Category: कवितेचा उत्सव 2

श्री तुकाराम दादा पाटील

 कवितेचा उत्सव 

☆ पाऊस… ☆ प्रा तुकाराम दादा पाटील ☆

☆

आस फुलते मनात

देता चाहूल पाऊस

वादळाच्या सोबतीने

चळवळतो पाऊस

रान तापते उन्हात

मग मागते पाऊस

गंध मातीचा हुंगाया

तळमळतो पाऊस

शेती माती पिकवाया

येतो धावत पाऊस

हळू  हळू  धरेवरी

घरंगळतो पाऊस

आभाळाच्या गाभाऱ्यात

जातो धावत पाऊस

रान गारठा पाहून

अडखळतो पाऊस

बरसता धुवाधार

फार थकतो पाऊस

रान ओलं गंधाळता

डळमळतो पाऊस

जोर ओसरतो तेव्हा

शांत वाटतो पाऊस

मंदवा-याच्या तालात

कळवळतो पाऊस

ओढ्या नाल्यांचा सोबती

मग बनतो पाऊस

धार होऊन पाण्याची

खळखळतो पाऊस

तनामनात सारखा

रोज मुरतो पाऊस

चैतन्याच्या रुपातून

सळसळतो पाऊस

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ अद्वैताचा साक्षीदार… ☆ डॉ. मधुवंती कुलकर्णी ☆

☆

पाऊस असा कोसळतो

धक धक धडकी भरतो

वणवाच उरी चेततो

बेभानपणे अवतरतो

गोष्टीत ॠतुंच्या रमतो

गालांवर टप टप पडतो

केसांत बटांवर झुलतो

ओठांवर चिंब नहातो

कंकणात किण किण करितो

मुरलीसम अधरी धरितो

तिन्हीसांजे वचनी बुडतो

झोपडीत अधीर होतो

पाऊस असा कोसळतो

राधे सह रंग बहरतो

सावळ्यात रंग विरघळतो

अद्वैत उराशी घेतो

पाऊस नभातून येतो

थेंब थेंब झिरपत रहातो

 ज्ञानदेवे ओवी गातो

अद्वैत मुळाशी धरितो

पाऊस सरींचा येतो

मुक्तेचे गाणे गातो

लखलखता प्रकाश देतो

गात्रात विजेसम भरतो.

पाऊस कधी पण येतो

टाळात तुकोबा रमतो

बेभान होत नाचतो

विठ्ठलात दंग रहातो

पाऊस साक्षही होतो

अध्यात्म मनाचे जपतो

पण प्रियाराधनी रमतो

द्वैतीद्वैत मिसळतो

पाऊस असा रिमझिमतो

मौनात मौन रिझवितो

अद्वैत पाहुनि खुलतो

निश्चिंत करुनिया जातो.

☆

© डॉ. मधुवंती कुलकर्णी

जि.सांगली

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ निमित्त… ☆ श्री शरद कुलकर्णी ☆

पापणी ओलीच माझी,

ओलीच ती राहू दे ना!

मेघ पावसाच्या नभाचे,

नभीच माझ्या राहू दे ना!

वृक्ष व्याकूळ झाले कशाने ?

सळसळती पाने कशाने ?

गुपित हेही जीवघेणे,

वार्‍यास आज सांगू दे ना!

हूल उठल्या पावसाची,

चाहूलही लागलीच होती.

मोर माझे जायबंदी ,

मुक्त त्यांना होऊ दे ना!

थांबशील तू जराशी ,

वाटले वृथा मनाशी .

थांबण्याला तू जरासे,

निमित्त पाऊस होऊ दे ना!

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. जयश्री पाटील

 कवितेच्या उत्सव 

☆ भीम प्रतिज्ञा… ☆ सौ. जयश्री पाटील ☆

☆

किती युगे हे असे चालणार

द्रौपदीचे वस्त्रहरण होणार

कशी कळेना तिची वेदना

का बोथट झाल्यात संवेदना

कशी आहेत पट्टी बांधून

डोळे आणि समज असून

प्रश्न येत नाहीत सोडवता

तर कशाला मग हवी सत्ता

द्वेष हिंसा उद्रेक जमावाचा

का दिला जातो बळी स्त्रीचा

प्रतीक्षा माता-भगिनींना

करावी अशी भीम प्रतिज्ञा

धिंड काढावी नाराधामांची

छाटणी करावी त्या पुरुषत्वाची

कृष्ण मारुती जन्मा यावेत

शिवबा सम सिंह अवतरावेत

☆

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

– पूजा लक्ष्मीरूपाची… –  ☆ सुश्री नीलांबरी शिर्के ☆

☆

देव्हाऱ्यातील  देवासह मी

रोज लक्ष्मी पूजते 

श्रावणात साक्षात लक्ष्मीरूपे

 ये .. तुजला आमंत्रण देते — 

☆

दारी येता लिंबलोण  मी

टाकते ग उतरूनी 

श्रमपरिहारार्थ टाकते 

तव पायावर पाणी —

☆

ये बाई सुहास्य वदने तू 

मम उंबरा ओलांडूनी

तव आगमने आपसूक जाते

घर सुखसौख्ये भरूनी —

☆

ये आई अंबाबाई लक्ष्मीरूपे

घे पाटावरी बसून

कोमट उदके पदप्रक्षालन

मंगल पायांचे पूजन —

☆

असो कृपेची छाया आई 

भरते मळवट सौभाग्याचा

केशकलापी माळ गं आई   

गजरा हा सुगंधी फुलांचा — 

☆

यथामती यथाशक्ति नैवेद्य 

आई गोड मानूनी घेई

आगमनाने तुझ्या वसू दे

घरात सुखमय शांती — 

☆

भक्तिरुपाने सदा तेवतील

देवघरातील  वाती

खण नारळाची ही साडीसह

भक्तिभावे भरते ओटी —

☆

गोड मानुनी घे सारे हे 

महालक्ष्मी माते

ठेव सदा तव कृपा घरावर 

हीच विनवणी करते — 

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆ भक्ती शक्ती… ☆ सौ. उज्वला सुहास सहस्रबुद्धे ☆

(शिवराय आणि रामदास गुरु शिष्य जोडीवर आधारित कविता)

भक्ती शक्तीचा इतिहास सांगतो,

      महाराष्ट्र माझा !

सह्यगिरीच्या खोऱ्यात गर्जतो,

       छत्रपती राजा !

पावनभूमी महाराष्ट्राची,

      संत महंतांची !

जिथे जन्मली ज्ञानेश्वरी,

     अन् गाथा तुकयाची!

दासबोध निर्मिती झाली,

  सह्य गिरी कंदरी !

ज्ञान न् बोधाची शिदोरी,

   जनास मिळाली खरी !

 शिवरायांनी शौर्याने त्या,

   गडकिल्ले घेतले !

हिंदूंचा राजा बनुनी ,

   छत्रपती  जाहले !

 राज्य घातले झोळीमध्ये,

   राजा शिवरायांने ,

 आशीर्वादे समर्थ हाते,

   शिवबास दिले गुरुने !

 रामदास – शिवराय जोडीची,

   अपूर्व गाठ पडली!

 आनंदवनभुवनी गुरु शिष्य,

    समर्थ जोडी गाजली!

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

☆ कृ ता र्थ ! ☆ श्री प्रमोद वामन वर्तक ☆

(खरंच असं असेल का एखाद्या मुरलीचे मनोगत ?)

☆

ऐकून माझा मधुर स्वर

चुके काळजाचा ठाव,

कसे कळावे त्यासाठी

सोसले मी किती घाव !

☆

मी दिली अग्निपरीक्षा

पडली छिद्र काळजाला,

तेव्हा कुठे मज मिळाला

स्वर तो मंत्रमुग्ध भरला !

☆

गोड स्वर ऐकताच माझा

हरपे गोपिकांचे भान,

देखल्या विना हरीला

येती मग कंठाशी प्राण !

☆

झाले सार्थक जीवनाचे

लागता हरीच्या ओठी,

मोद भरल्या गोपिकांचा

रास रंगे यमुनेकाठी !

रास रंगे यमुनेकाठी !

☆

© प्रमोद वामन वर्तक

दोस्ती इम्पिरिया, ग्रेशिया A 702, मानपाडा, ठाणे (प.)

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈