मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #156 ☆ नक्षत्रांचे फुलणे… ☆ श्री अशोक श्रीपाद भांबुरे ☆

☆ नक्षत्रांचे फुलणे… ☆

समर्पणाच्या तेलामधल्या लावु प्रीतिच्या वाती

लैला-मजनू सोबत व्हावी तुझी नि माझी गणती

पुनवेच्या या चांदण रात्री नक्षत्रांचे फुलणे

फांदीवरच्या कळ्या फुलांचे आनंदाने झुलणे

भल्या पहाटे दवात भिजुनी तुझ्यासारख्या नटती

मेंदीसोबत हात फुलांचे छान रंगले होते

फांदीसोबत जडले होते जन्मभरीचे नाते

तुझ्याचसाठी या नात्याला पहा लागली गळती

मातृत्वाचा स्पर्श सोडुनी तुझ्यासोबती आले

जन्मोजन्मी या संसारी तुझीच रे मी झाले

तुझ्या घराचा दिवा लावण्या जळत राहिली पणती

वृक्ष बहरला नवीन फांद्या नव्या युगाची नांदी

इतिहासाच्या पानांवरती व्हाव्या याच्या नोंदी

या प्रीतीची नोंद रहावी नव्या पिढीच्या हाती

© अशोक श्रीपाद भांबुरे