श्री सुनील देशपांडे
कवितेचा उत्सव
☆ “गजलेची गजल…” ☆ श्री सुनील देशपांडे ☆
☆
उला नि सानी मिसरा यांना घेऊन आली होती, मज गजल चावली होती.
रदिफ, काफिया यांना बिलगुन सुंदर हसली होती, मज गजल चावली होती.
*
सुंदर सुंदर शब्दांचा तो मतला माथ्यावरती घेऊन चालली होती,
शेर पांघरून अंगावर सामोरी आली होती, मज गजल चावली होती.
*
शब्दरूप ती फुले सुगंधित उधळित आली होती मन मोहुन टाकत होती,
तालावरती मनमोहक ती ठुमकत आली होती, मज गजल चावली होती.
*
धुंद धुंद बेभान होऊनी शुद्ध हरपली होती, तिज ‘बहर’ली पाहिली होती,
शुद्धीवरती आलो तेव्हा मनात भरली होती, मज गजल चावली होती.
*
हळुच सारुनी बुरखा मी तिज नीट पाहिली होती, जी कोण चावली होती,
सुंदर बुरखा ल्यालेली अति सुंदर कविता होती, मज गजल चावली होती.
☆
© श्री सुनील देशपांडे
मो – 9657709640
email : [email protected]
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
