Marathi Kavita
कवितेचा उत्सव
☆ तुझ्याचसाठी कितीदा ☆ ना. घ. देशपांडे ☆
(10 मे : स्मृतीदिनानिमित्त)
तुझ्याचसाठी
कितीदा
तुझ्याचसाठी रे !
मी दुहेरी
बांधल्या
खूणगाठीरे !
मी दुपारी
सोसले
ऊन माथी रे !
लाविल्या मी
मंदिरी
सांजवाती रे !
कैक आल्या,
संपल्या
चांदराती रे !
मी जगाच्या
सोडल्या
रीतभाती रे !
– ना.घ.देशपांडे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 137 ☆ ठिणगी ☆
येउनी स्वप्नात माझ्या, रोज ती छळतेच आहे
जखम भरु ती देत नाही, दुःख माझे हेच आहे
ऊल झालो शाल झालो, हे तिला कळलेच नाही
ती मला पत्थर म्हणाली, काळजाला ठेच आहे
सागराच्या मी किनारी, रोज घरटे बांधणारा
छेडणारी लाट येते, अन् मला भिडतेच आहे
आंधळ्या प्रेमास माझ्या, सापडेना मार्ग काही
ती निघाली हात सोडुन, शल्य मज इतकेच आहे
कान डोळे बंद करने, हे मला जमलेच नाही
टोमण्यांची धूळ येथे, रोज तर उडतेच आहे
ही पुराणातील वांगी, आजही पिकतात येथे
नारदा तू टाक ठिणगी, रान मग जळतेच आहे
रोज देहातून पाझर, वाढतो आहे उन्हाळा
भाकरीचे पीठ कायम, त्यात ती मळतेच आहे
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीमती अनुराधा फाटक
कवितेचा उत्सव
☆ शब्द… ☆ श्रीमती अनुराधा फाटक ☆
शब्द
अंतरीचे धावे स्वभावाबाहेरी
तेव्हा विचारांची लड
उलगडत जाते
शब्द होऊन !
श्वासातील उष्ण वारा
घालतो फुंकर
बनतो शब्द
नकळत !
अंतरीची मुग्ध वाचा
अस्वस्थ होते तेव्हा
फेसाळतो शब्द
उत्स्फूर्त !
© श्रीमती अनुराधा फाटक
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेचा उत्सव
☆ पाखरा, येशील का परतून ? ☆ कवी रेव्हरंड ना.वा.टिळक ☆
(09 मे– कवी रेव्हरंड ना.वा.टिळक स्मृतीदिनानिमित्त)
पाखरा,येशील का परतून ?
मत्प्रेमाने दिल्या खुणांतुन
एक तरी अठवून ? पाखरा !
हवेसवे मिसळल्या माझिया
निःश्वासा वळखून ? पाखरा !
वा-यावरचा तरंग चंचल
जाशिल तू भडकून!पाखरा!
थांब,घेउ दे रूप तुझे हे
हृदयी पूर्ण भरून ! पाखरा!
जन्मवरी मजसवे पहा ही
तव चंचूची खूण!पाखरा !
विसर मला,परि अमर्याद जग
राही नित्य जपून!पाखरा !
ये आता! घे शेवटचे हे
अश्रू दोन पिऊन ! पाखरा !
चित्र साभार – टिळक, नारायण वामन – मराठी विश्वकोश प्रथमावृत्ती (marathi.gov.in)
– कवी रेव्हरंड ना.वा.टिळक
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
महंत कवी राज शास्त्री
हे शब्द अंतरीचे # 80
☆ अभंग… ☆
मोगरा फुलला, विकसित झाला
सहज हासला, मुक्तपणे…०१
बोलला मजला, आनंदी असावे
दु:खीत नसावे, जगतांना…०२
होणारे होईल, वेळ ही संपेल
काहीच नसेल, शेवटाला…०३
जन्म तोच मृत्यू, ठराव जाहला
करार लिहिला, विधात्याने…०४
नका करू शोक, आहे तेच योग्य
निर्मळ सुयोग्य, मानून घ्या…०५
ऐसा हा मोगरा, मजसी वदला
वाऱ्यासवे दिला, संदेश तो…०७
कवी राज म्हणे, सुसंगती करा
निर्भेळ आचरा, दिनचर्या…०८
© कवी म.मुकुंदराज शास्त्री उपाख्य कवी राज शास्त्री.
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री मंजुषा सुनीत मुळे
इंद्रधनुष्य
☆ चैत्र गौरीच्या ओव्या… गीता गद्रे ☆ प्रस्तुती – सुश्री मंजुषा सुनीत मुळे ☆
द्वितीयेची चंद्रकोर नाजुकशी शोभियली,
माझ्या गं अंगणात माहेरवाशिण ती आली.
बांधविला छान झुला, अंगणात सावलीला,
सडा रांगोळी घालून, पानाफूलांनी सजविला.
पाय धुवून प्रवेशली, गौर शुभ पावलांनी,
नाजूक पैंजण जोडवी, कंकणे किणकिणली.
झोपाळ्याला पितळ कड्या, लखलख चमकती,
मऊ रेशमी गालिचा, शोभे त्यावर तो किती.
गौर बसली थाटात, आजुबाजू फूलं माळा,
वस्त्र नाजुक घातले, मोतियांचे सर गळा.
चांदीच्या वाटीत , नैवेद्य नानाविध,
सुगंधित शीतल जल, पन्हे रस सरबत.
सुबक करंज्या मोदक लाडू, पक्वान्ने ती किती,
आंबा द्राक्षे कलिंगड, शोभा वाढविती.
लेक माहेरासी येते, गौरीच्या गं स्वरूपात,
क्षणभर विसावते, करी मायदेशी हितगुज.
सासुरवाशीण माहेरवाशिण, दोन्ही माझ्याच की लेकी,
होई माझे घर गोकुळ, दूध साखर त्यांच्या मुखी.
गौरीच्या आगमने, घर गेले आनंदून,
घर नाचते गाते जणु, लहान बालक होऊन.
गौर नटली जेवली, विसावून तृप्त झाली,
अक्षय तृतीया करून, परतण्या सज्ज झाली.
मनी दाटे हुरहुर, परि रिवाज पाळण्या
सानंदे करा पाठवणी, निरोप पुढल्या वर्षी येण्या.
राहो तुझा आशिर्वाद, नांदो सुख सर्वत्र,
घराघरांत भरून राहो, मंगलमय पावित्र्य.
– सुश्री गीता गद्रे, टिमरनी (म.प्र.)
संग्रहिका – मंजुषा सुनीत मुळे
९८२२८४६७६२
प्रा. सौ. सुमती पवार
कवितेचा उत्सव
☆ गंध अक्षरांचा… ☆ प्रा. सौ. सुमती पवार ☆
आली अक्षरे जीवनी गंध रानीवनी गेला
बंध जुळती रेशमी पांघरला जणू शेला
नाती मुलायम किती जणू प्राजक्त बहरे
अक्षरांशी जडे नाते असे नाजुक गहिरे…
अक्षरांच्या कुंदकळ्या रातराणी बहरते
जाईजुई तावावर अलगद उतरते
कोरांटीची शुभ्र फुले जणू अक्षरे माळते
पिवळी पांढरी शेवंती रोज मला मोहवते ..
दरवळ केवड्याचा माझ्या अक्षरांची कीर्ति
मोतीदाणे झरतात अशी अक्षरांची प्रीती
अनंताचे अनमोल फुल उमलते दारी
रोज घालते जीवन माझ्या अक्षरांची झारी …
लाल कर्दळ बहरे चाफा मनात गहिरा
मांडवावर दारात मधुमालती पहारा
गुलाबाच्या शाईने मी कमलाच्या पानांवर
उतरतात अक्षरे पहा रोज झरझर…
वर्ख शाईने लावते मोती दाणे हिरेमोती
झोपाळ्यावर अंगणी माझी अक्षरेच गाती
बाळगोपाळांच्या मुखी केली अक्षर पेरणी
गंध आला अक्षरांना दरवळली हो गाणी…
काना कोपऱ्यात गेली जणू फुलला पळस
गुलमोहराचा टीळा केशराचा तो कळस
निशिगंध नि मोगरा माझ्या अक्षरांची रास
रोज घालते ओंजळ तुम्हासाठीच हो खास
© प्रा.सौ.सुमती पवार
नाशिक
(९७६३६०५६४२)
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ पारिजात… ☆ श्रीशैल चौगुले ☆
पारिजातावर मन
रेंगाळून रेंगाळून
परिमळ दरवळ
काळजात साकळून.
दव थेंब वळवाचे
कसे भाव चिंबाळून
आभाळात इंद्रधनू
सप्तरंग सांभाळून.
दिरंगाई पाखरांची
घरट्यात हिंदोळून
कलकल हर्षनाद
रानोमाळी बिंबाळून.
सांगूनिया शब्दगुज
वारा वेडा पिसाळून
धरा प्रीत क्षितीजात
पारिजाता कवळून.
© श्रीशैल चौगुले
९६७३०१२०९०
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेचा उत्सव
☆ आणीबाणी… ☆ अनिल (आ.रा.देशपांडे) ☆
अशा काही रात्री गेल्या, ज्यात काळवंडलो असतो
अशा काही वेळा आल्या,होते तसे उरलो नसतो.
वादळ असे भरून आले,तारू भडकणार होते
लाटा अशा घेरत गेल्या,काही सावरणार नव्हते.
हरपून जावे भलतीकडेच,इतके उरले नव्हते भान
करपून गेलो असतो,इतके पेटून आले होते रान.
डाव असे पडत होते की,सारा खेळ उधळून द्यावा
विरस असे झाले होते,जीव पुरा विटून जावा.
कसे निभावून गेलो,कळत नाही,कळत नव्हते
तसे काही जवळ नव्हते,–नुसते हाती हात होते.
– अनिल (आ.रा.देशपांडे)
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ .कल्पना कुंभार
कवितेचा उत्सव
☆ शब्द तुझे… ☆ सौ .कल्पना कुंभार ☆
शब्द तुझे
तुझे शब्द
माझ्या भावना
माझ्या भावना
तुझी कल्पना
तुझी कल्पना
माझी स्वप्ने
माझी स्वप्ने
तुझे आकाश
तुझे आकाश
माझी भरारी
माझी भरारी
तुझी प्रेरणा. .
तुझी प्रेरणा
माझी स्पंदने
माझी स्पंदने
तुझी चेतना
तुझी चेतना
माझा श्वास
माझा श्वास
तुझे हृदय
तुझे हृदय
माझी ओळख
माझी ओळख
तुझे शब्द . .
💞 मनकल्प 💞
© सौ .कल्पना कुंभार
इचलकरंजी
मोबाईल : 9822038378
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
