Tag: #मराठी-कविता

सौ राधिका भांडारकर

 कवितेचा उत्सव 

☆ “पावसाची कविता”… ☆ सौ राधिका भांडारकर ☆

(शुभं करोती  साहित्य परिवार – २ जुलै २०२३)

असा झिम्माड पाऊस

येतो घेऊन वादळ

भेट पहिली आपली

भरे स्मृतींची ओंजळ ..

 

तुला थेंबांची शपथ

नको  विसरूस मला

धाड निरोप सरींना

सखा पाऊस आपला..

 

 पावसाचे थेंब वेडे

मखमली देहावर

 बरसले मुक्तपणे

झाले मन अनावर..

 

 पावसाच्या आठवणी

 कितीतरी मनातल्या

 जेव्हां गळली पागोळ्या

वाट पहात थांबल्या..

 

 असा झिम्माड पाऊस

वय मागे मागे जाते

मन हिरवे होऊन

पुन्हां प्रेम गाणे गाते

© सौ. राधिका भांडारकर

ई ८०५ रोहन तरंग, वाकड पुणे ४११०५७

मो. ९४२१५२३६६९

[email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ विजया कैलास हिरेमठ

 कवितेचा उत्सव 

☆ “असं जगायचं” ☆ सौ विजया कैलास हिरेमठ ☆

कळीसोबत फुलायचं

झाडासोबत बहरायचं

श्वासावर लक्ष देऊन

प्रत्येक क्षणांत जगायचं…

 

नदिसोबत वहायचं

वाऱ्यासोबत रहायचं

पक्ष्यांसोबत गाताना

स्वतः मध्ये पहायचं….

 

पावसासोबत बरसायचं

इंद्रधनूसोबत पसरायचं

चंद्राच्या शीतल छायेत

चांदणी म्हणून चमकायचं…

 

जग खूप सुंदर आहे

एकरूप त्यात व्हायचं

माझ्यातील मला जिवंत ठेवून

निसर्गाशी नातं आपलं टिकवायचं…

 

सुख दुःखाच्या लाटांवर होवून स्वार

आयुष्याची नौका सहज होईल पार

आनंदी जगणे इथे नाही अवघड फार

जे आहे सोबत त्याचे मानावे आभार…

 

जे आहे त्यासोबत जगायला शिकायचं

नाही जे त्याचं दुःख करत नाही बसायचं

आनंदाचे निमित्त आपल्यातच शोधायचं

नव्या आशेसोबत समाधानात जगायचं…

💞शब्दकळी विजया💞

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वृंदा (चित्रा) करमरकर

 कवितेचा उत्सव 

☆ भूगंध… ☆ सुश्री वृंदा (चित्रा) करमरकर ☆

वादळ -वारे पिसाटले

भान विजांचेही सुटले

आभाळ खाली झुकले

रंगूनी झाले करवंदी

 

तडतड तडतड वाजे ताशा

घुमे विजांचा ताल जरासा

कैफ मैफिलीचा हवासा

मेघांची नभी दाटली गर्दी

 

झरझर झरझर धारा झरती

सतारींना हे सूर गवसती

वातलहरी ताल धरती

गाल धरेचे हो जास्वंदी

 

नभ धरणीची अभंग प्रीती

मेघ भरलेले रितेच होती

भूगंध उधळतो नभाप्रती

नभी काळ्या मेघांची गर्दी

 

निराशा गुंडाळे गाशा

पालवल्या हिरव्या आशा

मनी रुजव्याचा तेज कवडसा

सुगीचीच हो आता सद्दी

 

धरती झाली लावण्यवती

कूस तिची हो धन्य झाली

हिरवी स्वप्ने ही अंकुरली

झऱ्यांसंगे खळखळते नदी

© वृंदा (चित्रा) करमरकर

सांगली

मो. 9405555728

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी

 कवितेचा उत्सव 

🤔 असं घडलं असतं तर… 🤔 श्री सुहास सोहोनी ☆

असं घडलं असतं तर …

चित्र थोडं वेगळं असतं …

असं घडलं नसतं तरी …

चित्र वेगळंच दिसलं असतं….!

 

अति श्रीमंती लाभती तर…

कष्टांचं मोल कळलं नसतं …

गरिबी झिम्मा खेळती तर …

भिक्षेचं मोल कळलं असतं …

 

नात्यांचा गुंता नसता तर …

मस्त कलंदर झालोअसतो …

गाणारा बंजारा किंवा …

भटका फकीर झालो असतो …

 

राजकारण चिकटतं तर …

नेता बिलंदर झालो असतो …

सत्ता पैसा हाव प्रतिष्ठा …

यातच गरगरत राहिलो असतो…

 

गुरूमुखातुन जर मिळता तर …

अनुग्रहाचा दैवी लाभ …

समाधिस्थ मग झालो असतो …

बर्फगुहेतिल योगी आज …

 

पण मी जसा आहे …

तसाच मी छान आहे …

गुणावगुणांचा या साऱ्या …

माझ्यात थोडा अंश आहे …

 

श्रीमंत आहे गरीब आहे …

बंजारा तसाच फकीर आहे …

वाडगाभरून सभ्य आहे …

तरी चमचाभर सद् बिलंदर आहे …

 

विश्वात्मका आता मला …

आत्मचिंतनाची लाव गोडी …

बर्फातल्या योगीयाची …

थोडी जुळावी रे जोडी …

🌹

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ पुरस्कृत कविता – 🌞 सौर ऊर्जा… 🌞 सुश्री अरूणा मुल्हेरकर ☆

(वृत्त~पादाकुलक)

नभांतरीचा रविराजा तो

 प्रकाश देतो या विश्वाला

किरण फेकितो प्रखर ऊष्णता

जीवन देतो चराचराला

 

अफाट संख्या प्राण्यांची या

धन सृष्टीचे कसे पुरावे

किरणोत्सर्गा अडवुनि आपण

सोलर ऊर्जा प्राप्त करावे

 

वीज निर्मिती करते ऊर्जा

कृषीवलांना पाणी मिळते

घरोघरी या ऊर्जेवरती

आनंदाचे जीवन जगते

 

या शक्तीचे महत्व आहे

पर्यावरणा रक्षण करते

खर्च एकदा करावा तरी

अवघे जीवन सुसह्य बनते

 

बुद्धीने ह्या मनुजाने तर

असे शोधले पर्यायाला

शक्तीचा या उपयोग करा

निसर्ग साठा जपावयाला

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 वाचताना वेचलेले 

☆  थोडं जगलं पाहिजे…  ☆ प्रस्तुती – सुश्री प्रफुल्ला शेणॉय ☆

आयुष्याच्या अल्बममध्ये

आठवणींचे फोटो असतात,

आणखी एक कॉपी काढायला

निगेटिव्हज् मात्र शिल्लक नसतात.

 

गजर तर रोजचाच आहे

आळसाने झोपले पाहिजे,

गोडसर चहाचा घोट घेत

Tom & Jerry पाहिलं पाहिजे.

 

आंघोळ फक्त दहा मिनिटे?

एखाद्या दिवशी तास घ्या,

आरशासमोर स्वतःला

सुंदर म्हणता आलं पाहिजे.

 

भसाडा का असेना

आपल्याच सुरात रमलं पाहिजे,

वेडेवाकडे अंग हलवत

नाचण सुध्दा जमलं पाहिजे.

 

गीतेचा रस्ता योग्यच आहे

पण एखादा दिवस पाडगावकराना द्या,

रामायण मालिका नैतिक थोर

“बेवॉच” सुध्दा एन्जॉय करता आली पाहिजे.

 

कधी तरी एकटे

उगाचच फिरले पाहिजे,

तलावाच्या काठावर

उताणे पडले पाहिजे.

 

संध्याकाळी मंदिराबरोबरच

बागेत सुध्दा फिरलं पाहिजे,

“फुलपाखराच्या” सौंदर्याला

कधीतरी भुललं पाहिजे.

 

द्यायला कोणी नसलं

म्हणून काय झालं?

एक गजरा विकत घ्या

ओंजळ भरुन फुलांचा नुसता श्वास घ्या.

 

रात्री झोपताना मात्र

दोन मिनिटे देवाला द्या,

एवढया सुंदर जगण्यासाठी

नुसतं थँक्स तरी म्हणा..!!

प्रस्तुती : सुश्री प्रफुल्ला शेणॉय

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

सुश्री नीलांबरी शिर्के

  चित्रकाव्य  

– फक्त नि फक्त आई… –  ☆ सुश्री नीलांबरी शिर्के ☆

☆

झरझर झरती पाऊस  धारा

जवळ कुठेही नसे निवारा 

कावरी बावरी माय जाहली

कसे वाचवू चिमण्या पोरां —

☆

जवळ कुठेही झाड दिसेना

आडोसा टप्प्यात  कुठे ना

 भिजून पोरे आजारी पडतील

 हतबल आई  ,काही सुचेना —

☆

 क्षणात तिने पंख फुगविले

 सर्व  पिलांना पुर्ण  झाकले

मान उंचावू नभा न्याहाळत 

 पाऊसधारांना स्वत:झेलले —

☆

बाईमधल्या आईपणाला

जन्म  कोणता सीमा नसते

पिल्लांसाठी जगताना ती

फक्त  न फक्त आई असते —

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ हव्यास…  ☆ प्रा तुकाराम दादा पाटील ☆

सुखदुःखाची जात कळाया

जरा तरी वनवास हवा

 

जीवन अभिनव जगवायाला

अविरत चालू श्वास हवा

 

या देहाची भूक शमवण्या

अन्नाचा पण घास हवा

 

भाव मनाचा खुलवायाला

गंधाचा मधुमास हवा

 

मनमोराला नाच कराया

अवती भवती भास हवा

 

जीवनसाथी सामर्थ्याचा

निवडायाला खास हवा

 

ज्ञान संपदा अर्पण करण्या

सेवाभावी दास हवा

 

नियोजनाच्या अचूकतेवर

विजय खरा हमखास हवा

 

चंचलतेने अधिर व्हायला

नित्य नवा आभास हवा

 

कृष्ण राधिका जपता जपता

खेळायाला रास हवा

 

प्रसन्न तेने गीत गायला

गीताला अनुप्रास हवा

 

सामर्थ्याचा बहरायाला

जगण्याचा हव्यास हवा

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈