Category: कवितेचा उत्सव 2

श्रीशैल चौगुले

 कवितेचा उत्सव 

☆ सोनेरी सांज… ☆ श्रीशैल चौगुले ☆

मन सोनेरी ऊन्हात

सांजवेळी राना-वनात

श्रीफळ जटा सुंदर

जणू शिंपणाची वरात.

संथ वार्याची झुळूक

नाचे वेल-वृक्षाचे पान

निरभ्र नभात सांज

पक्षी पिलांचे माया गान.

हिरवी जर्द धराई

श्रावण सुख अप्रुबाई

झरे तीर सरोवर

डोंगर वाटातली घाई.

रातराणी नि जाईजुई

चांदण चाफा शुभ्रभाव

मंदिरी अंगणी फुलवा

सांजललना नत् जीव.

भाळी लालबुंद कुसूम

छटा सृष्टीवरती कृपा

आता अटळ हा निरोप

पांघर दाट शाल दिपा.

© श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

  विविधा  

☆ अभंग… ☆ श्रीमती उज्ज्वला केळकर ☆

शापभ्रष्ट

फुलांच्या देठाचा। सोसवेना घाव।

जखमांची ठेव । माझ्या उरी ।।

रकताळल्या मना। आधार कुणाचा ।

फाटक्या दयेचा। जलबिन्दू।।

सोशीत झेलीत। अनंत आघात।

हिंडलो जगात। शापभ्रष्ट।।

आभाळा भिडण्या। भोवंडले प्राण।

देई चढवून । क्रुसावरी ।।

अदृष्ट

अमृताची बीजे । लवित राहिले ।

उगवून आले । वीषवृक्ष ।।

चांदण्यांचे सडे । शिंपीत राहिले ।

अंगार भासले । पथिकाला ।।

वाट उजळण्या । मशाल लाविली ।

चूड गा धरिली । म्हणताती ।।

कोणत्या शापाचे । भोग भोगविले ।

काय त्वा रेखिले । अदृष्टात ।।

© श्रीमती उज्ज्वला केळकर

मो. 9403310170, email-id – [email protected]  

संपर्क -17 16/2 ‘गायत्री’ प्लॉट नं. 12, वसंत दादा साखर कामगारभावन के पास , सांगली 416416 महाराष्ट्र 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ कळते कोठे ☆  श्री तुकाराम दादा पाटील ☆ 

(गागागागा गागागागा गागागागा)

प्रेमापोटी प्रेम कराया जमते कोठे

पण ममतेचे  दर्शन आता घडते कोठे

देणे घेणे सतत असावे गरजे पुरते

आत्म्यालाया शांती पुरती मिळते कोठे

नाही पर्वा म्हणताना ही मन घाबरते

धाडस तेव्हा औदार्याचे लपते कोठे

चुकल्यानंतर सावरण्याची होते घाई

मन वेड्यानो तुमचे तेव्हा असते कोठे

मोक्षासाठी तप करताना ध्यानी येते

जगण्यामधले बंधन सारे तुटते कोठे

कर्म धर्म पण जपले जाते तनमन लावत

संकट येता झगडत बसणे सरते कोठे

जगभवतीचे तुमचे असते तुमच्यासाठी

शांत मनाने उपभोगाया कळते कोठे

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कै सदानंद शांताराम रेगे

(२१जून १९२३ – २१ सप्टेंबर १९८२)

कवितेचा उत्सव

☆ चंदन ☆ कै सदानंद शांताराम रेगे ☆

आषाढाने खाली लवून

दिले पालवीला आलिंगन

अन् विजेच्या ओठांनी

तो लागला घेऊ

जेव्हा क्षितिजाचे जांभळे चुंबन

जेव्हा वादळाच्या कवेत

वितळलेली मातीही झाली

लाजेने हिरवी

अन् दरवळले

तिच्या वक्षावर

श्रावणाचे कोवळे चंदन….

 – सदानंद रेगे

सौ कुंदा कुलकर्णी

 कवितेचा उत्सव  

☆ उंबरठा… ☆ सौ कुंदा कुलकर्णी ☆

रांगायला लागले तेव्हापासून

उंबरठा सारखा खुपत होता

ओलांडता येत नव्हता

म्हणून मुळीच आवडत नव्हता (१)

नंतर सारवून रांगोळी घातली

मग  फारच आवडायला लागला

त्यालाच ठेचकाळत मोठी झाले

मर्यादेचे शिक्षण मिळाले(२)

माप ओलांडून सासरी आले

त्याला ओलांडताना  भान जागले

सासुरवाशीण माहेरवाशीण

अदबीनेच वागू लागले (३)

फ्लॅटमध्ये मी आले आता

नवे रूप त्याचे मज दिसता

हळवा आठव मनी बागडता

सखाचा झाला प्रिय तो आता (४)

© सौ. कुंदा कुलकर्णी ग्रामोपाध्ये

क्यू 17,  मौर्य विहार, सहजानंद सोसायटी जवळ कोथरूड पुणे

मो. 9527460290

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कवितेचा उत्सव  

ज्ञानेशांचे ध्यान   श्री.संत गुलाबराव महाराज

सुंदर ते ध्यान इंद्रायणीतीरी

सावळी गोजिरी मूर्ती मध्ये॥

पांडुरंगकर तयाचे आसन

सामोरे निधान निवृत्तिराज॥

सोपानमुक्ताबाई शोभती आणिक

नारदादि लोक पूजिताती॥

हृदयीचे गुह्य उमटले आता

अंतर्बाह्य चित्ता समभाव ॥

ज्ञानेश्वर तात आणि कृष्ण पति

सौभाग्यसंपत्ति नित्य मज ॥ 

संत गुलाबराव महाराज.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈