Category: कवितेचा उत्सव 2

प्रा. सौ. सुमती पवार

 कवितेचा उत्सव 

☆ माणसे… ☆ प्रा. सौ. सुमती पवार ☆

☆

मेंढरे झालीत सारी मान खाली घालती

लाज वाटे माणसांना लाजाळू झाली माणसे…

*

झुंज गेली षंढ झाले वांझ झाली माणसे

शौर्य गेले शक्ती गेली बायका ही माणसे…

*

तलवार गेली ढाल गेली नपुंसक ही माणसे

रक्षणार्थ धावती ना पारखी ही माणसे..

*

माणसात माणसे ना कलेवर ही माणसे

मढीच सारी निरुपयोगी राख सारी माणसे…

*

खूप खूप छान सर गझल आपली भाळते

वाटते मज व्यर्थ मम रक्त का मी जाळते…

☆

© प्रा.सौ.सुमती पवार 

 नाशिक

मो. ९७६३६०५६४२; ईमेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ विलाप… ☆ श्रीशैल चौगुले ☆

☆

तुझे-माझे म्हणता-म्हणता

निघून जाते सारे आयुष्य

मनातले संकल्प-विकल्प

मागे पडून राहे भविष्य.

*

अल्लड मेळा तारुण्य शाळा

वाट ऋणांची करे सोबत

हृदयी पक्षी विरह स्मृती

कधी काळांचे खेळ नौबत.

*

असे आभाळ नयनी दाटे

पुन्हा मिठीत सत्य दर्पण

जर्जर पाहून धीर सुटे

तेंव्हा मी पण दुःखा अर्पण.

☆

© श्रीशैल चौगुले

 

सुश्री संगीता कुलकर्णी

 कवितेचा उत्सव 

☆ तो असा असावा… ☆ सुश्री संगीता कुलकर्णी ☆

☆

मी नाही भेटली दिवसभर

तर त्याने खूप बैचेन व्हावं

*

संध्याकाळी ऑफिसबाहेर

भेटून सरप्राईज द्याव

*

भेटण्यासाठी ठरलेल्या जागी

त्याने माझ्या आधी यावं

*

उशीरा आले म्हणून

लटके लटकॆ रागवावं

*

फिरताना जर नजरेआड झाली

तर त्याने कावरबावरं व्हावं

*

दिसल्यावर मात्रं

अश्रू लपवत प्रेमानं ओरडावं

*

माझं काही चुकलं तर

त्याने कधी ही न रागवावं

*

अबोला धरुन न रडवता

काय चुकलं ते समजवावं

*

ज्याची कल्पना केली इतकी

भर-भरुन प्रेम देणारा तोच असावा

*

माझी आठवण आली त्याला की

त्यानं माझ्यासाठी एक कविता लिहावी

☆

©  सुश्री संगीता कुलकर्णी 

लेखिका /कवयित्री

ठाणे

9870451020

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

दिव्यत्व साकार तेज:पुंज !!   श्री आशिष  बिवलकर ☆

☆

कर्दळीवनात! झाला चमत्कार!

दिव्यत्व साकार! तेज:पुंज !! १ !!

*
चैत्र शु. द्वितीया! स्वामी आगमन !

प्रकटले तन! दर्शनासी !! २ !!

*

अक्कलकोटला! स्वामी प्रकटले !

भाग्य उमटले! उद्धारासी !! ३ !!

*

चोळप्पाच्या घरी! स्वामींचा निवास !

स्वामी सेवा ध्यास! चोळप्पासी !! ४ !!

*

दत्त अवतार! त्रिपुंड कपाळी !

रुद्राक्षाच्या माळी! दिव्यदृष्टी !!५ !!

*

भिऊ नकोस तू! मी आहे पाठीशी !

विश्वास गाठीशी! स्वामी भक्ता !! ६ !!

*

आशिष वंदितो! भक्तीने स्मरून !

नेतोय तारुन! भवसिंधू !! ७ !!

☆

© श्री आशिष  बिवलकर

दि. 04 मार्च 2025

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ संभ्रम… ☆ प्रा तुकाराम दादा पाटील ☆

☆

लळा जिव्हाळा प्रेम आंधळे ठरले आहे

द्वेषाने तर सुंदर जगणे मळले आहे

*

स्वर्ग कोणता नरक कोणता नाही ठावे

जग सगळे का भ्रमात असल्या रमले आहे

*

उपदेशाचे डोस पाजणे सोपे असते

स्वार्थ सोडणे कधी कुणाला जमले आहे

*

नाही कळले कोण येथला परोपकारी

लुबाडण्याला घबाड जग हे टपले आहे

*

मी तू मधला भेदभावतर कायम असतो

भलेबुरे पण या भेदाने घडले आहे

*

स्वत्वासाठी तत्व येथले गहाण पडते

गुपीत वेगळे यात कोणते दडले आहे

*

जगण्या मधला संभ्रम येथे कायम सलतो

याच सलाने जगण्याला ही छळले आहे

(अनलज्वाला)

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

कवितेचा उत्सव

☆ जीवनाचा अंत… ☆ सौ. वृंदा गंभीर ☆

☆

जिवनाचा अंत | सुखरूप व्हावा |

पुण्याचा हा ठेवा | मिळवावा ||1||

*

सुखाचा करावा | त्याग माणसाने |

जगाच्या दुःखाने | विव्हळावे ||2||

*

धरावी संगत | सज्जनाची जगी |

ईश्वराचे रंगी | रंगवावे ||3||

*

हर्षाने जगावे | कष्टाने झिजावे |

प्रेमाने वागावे | जीवनीया ||4||

*

नको हा संसार | असे मायाजाळ |

कसे येई बळ | कोण जाणे ||5||

*

अंतरीचा आत्मा | साक्ष देई मनी |

आध्यात्मा वाचुनी | काही नाही ||6||

*

मनाचे विचार | गुणी आचरण |

संस्कार जपणं | आचरावे ||7||

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ रीतिरिवाज ऋतूचक्राचे… ☆ श्री शरद कुलकर्णी ☆

☆

संपून गेल्या वयाकडे थोडेस

वळून पहा.

गळून गेल्या पानाकडे पहात

वृक्षवत रहा.

वाटेवर की पावलांवर विश्वासावं,

मूलतः हा प्रश्न आहे.

वाटचाल कशी करावी

हा ज्याचात्याचा प्रश्न आहे.

ऋतुचक्राचे कांही रीतरिवाज

असतात.

पानगळीला कोणतेही आवाज

नसतात .

बाकी एवढ्याच घटना घडल्या .

तुम्ही दरवाजे बंद केले.

मीही मग खिडक्या मिटल्या.

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

  चित्रकाव्य  

   बहावा… (विषय एकच… काव्ये तीन) सुश्री नीलांबरी शिर्के  – डॉ. सोनिया कस्तुरे – श्री आशिष बिवलकर ☆

( १ )

सुश्री नीलांबरी शिर्के

☆

हिरवा चुडा हातात लेऊन

झाड हळदुले नवरी झाले ..  की ..  

रविराजाने विसरून जाऊन

सुवर्ण घडे इथे ओतले

*

रखरखत्या उन्हात फिरता

दृश्य असे दृष्टीस पडता

निसर्ग संपन्नतेपुढे आपला

आपसुक झुकतोच ना माथा  

☆

© सुश्री नीलांबरी शिर्के

मो 8149144177

( २ )

डॉ.सोनिया कस्तुरे

☆

निसर्गाची गुढी | उभी उंच नभी 

तम, प्रखरता | नाही तमा मनी

*
डौलदार बांधा | हळद पिऊनी 

सोनेरी झुंबर | जणू नभांगणी

*

कोवळी नाजुक | हिरवी पालवी

अंगीखांदी कशी | मधून डोकावी

*
रुणझुण तिला | पवन डोलवी

गाणे सुखे गाते | रणरणत्या उन्ही

☆

© डॉ.सोनिया कस्तुरे

विश्रामबाग, जि. सांगली

भ्रमणध्वनी:- 9326818354

( ३ )

श्री आशिष बिवलकर   

☆

ऋतू चक्राचा

घेऊन सांगावा |

चैत्र पावलांनी,

फूलला बहावा |

*
ग्रीष्माचा कहर,

तापले माळरान |

पिवळ्या फुलांनी,

सजला तरु छान |

*
उकाड्याने हैराण,

जीवास लागे उमासा |

रंगांची चाले उधळण,

दृष्टीस मिळे दिलासा |

*
तरुवर लटकली झुंबरे,

तरुतळी गालिचा सुवर्ण |

उष्ण गंधीत समीर,

डुलती तालावर पर्ण |

*
रंगांनी रंगला बहावा,

नादच त्याचा खुळा |

निरंतर चालत असे,

निसर्गाचा सोहळा |

☆

© श्री आशिष  बिवलकर

बदलापूर

मो 9518942105

☆☆☆☆☆

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष मुळे

 कवितेचा उत्सव 

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈