श्रीशैल चौगुले
कवितेचा उत्सव
☆ प्रवासी… ☆ श्रीशैल चौगुले ☆
☆
कोणत्या तीराला
लागते ही नाव
वादळांची वेढ
बेभानले घाव.
*
अंतरी लाटात
हिंदोळतो जीव
दैवाचा घेराव
प्रारब्धाचे डाव.
*
भरोसा कुणाचा
आयुष्य क्षितीज
संघर्ष मनाचा
विश्वासात भाव.
*
पेलूनीया शीड
जीवन सदैव
नाव चाले पुढे
प्रवासी सराव.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सुश्री शोभना आगाशे
वाचताना वेचलेले
☆ सावरकर भारतात अवतरोत पुन्हा… कवी : ह. त्र्यं. देसाई ☆ प्रस्तुती – सुश्री शोभना आगाशे ☆
(२८ मे.. स्वा. सावरकर जयंती – त्यानिमित्त त्यांना आदरांजली)
☆
प्रभु चरणी हिंदु राष्ट्र करित प्रार्थना
सावरकर भारतात अवतरो पुन्हा।। ध्रु।।
*
‘अभिनव भारत’ नामे क्रांती-कारिणी
संघटना निर्मियली देश-व्यापिनी
शत्रूच्या शिबिरातहि ठाण मांडिले
क्रान्तिस्तव देशबंधू तेथ जमविले
करूनि तया शपथ बद्ध योजिले रणी
संगरार्थ शस्त्रात्रे जमविली झणी
संघटन-क्रांतीने राष्ट्र तारण्या
सावरकर भारतात अवतरो पुन्हा।। १।।
*
सत्तावन-वर्षी ना बंड जाहले
स्वातंत्र्यास्तव राष्ट्रे समर लढविले
संशोधन करुनि नवा ग्रंथ निर्मिला
मॅझिनीचा चरित-ग्रंथ तेवि रचयिला
उभय जप्त झाले तरी गुप्त मुद्रिले
सर्वत्रहि युक्तीने धाडुनी दिले
अभिनव भारत वैभवशालि बनविण्या
सावरकर भारतात अवतरो पुन्हा।। २।।
*
त्रस्त आंग्ल सरकारे अटक करुनिया
अंदमान कारागृहि कोंडिले तया
शिक्षा जरि वर्षे पन्नास जाहली
यातनामय भिन्न परी धृति न भंगली
‘कमला’ सम नवकाव्या तेथ रचियले
बंदीजना शिक्षित नी शुद्ध बनविले
हिंदु-बंधु विघटन ते त्वरित रोखण्या
सावरकर भारतात अवतरो पुन्हा।। ३।।
*
रत्नागिरीमाजि स्थलबद्ध जै असे
लेखन भाषण उत्सव विविध करितसे
शुद्धिकार्य सहभोजन करवूनी स्वयें
जाति-भेद निर्मूलन घडविले तये
मंदिरही पतितपावनाख्य उभविले
आणि हिंदु-संघटन-प्रेम निर्मिले
चेतविण्या पुनरपि या हिंदवी जनां
सावरकर भारतात अवतरो पुन्हा।। ४।।
*
हिंदुसभाध्यक्ष बनून राष्ट्र जगविले
झुंजुनिया प्रथम निजामासि नमविले
उत्तेजुनि हिंदूंना सैन्य वर्धिले
त्यायोगे ‘नेताजी’ समर झुंजले
कट पाकिस्तानाचा शिजत पाहुनी
वंग नि पंजाब अर्ध रक्षिला झणी
कर्तव्य न उरता उपवास योजिला
‘आत्मार्पण’ करुनि धन्य धन्य जाहला
देवा! नव देहाने त्यास धाड ना
सावरकर भारतात अवतरो पुन्हा।। ५।।
☆
(त्यांच्याच ‘शतपैलू सावरकर, तिसरी आवृत्ती, या स्वा. सावरकर प्रेमी मंडळ, पुणे यांनी प्रकाशित केलेल्या पुस्तकातून साभार)
रचयिता – ह. त्र्यं. देसाई
प्रस्तुती – सुश्री शोभना आगाशे
सांगली
दूरभाष क्र. ९८५०२२८६५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
जगणे हलाखीचे, मरण सुखाचे!! श्री आशिष बिवलकर ☆
☆
वीतभर खळगीने नाचवले,
अर्धपोटी देह त्यानं पोसला।
निपचित पडला एकटाच,
जगाला आज तो दिसला।
*
आयुष्यभर लक्तरं मिरवली,
आज नवा पांढरा कपडा।
उचलाया लोक दारी आले,
सुखावला गरीबाचा झोपडा।
*
स्वतः स्वतःचा भार ओढला,
आज मिळाले खांदेकरी चार।
निरोपाला जमलीत मंडळी,
निष्प्राण देहाचा उचलाया भार।
*
येड्यागत रित्या खिशाने राहिला,
नाही समजली जगाची जत्रा।
रंक म्हणून जगला आयुष्यभर,
राजावानी खांद्यावर ही अंत्ययात्रा।
*
चुलीत घालाया कधी नव्हती लाकडं,
आज त्याच्यासाठी रचले जगाने सरण।
हसत हसत स्वतःशी पुटपुटला,
हालाखीचे ते जगणे, सुखाचे हे मरण।
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ नदी… ☆ प्रा तुकाराम दादा पाटील ☆
(आत्मजाणिवेची कविता या कविता संग्रहा मधून)
☆
नदी दुथडी भरून आता निघाली माहेरी
काठावरी निरखती झाडं कावरीबावरी //धृ //
*
गच्च भरतेस तेव्हा तुला ओढ भ्रताराची
ससेहोलपट होते तेंव्हा किती माहेराची
नको तोडूस तू ताल नको होवूस नवरी //१//
*
रान पालटत जाते दिस उगवून येतो
ओलसर पुनवेच्या मनी चांदवा रुजतो
नव्या जगण्याच्या साठी होते मनाची तयारी //२//
*
आम्ही शेतकरी साधे तुझ्यावर जडे जीव
तुझ्या कुशीत नांदते देते हुंकार वैभव
बाई तुझ्या गं पाण्यानं आम्हा लाभते उभारी //३//
*
तुझी गाताना थोरवी तुला म्हणतो माऊली
भाव ठेवून अंतरी तुझी पुजाही मांडली
तुझे पिऊन अमृत आम्ही जगतो शिवारी //४//
*
तुझ्या काठी असणारे तुला देवता मानती
तुला माहेरवाशीण म्हणूनिया पुजताती
तुझ्या ओटीभरणाला साडी-चोळी जरतारी //५//
*
अशी नको रोडावूस उन्हातान्हात तापून
हरघडी टाक बाई तुझे पाऊल जपून
माझ्या मनाचे पाखरू झुरे पाणवठ्यावरी //६//
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ राधिका भांडारकर
कवितेचा उत्सव
☆ “पुन्हा एकदा..(लवंगलता)” ☆ सौ राधिका भांडारकर ☆
☆
कुठे हरवला तेव्हाचा तो प्रितीचा रंग सारा
आयुष्याला सोसत नाही रुक्ष कोरडा वारा
*
संवाद नसे शब्द माधुर्य हरवले कसे कोठे
तेव्हा वाटे मौनात बरे.. नसते वादळ मोठे
*
ढग काळे ते दाटले नभी मिटोनि गेले तारे
जलधारांनो तुम्ही आपुले आनंदगीत गारे
*
असा कसा तो गंध गोडवा विरोनि गेला आता
परत एकदा जुळवू आपण बेसुरातला भाता
*
वाटा ओल्या होत्या तेव्हा नरम किनारी वाळू
त्या वाळुतले सदन आपुले वचनांना मग पाळू
*
मावळतीला भास्कर जातो अज्ञानाच्या देशी
निरोप त्याला दोघे देऊ प्रेमस्मृतींच्या वेशी
*
नको दुरावा या वळणाशी त्या नात्यांच्या गाठी
जपूया तशा जशाच होत्या बेधुंद मनासाठी
☆
© सौ. राधिका भांडारकर
ई ८०५ रोहन तरंग, वाकड पुणे ४११०५७
मो. ९४२१५२३६६९
radhikabhandarkar@yahoo.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री सुनीला वैशंपायन
वाचतांना वेचलेले
☆ “ओव्या.. निवृत्तीपूर्वीच्या आणि नंतरच्या…” – कवयित्री : सुश्री अमिता नागले ☆ प्रस्तुती – सुश्री सुनीला वैशंपायन ☆
☆
☆ ओव्या निवृत्तीपूर्वीच्या – – ☆
*
अरे संसार संसार घड्याळाचा झाला गजर
उठा हजेरी द्या आता स्वैपाकाच्या ओट्यावर
*
अरे संसार संसार झाली पहाट पहाट
काम करता करता घेऊ चहा घोट घोट
*
अरे संसार संसार चार जिवांचा विचार
डब्यासाठी काय करू? समस्येचा होई भार
*
अरे संसार संसार सकाळची वेळ छान
शिट्टी कुकरची कानी आणी घड्याळाचे भान
*
अरे संसार संसार कामे आटपली सारी
ओटा पुसता पुसता गिझर मी अॉन करी
*
अरे संसार संसार कावळ्याची अंघोळ होई
आरशात बघण्यास मुळी सुद्धा वेळ नाही
*
अरे संसार संसार पळा पळा लोकल गाठा
जागा मिळताच आत गर्दीतच हुश्श म्हणा
*
अरे संसार संसार बँकी पोचले मी बाई
वेळ सुरू होता होता काउंटरवर माझ्या घाई
*
अरे संसार संसार जेवायला लंच रूम
डब्यांची ती देवघेव आणि हास्याला उधाण
*
अरे संसार संसार निघायची झाली वेळ
पुन्हा गर्दी तीच थोर आणि जीवालागी घोर
*
अरे संसार संसार जाता गाठावा बाजार
मनातील चिंता मोठी रात्रीसाठी करू काय?
*
अरे संसार संसार बसू नये मी निवांत
देवापुढे मात्र नित्य लावायची सांजवात
*
अरे संसार संसार रोजचीच भाजीपोळी
मिळे बदल यातून फक्त एका रविवारी
*
अरे संसार संसार जेवणेही उरकली
आता उघडून पाहू पेपराची पाने दाही
*
अरे संसार संसार झोप डोळ्यात साठली
उद्या काय करू याची चिंता मनात दाटली
*
अरे संसार संसार पाठ गादीला टेकली
डोळ्यामध्ये माझी सारी स्वप्ने कशी झाकोळली
☆
☆ ओव्या निवृत्तीनंतरच्या – – ☆
☆
अरे संसार संसार झाली पहाट पहाट
कानावर पडे माझ्या पाखरांचा किलबिलाट
*
अरे संसार संसार सकाळची वेळ छान
हाती कप चहाचा नी वाची पेपराचे पान
*
अरे संसार संसार घेऊ चला मॉर्निंग वॉक
चालताना करू थोडा व्यायामही झटपट
*
अरे संसार संसार स्वाद घेऊ संगीताचा
आता नाही ऐकू येत कुकरच्या मला हाका
*
अरे संसार संसार न्याहारीस मिळे सवड
गरमागरम इडली चटणी आणि चविष्ट सांबार
*
अरे संसार संसार अंघोळीस वेळच वेळ
देवपूजेसाठी मिळती फुलेपत्री ताटभर
*
अरे संसार संसार लेखन वाचन अपार
आनंदास माझ्या नसे आता मुळी पारावार
*
अरे संसार संसार छंद जोपासावे किती
राहिलेल्या आवडींना आता मिळतसे मुक्ती
*
अरे संसार संसार दुपारची वामकुक्षी
आणितसे माझ्या ठायी उर्जाभरी जीवनशक्ती
*
अरे संसार संसार उन्हे उतरू लागती
छाया लांबता लांबता जगण्यासी अर्थ देती
*
अरे संसार संसार आता उजळूया वाटा
देऊ दान आनंदाचे जगास या जाता जाता
*
अरे संसार संसार संधीप्रकाश दाटला
ज्ञानदीप उजळूया अंधाराच्या वाटेकरिता
*
अरे संसार संसार नाही वाटत लोढणं
आयुष्याच्या वाटेवरचं आहे दैवी ते लावण्य
*
अरे संसार संसार वेळा निरोपाची आली
किंचितही दुःख नसे, नसे किंचितही भिती
*
अरे संसार संसार डोळ्यांतील स्वप्ने सारी
साकारलो म्हणती आता उभी ठाकोनी सामोरी
☆
कवयित्री : सुश्री अमिता नागले
प्रस्तुती : सुश्री सुनीला वैशंपायन
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
पण ओंजळ रितीच… सुश्री नीलांबरी शिर्के ☆
☆
कवठी चाफ्याचा
गंधच भारी
तबकात सजुन
मोबाईलच्या दारी
*
दर्शनमात्रे मन
प्रसन्न होते
गंध हुंगण्या मन
व्याकूळ होते
*
भेटीचे सुख
पाहता मुख
रित्या ओंजळीचे
सलतेच दु:ख….
☆
© सुश्री नीलांबरी शिर्के
मो 8149144177
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीमती उज्ज्वला केळकर
कवितेचा उत्सव
☆ येणे जाणे… ☆ श्रीमती उज्ज्वला केळकर ☆
☆
अवचित येणे असे कसे?
कळत नकळत
नकळत कळत
पर्णा बिलगून स्वप्न हसे
अंगांग व्यापणे आणि कसे?
हरखत निरखत
निरखत हरखत
घन सावन पसरी दाट पिसे
अलगद जाणे काय असे?
उधळत निखळत
निखळत उधळत
टपटपणारी बकुल कुसे
☆
© सौ. उज्ज्वला केळकर
संपर्क – निलगिरी, सी-५ , बिल्डिंग नं २९, ०-३ सेक्टर – ५, सी. बी. डी. – नवी मुंबई , पिन – ४००६१४ महाराष्ट्र
मो. 836 925 2454, email-id – kelkar1234@gmail.com
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
कविराज विजय यशवंत सातपुते
कवितेचा उत्सव # 251 – विजय साहित्य
☆ संमोहन तू..! ☆
☆
प्रेम करुणा,नेत्री भरता,
दिसे सावळा,शाम मुरारी.
नंदलाल हा, पार्थसारथी,
दिव्य कांतीचा, हा गिरिधारी. १
*
कंज लोजनी,अजन्मा तू,
हिरण्यगर्भा,पद्मनाभ तू.
अजया तूची, वासुदेव तू,
रवि लोचनी, विश्व मूर्ती तू.२
*
दहि दुधाचे, संमोहन तू,
तुला आवडे ,साखर लोणी.
तुझ्याच साठी,यमुने काठी,
तुझ्या दर्शना,झुरते कोणी.३
*
दामोदर वा,गोपीनाथ तू,
कृष्ण मुरारी राधा रमणा.
तुला पाहता,भान हरावे,
करीसी लिला,किती मोहना.४
*
मौत्तिक माला,तारावली ही,
रत्न माणके,तडीतप्रभा.
बाहु भुषणे, कर्णकुंडले ,
सालंकृत ही, मुकूट आभा.५
*
पिवळ्या रंगी,साज केशवा,
पारीजातकी, तुझा गोडवा.
कोस्तुभ रत्ने, कंठमणी हा,
दिसे उठोनी, रूप माधवा.६
*
वैजयंतीची, मोहक माला,
मोर पिसांची ,शिरी झळाळी.
अलंकार हे, अंग हरीचे,
जिथे लक्षुमी,चवरी ढाळी.७
*
प्रेम भक्तीचा,झरा खळाळे,
तुझी लागता,चित्ती चाहूल.
स्वर्ग सुखाचा,दिसे आरसा,
जिथे विसावे,कृष्णा पाऊल.८
*
चराचराला,ठेवी बांधून,
यमुना तिरी,कदंब वृक्षी.
कृष्ण विसावा, रम्यस्थळीते,
झुले डहाळी,रेखीत नक्षी.९
*
तुला पाहण्या,तुला ऐकण्या ,
फांदी वरती,बसला रावा .
घाल मोहिनी,मुरली वंशी,
वाजव वेणू,ऐकव पावा.१०
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री शीला पतकी
कवितेचा उत्सव
☆ “शब्दाविण…” ☆ सुश्री शीला पतकी ☆
☆
मी मोगरा माळतो तुला
अन शब्द ओठात घोळतो
शब्द रेंगाळतो जिभेवर
मौन संवाद साधतो//
*
मौन भाषा कळते तुला
अन् तू कवेत घेते मला
स्पर्शही मग शब्द होतो
सारे कसे शब्दावीना//
*
शब्दाविना बोलतात डोळे
भावभाषी प्रेम ते
या ह्रदयाचे त्या ह्रदयाशी
मग संवाद स्पंदन साधते//
*
प्रेमाचा संवाद आगळा
देह सारा बोलतो
शब्दांचे मुकेपण तिथे तरी
भाव संवाद साधतो//
☆
© सुश्री शीला पतकी
माजी मुख्याध्यापिका सेवासदन प्रशाला सोलापूर
मो 8805850279
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
