श्रीमती रंजना मधुकरराव लसणे
कवितेचा उत्सव
☆ रंजना जी यांचे साहित्य # 138 – वणव्यात चांदण ☆
☆
तुझ्या हास्यानं रे फुललं वैशाख वणव्यात चांदणं।
विसरले सारे दुःख अन् उघडे पडलेले गोंदणं ।।धृ।।
☆
गेला सोडून रे धनी गेल डोईचं छप्पर।
भरण्या पोटाची गार भटकंती ही दारोदार।
लाभे दैवानेच तुला समजदारीचं देणं।।१।।
☆
कुणी देईना रे काम कशी रे दुनियादारी।
नजरेच्या विषापरी सापाची ही जात बरी।
याला पाहून रे फुले तुझ्या हास्याचं चांदणं।।२।।
☆
रोजचाच नवा गाव रोज तोच नवा खेळ।
दमडी दमडीत रे कसा बसेल जीवनाचा मेळ।
कसा आणू दूध भात कसा आणू रे खेळणं।।३।।
☆
नसे पायात खेटर पायपीट दिसभर।
घेऊ कशी सांग राजा तुला झालरी टोपरं।
करपलं झळांनी या गोजिरं, हे बालपणं।।४।
☆
© रंजना मधुकर लसणे
आखाडा बाळापूर, जिल्हा हिंगोली
9960128105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
