डॉ.सोनिया कस्तुरे
कवितेचा उत्सव
☆ वय एक आकडा… ☆ डॉ.सोनिया कस्तुरे ☆
सरले किती, मोजू नको,
उरलंय अजून बरंच काही
सरलेल्या गोड आठवणींनी,
उरलेलं गोड करुन घे काही
कौमार्य गेलं असेल शिक्षणात,
अन् भाव-भावंड सांभाळण्यात..!
तारुण्य गेलं नोकरी व्यवसायात
स्वतःला कुटुंबाला उभं करण्यात!
वय केवळ एक आकडा समज ,
मन भरुन जगून घे..!
“लोक काय म्हणतील?”सोडून,
मनाला थोडी मोकळीक दे !
तू शिक्षित वा अशिक्षित स्वतःसाठी
संवेदनाशील होऊन बघ..!
स्वतःशीचा वाद संपवून,
उर्वरीत नियोजन करुन बघ..!
व्रण कधीच आठवू नकोस,
भरलेल्या त्या जखमांचे!
दिवस कधीच साठवू नकोस,
संकटांच्या त्या क्षणांचे ।
हुंदका ही नकोच नको,
सुर्य मावळतीच्या या क्षणी
तो किती तेजस्वी दिसतो,
हेच असू दे तुझ्या मनी..।
काम, क्रोध,लोभ सारे,
निवळून जातील कुठेतरी !
निरव मनाची शांतता,
दाटून येईल तुझ्या अंतरी ।
कोण जाणे पुढचा जन्म,
पशुपक्षी वा माणूस खरा
याच जन्माचा करु सोहळा,
माणूसकीचा ध्यास बरा ।
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
खूपच छान 👌🏻👌🏻