Category: कवितेचा उत्सव 2

श्रीशैल चौगुले

 कवितेचा उत्सव 

☆ जुगाराचा घोडा… ☆ श्रीशैल चौगुले ☆

☆

उधळून गेला

आयुष्याचा घोडा

तबेल्याची संगत

मालकाचा जोडा.

*

रंगलेला जीव

शर्यतीचा पक्का

मैदानात धाव

जुगाराचा एक्का.

*

संघर्षात सुख

अनुभवे खुप

नियतीचे बंध

जीवनाचे रुप.

*

अमापाची गर्दी

लौकिकाचा राजा

सोबतीचे पान

गुलामीची सजा.

*

फसलेला डाव

असूरांची माया

वेळेसाठी घोडा

पटावर काया.

 ☆

© श्रीशैल चौगुले

सुश्री त्रिशला शहा

 कवितेचा उत्सव 

☆ मी डिसेंबर… ☆ सुश्री त्रिशला शहा ☆

☆

नमस्कार लोकहो,

निरोप द्या आता मजला

फिरुन येईन पुढच्या साला

बारा महिन्यातला मी बारावा

नेहमीच असतो नंबर शेवटी माझा

कामी येतो मी तुमच्यासाठी

गुलाबी थंडी असते माझ्याचवेळी

ख्रिसमस आणि दत्तजयंती

साजरी होते माझ्याचवेळी

एकतीस तारीख असते सर्व मासी

पण साजरी होते माझ्याचवेळी

मी जातो म्हणूनच नविन साल

सुरु होते माझ्याच पाठी

म्हणूनच म्हणतो निरोप द्या आता मजला

नविन वर्षाची पहाट येईल आता

स्वागत त्याचे करा जल्लोषी

महिना बारावा म्हणून पुन्हा येईन मी

☆

© सुश्री त्रिशला शहा

मिरज

 ≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

मावळला ‘अर्थ-सूर्य’…  श्री आशिष  बिवलकर ☆

☆

अर्थ व्यवस्थेचा | गेला सरदार |

वित्त कारभार | सुधारून ||१||

*

विद्या विभूषित | श्रेष्ठ अर्थतज्ञ  |

राष्ट्रासी कृतज्ञ | देशसेवा ||२||

*

विसावे शतक | सरता सरता |

तारणहारता | व्यवस्थेचा ||३||

*

अर्थव्यवस्थेची | सुधारली नीती |

विकासाची गती | शिल्पकार ||४||

*

मुक्त धोरणाने | बदलली दिशा |

पल्लवीत आशा | देशासाठी ||५||

*

राजकारणात | अंगी मौनव्रत |

संयमी इभ्रत | राखुनिया ||६||

*

अर्थ माळेतील | मणी ओघळला |

आज मावळला | अर्थसूर्य ||७||

☆

.. .. जेष्ठ अर्थतज्ञ डॉ. मनमोहन सिंग यांना भावपूर्ण श्रद्धांजली 💐

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ देव हासले… ☆ प्रा तुकाराम दादा पाटील ☆

☆

मला तुला जपायला कुणी तरी सुनावले

दिवानगी नको करू जपून टाक पावले

*

म्हणू नको उगाच तू तुलाच खूप चांगला

तुझ्या पुढे कधी तरी बरेच लोक गाजले

*

धरून ध्येय चांगले लपून का बसायचे

जगात या जगायचे करून काम चांगले

*

नमून वागणे बरे नको मिजास दाखवू

गरीब तारले इथे मुजोर दूर फेकले

*

चुका करून वागतो पुन्हा हसून सांगतो

सुधारला कधी न तो उपाय खूप योजले

*

तमाम जिंदगी तुला जगायची खरीखुरी

जुन्यातले जुने खरे बघून सर्व दाखले

*

जगात सत्य तेवढे टिकून आज राहते

पळून दैन्य चालले म्हणून देव हासले

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सौ. ज्योती कुळकर्णी 

 कवितेचा उत्सव 

☆ न्यायनिवाडा…☆ सौ. ज्योती कुळकर्णी ☆

(आनंदकंद)

☆

तत्त्वास सिद्ध करण्या वादात जिंकते मी

नाते जपावयाला वादास टाळते मी

*

डाकू मतामतांच्या चिखलात लोळणारे

पंकात पंकजाची का वाट पाहते मी

*

केले कुणी गुन्हे जर आहेत पाठराखे

निष्पाप शोधते अन चौकीत डांबते मी

*

नादान लोक सारे चलतीच आज त्यांची

साधे दिसो कुणीही वेशीस टांगते मी

*

विसरून मानवत्वा संहार होत आहे

खुर्चीत तेच दिसता चित्तास जाळते मी

*

मी व्यक्त होत नाही झुरते मनात माझ्या

अश्रू गिळून अपुले चुप्पीच साधते मी

*

टीका करून काही निर्माण होत नाही

काव्यात मल्लिनाथी सृजनास गाडते मी

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती अनिता जयंत खाडीलकर

  चित्रकाव्य  

☆  दिनक्रम  ☆ श्रीमती अनिता जयंत खाडीलकर ☆

☆

फेसाळत्या या लाटा 

किनारी भेटाया येती

किनारा तिला भेटता

मिळे त्यांना तृप्ती

*

नभीचे हे सुर्य अन् चंद्र 

यांचे त्यांना आकर्षण 

भेटण्या त्यांना घेती रूप रौद्र 

अन् येताच किनारी होती अर्पण 

*

कधी पोटात घेती

कित्येक ते जीव 

कधी बाहेर फेकती

परतुन त्यांचे शव

*

नसे त्याची लाटांना

कोणतीच खंत 

दिनक्रम हा त्यांना

नसे काही भ्रांत 

☆

© श्रीमती अनिता जयंत खाडीलकर

सह्याद्री अपार्टमेंट, खाडीलकर गल्ली, बालगंधर्व नाट्यमंदिर समोर, ब्राह्मणपुरी, मिरज,जि. सांगली

मो 9689896341

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

मेहबूब जमादार 

 कवितेचा उत्सव 

☆ सूत्र… ☆  मेहबूब जमादार ☆

☆

जीवनी ताल असता तू बेताल वागू नको

गोडशा फळा वरील कडू साल होऊ नको

 *

दुसरा हात घेऊनी हाती माणसाने चालावे

भल्या वाटेवर चालताना तू कुणा रोखू नको

 *

नदीनेही वळता वळता दोन्ही काठाकडे पहावे

तिला जाउ दे वळणाने पण तू बांध घालू नको

 *

जगता जगता आपण फसतो, बऱ्याचदा चुकतो

आनंदी जगत असताना तू कुणाला रडवू नको

 *

आकाशातल्या ताऱ्यांशी आपण तुलना करू नये

रात्रीचं ते चमकतील भर दिवसा त्यांना पाहू नको

 *

जे आपले नाही ते मिळवण्या तू उगा मरू नको

दुसऱ्या साठी जगायचे हे सूत्र मात्र विसरू नको

☆

© मेहबूब जमादार

मु. कासमवाडी,पोस्ट -पेठ, ता. वाळवा, जि. सांगली

मो .9970900243

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा. भरत खैरकर

 कवितेचा उत्सव 

☆ “गवतपात्याचे हायकू…” ☆ प्रा. भरत खैरकर ☆

☆

दवाचा थेंब

गवतपात्यावर पडला

मधातुन चिरला….

 *

सुर्याचे किरण

पात्यावर थांबले

लख्ख चकाकले!

 *

लढवितो वारा

तृणांकुरावरी

इवलाल्या तलवारी…

 *

एक फुलपाखरू

पात्यावर बसलं

हलकेच झुललं…

☆

© प्रा. भरत खैरकर

संपर्क – बी १/७, काकडे पार्क, तानाजी नगर, चिंचवड, पुणे ३३. मो.  ९८८१६१५३२९

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मंजुषा सुनीत मुळे

  चित्रकाव्य  

☆ “अगदी मनातले…” ☆  सुश्री मंजुषा सुनीत मुळे ☆

☆

खाली दगड असोत की वाळू असो 

खत – पाणी असो नसो 

मनापासून फुलणं मी विसरत नाही 

मला कशानेच फरक पडत नाही…

*

रंग नाही रूप नाही 

आकर्षित करणारा सुगंध नाही 

आणि माझ्याकडे कुणी बघतंय की नाही 

याने मला काहीच फरक पडत नाही…

*

बस् निसर्गाची कृपा आहे 

किंचित प्राण माझ्यातही फुंकलेला आहे 

हे माझ्यासाठी काही कमी नाही 

मग फरक मला मुळी पडतच नाही…

*

इवलंसं माझं जग आहे 

इवल्याशा डोळ्यांनी मला ते दिसतं आहे 

मग मी कुणाला दिसो ना दिसो 

मला मुळीच फरक पडत नाही…

*

आयुष्य म्हणजे मुठीतली वाळू 

माणसाला कळतं पण वळत नाही 

मी मात्र मजेत डोलतांनाही हे विसरत नाही 

मग त्याने मला फरक काहीच पडत नाही…

*

मी आज आहे आणि उद्या नसणार आहे 

हे त्रिकालाबाधित सत्य मी जाणलं आहे 

पण म्हणून मी आजच कोमेजणार नाही 

एकदा हे सत्य स्वीकारलं की…

 मला ‘आज’ काहीच फरक पडत नाही…

☆

कवयित्री : सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈