Tag: #मराठी-कविता

सौ. जयश्री पाटील

 कवितेच्या उत्सव 

☆ निरोप देताना… ☆ सौ. जयश्री पाटील ☆

वर्षा मागून सरतील वर्षे

सुखदुःखाच्या हिंदोळ्यावर

रात्री मागून येईल पहाट

नित्य जीवनाच्या रहाटावर

निरोप देता सरत्या वर्षाला

किंतु परंतु मनी न राहावा

करता येईल कोणासाठी

काही विचार हा मनी यावा

आठवणींना जपून ठेवत

विसरून सारे झाले गेले

अनुभवांच्या आधारावर

भविष्याचेच बांधू इमले

चाहूल नवीन वर्षाची

तयारी करू स्वागताची

क्षणभर वळून मागे आता

फळी उभारू माणुसकीची

शिकवून गेले सारे सारेजण

सकारात्मकता मनी ठेवून

इच्छाशक्तीची उंच भरारी

नव्या आशेचे पंख लावून

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. दीपा नारायण पुजारी

  चित्रकाव्य  

– तू तर आनंदाची लकेर – ☆ सौ. दीपा नारायण पुजारी ☆

☆

माथी नाही छप्पर

नाही विसावा नाही घर

खळखळते हास्य तुझे

मजसाठी तू आनंदाची लकेर । १ ।

☆

सपसप चालती कर

झपझप चालती पाय

निर्झरासम गुंजन तुझे

मजसाठी तू आनंदाची लकेर । २ ।

☆

माथ्यावरी कष्टाची पाटी

वणवण भाळी पोटासाठी

डोळे तुझे जणू भ्रमर

मजसाठी तू आनंदाची लकेर । ३ ।

☆

नाही गिरवले मी अक्षर

तरी असेन तुजसाठी तत्पर

करेन तुज मी साक्षर

मजसाठी तू आनंदाची लकेर । ४ ।

चित्र साभार –सौ. दीपा नारायण पुजारी

© सौ. दीपा नारायण पुजारी

इचलकरंजी, फोन.नं. ९६६५६६९१४८

दिनांक – १३/१२/२०२२।

[email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री दीप्ती कुलकर्णी

 कवितेचा उत्सव 

☆ नवे वर्ष… ☆ सुश्री दीप्ती कुलकर्णी ☆

दिनदर्शिका पाहता-पाहता

वर्ष सरते  डिसेंबर सरता

कडु-गोड आठवणींनी

फेर धरला दाट विणींनी

सुख-दु:खाच्या या धाग्यांनी

स्मरण  होई तरल मनी

वर्षातील या प्रसंगातुनी

कटुतेलाही ही दूर सारुनी

आठवू गोडी माधुर्यातुनी

आप्त-स्वकिया सवे घेऊनी

 निरोप देऊ मोद मानुनी

 ओंजळीतल्या बकुळ फुलांनी

 गंधासह त्या धुंद होऊनी

 गतवर्षाला  मनीच स्मरुनी

कालचक्र हे नित स्मरुनी

स्वागतास ही सज्ज होऊनी

वाट  पाहू या अधिर होऊनी

नव वर्षाच्या रम्य क्षणी.

© सुश्री दीप्ति कुलकर्णी

कोल्हापूर

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास रघुनाथ पंडित

 इंद्रधनुष्य 

☆ “सरणारे वर्ष मी” – कविवर्य मंगेश पाडगावकर ☆ प्रस्तुती – श्री सुहास रघुनाथ पंडित ☆

मी उद्या असणार नाही,

असेल कोणी दूसरे !

मित्रहो सदैव राहो,

चेहरे तुमचे हासरे

झाले असेल चांगले,

किंवा काही वाईटही !

मी माझे काम केले,

नेहमीच असतो राईट मी

माना अथवा नका मानु,

तुमची माझी नाळ आहे !

भले होओ, बुरे होओ,

मी फक्त “काळ” आहे

उपकारही नका मानु,

आणि दोषही देऊ नका !

निरोप माझा घेताना,

गेट पर्यन्त ही येऊ नका

उगवत्याला “नमस्कार”,

हीच रीत येथली !

विसरु नका “एक वर्ष”,

साथ होती आपली

धुंद असेल जग उद्या,

नव वर्षाच्या स्वागताला !

तुम्ही मला खुशाल विसरा,

दोष माझा प्राक्तनाला

शिव्या, शाप, लोभ, माया,

यातले नको काही !

मी माझे काम केले,

बाकी दूसरे काही नाही

निघताना “पुन्हा भेटु”,

असे मी म्हणनार नाही !

“वचन” हे कसे देऊ,

जे मी पाळणार नाही

मी कोण ?

सांगतो..

“शुभ आशिष” देऊ द्या,

“सरणारे वर्ष” मी,

आता मला जाऊ द्या !!

— कविवर्य मंगेश पाडगावकर 

संग्राहक : सुहास रघुनाथ पंडित

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मंजुषा सुनीत मुळे

 कवितेचा उत्सव 

☆ क्रांती…  ☆ सुश्री मंजुषा सुनीत मुळे ☆

क्रांतीची ज्वाला असो की

ज्योत मंदशी तेवती –

पाय माघारी न घेणे

हेच दोघी सांगती —

ज्वालेत जळती किती समीधा

गणती कधी करता न ये –

त्यानेच परि त्या क्रान्तीला

अंती पहा साफल्य ये —

ज्योत त्याहुनी सानुली

तरी काम करते क्रांतीचे –

रुजवते मनामनात

बीज उज्ज्वल प्रगतीचे —

सातत्य गतीचे राखते

मन निश्चयाशी बांधते –

ती ज्योत क्रांतीची जपा

मग प्रगती खचितच साधते —

विचारात, प्रवृत्तीत आणि

सद् भावातही होवो क्रान्ती –

क्रांतीचा नित हेतू हाच

‘ विश्वात भरूनी राहो शांती‘ —

© सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ.सोनिया कस्तुरे

 कवितेचा उत्सव 

☆ नववर्ष सदिच्छा !  डॉ.सोनिया कस्तुरे ☆

नववर्षात सर्वांना आरोग्य लाभावे

कष्टकरी शेतकरी मजूरांना न्याय मिळावे

मालकीहक्क,लाचारी,गुलामी संपावी

अत्याचार, हिंसेला मुठमाती मिळावी.

चिंता,संताप , व्यसन, फसवणूक नसावी.

विश्वातील प्रत्येक व्यक्ती सुखाने नांदावी.

स्त्रीयांना जगण्याचे नवे बळ मिळावे.

गगनाला भेदण्याचे स्वातंत्र्य गवसावे.

अभिमान,स्वाभिमान,आत्मभान जागावे.

मानसिक,भावनिक, वैश्वीक नाते जडावे.

नवजात बाळाला विश्वास मिळावा.

वाढत्या वयाने आनंद साठवावा.

गोरगरीब,दीन,दुय्यम कुणी नसावे.

दोन वेळच्या जेवणाने तरी तृप्त व्हावे.

सत्याच्या वाटेवर सर्व काही असावे

शांततेच्या मार्गावर बुद्धत्व फुलावे.

© डॉ.सोनिया कस्तुरे

विश्रामबाग, जि. सांगली

भ्रमणध्वनी:- 9326818354

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈