाट बघतोय

पिसे झडण्याची

किंवा

कुणा शिका-याच्या

मर्मभेदी बाणाची

……………….

© श्रीमती उज्ज्वला केळकर

संपर्क -17 16/2 ‘गायत्री’ प्लॉट नं. 12, वसंत दादा साखर कामगारभावन के पास , सांगली 416416 महाराष्ट्र

मो. 9403310170, email-id – [email protected] 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री शोभना आगाशे

 इंद्रधनुष्य 

☆ चांगदेव पासष्ठी – भाग-1…  ☆भावानुवाद-  सुश्री शोभना आगाशे ☆

(संत श्री ज्ञानदेव महाराजांनी योगीराज चांगदेवांच्या कोर्‍या पत्राला दिलेलं उत्तर म्हणजे चांगदेव पासष्टी. संत ज्ञानदेवांच्या काळचं प्राकृत म्हणजेच मराठी आजच्या संदर्भात, सर्वसामान्य लोकांना कळायला अवघड आहे. म्हणून सुश्री शोभना आगाशे यांनी सध्या प्रचलित असलेल्या मराठीत या चांगदेव पासष्टीचं केलेलं रूपांतर प्रस्तुत करीत आहोत.)

जंव अप्रकट परमेश

विश्वाचा होतसे भास

प्रकट होई तो जेधवा

नुरे विश्व भास तेधवा॥१॥

अप्रकट तो जरि भासे

प्रकट परि नच दिसे

दृश्यादृश्य परे

गुणातीत असे बरे॥२॥

विशाल जसजसा होत

व्यापतसे तो जगत

भासचि हा परि जाणी

असुनि नसे घे ध्यानी॥३॥

रूपे बहु घेई जरी

अरूपातच असे खरी

अलंकार बनले जरी

सुवर्णा ना उणे तरी॥४॥

लाटांच्या झिरमिळ्या

सागरास पांघरल्या

भासचि हा जाण केवळ

सकळ असे निव्वळ जळ॥५॥

© सुश्री शोभना आगाशे

सांगली 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈