श्री शरद कुलकर्णी
कवितेचा उत्सव
☆ निमित्त… ☆ श्री शरद कुलकर्णी ☆
पापणी ओलीच माझी,
ओलीच ती राहू दे ना!
मेघ पावसाच्या नभाचे,
नभीच माझ्या राहू दे ना!
वृक्ष व्याकूळ झाले कशाने ?
सळसळती पाने कशाने ?
गुपित हेही जीवघेणे,
वार्यास आज सांगू दे ना!
हूल उठल्या पावसाची,
चाहूलही लागलीच होती.
मोर माझे जायबंदी ,
मुक्त त्यांना होऊ दे ना!
थांबशील तू जराशी ,
वाटले वृथा मनाशी .
थांबण्याला तू जरासे,
निमित्त पाऊस होऊ दे ना!
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈