Tag: #मराठी-कविता

सौ. उज्वला सुहास सहस्रबुद्धे

 कवितेचा उत्सव 

☆ अभंग रचना ☆ सौ. उज्वला सुहास सहस्रबुद्धे ☆

गौरीच्या नंदना । तू गजवदना ।

सुखवी सर्वांना । दर्शनाने ।।…. १

पोटाचे हे दोंद । तिथे रुळे सोंड ।

नाव वक्रतुंड । गजानना ।।…. २

मोदक प्रीय तू। लाडू आवडतो ।

मोद तो मिळतो ।आस्वादाने ।।… ३

वाहन तुझे ते ।सान मूषकाचे ।

शोभिवंत साचे । दिसे जनी ।।… ४

सुंदर गुणांचा । बुद्धीचा तू दाता ।

प्रीयच जगता । तुझी मूर्ती ।।…. ५

येतोस या जगी । देतोस आनंद ।

आनंदाचा कंद । गणराय ।।… ६

गजानना तुझे । रुप मनोहर ।

तू तारणहार । भक्तप्रिय ।।… ७

आगमन तुझे । मोद देई सर्वा ।

आनंदाचा ठेवा । जनांसाठी ।।.. ८

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. विद्या वसंत पराडकर

 कवितेचा उत्सव 

💐 माझे विद्यामंदिर 💐 सौ. विद्या वसंत पराडकर ☆

(भारतरत्न राष्ट्रपती डॉ राधाकृष्णन यांच्या वाढदिवसानिमित्त त्यांच्या स्मृतीस विनम्र अभिवादन!)

५ सप्टेंबर शिक्षक दिनानिमित्त सर्व शिक्षकांना शुभेच्छा

निळ्या पांढऱ्या नभाच्या छायेत,

उत्तुंग विद्यामंदिर उभे आहे,

हात जोडुनी, नम्र वाणीने,

भविष्याचे स्वागत करीत आहे ||

भूकाळातील तिचा लाडका,

वर्तमानात अनिमिष नेत्रांनी बघत आहे,

भूतकाळाच्या हिंदोळ्यावर बसून,

आठवणींचे झोके घेत आहे ||

या विद्यामंदिराचे दैवत विद्यार्थी,

गुरुवर्य दैवताचे पुजारी आहे,

दैवत प्रसन्न होऊन, प्राध्यापक इंजिनीयर,

शास्त्रज्ञ न्यायाधीश यांचा प्रसाद देत आहे||

विद्यारुपी उद्यान विविध रंगांनी रंगले आहे,

विविध गंधरुपी फुले फुलली आहे,

पेरली आहेत महत्त्वाकाक्षेची बीजे येथे,

त्याचे आज डौलडार वृक्षे झाली आहेत ||

या विद्यामंदिराने, जीवन शिक्षण दिले,

जणू चौदा विद्यांनी युक्त केले आहे,

उत्तम संस्कारांचे देऊनी लेणे,

माणूस व माणुसकीला जागवले आहे ||

भूतकाळाची तंद्री जाऊन वर्तमानात आलो,

कृतार्थ नजरेने तुझे दर्शन घेत आहे,

गतकाळातील अविस्मरणीय स्मृती,

हृदयाच्या शिंपल्यात मोती बनले आहेत ||

विद्यामंदिराचा मला, सार्थ अभिमान आहे,

मूल्यवान रत्ने, तिच्यापुढे मला फिकी आहे,

कृतज्ञतेच्या नजरेने आसू जमा झाले आहे,

जीवनाची सार्थकता अंतःकरणात जागृत आहे ||

© सौ विद्या वसंत पराडकर

वारजे पुणे.

ई मेल- [email protected]

मो.नंबर – 91-9225337330 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव  

☆ राॅय किणीकर : काही रूबाया ☆ राॅय किणीकर ☆

☆

हा दोन घडीचा तंबूतील रे खेळ

या विदुषकाला नाही रडण्या वेळ

लावून मुखवटे नवा खेळ चल लावू

ठेवून सावल्या पडद्यामागे जाऊ

☆

मी शब्द परंतू मूर्तिमंत तू मौन

मी पंख परंतू क्षितीजशून्य तू गगन

काजळरेघेवर लिहिले गेले काही

(अन)मौनाची फुटली अधरावरती लाही

☆

शहाण्या शब्दांनो हात जोडतो आता

कोषात जाऊनी झोपा मारीत बाता

रस रूप गंध अन स्पर्श पाहुणे आले

घर माझे नाही, त्यांचे आता झाले

☆

जळल्यावर उरते एक शेवटी राख

ती फेक विडी तोंडातील काडी टाक

जळण्यातच आहे गंमत वेड्या मोठी

दिव्यता अमरता मायावी फसवी खोटी

☆

ही भूक शिकविते मागायाला भीक

अन भीती म्हणते गळा काढूनी भूंक

भूक आणि भीती देवाची दैवाची

शिकविते ज्ञातही कोणी अज्ञाताची

☆

का प्रवास म्हणतो टप्पा हा शेवटचा

वर्तुळात फिरतो कोष मध्यबिंदूचा

प्रारंभ नसे ना शेवट या रेषेला

प्रश्नातच असते उत्तर ज्याचे त्याला.

☆

– राॅय किणीकर

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री दीप्ती कुलकर्णी

 कवितेचा उत्सव  

☆ गणेश विनवणी… ☆ सुश्री दीप्ती कुलकर्णी ☆

विनवी तुजला श्री गणराया

अज्ञाना मम दूर कराया ||धृ||

चतुर्थीला रे पूजिती तुजला

श्री गणेशा पावसी सकला

चौदा विद्या, चौसष्ट कला

देशी तू‌ रे, तुज भक्ताला ||१||

गजानना रे मंगल कार्या

निमंत्रिती तुज पूर्ण कराया

हेरंबा रे प्रार्थिती तुजला

वरदहस्त हा द्यावा सकला ||२||

भावभक्तीचे पुष्प अर्पिण्या

अधीर जाहली अवघी‌ काया

मनोभावे वंदन तुजला

लोटांगण रे तुझिया पाया ||३||

© सुश्री दीप्ति कुलकर्णी

कोल्हापूर

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. विद्या वसंत पराडकर

 कवितेचा उत्सव 

🌸 महालक्ष्मी माते… 🌸 सौ. विद्या वसंत पराडकर ☆

हे‌ त्रिभुवन सुंदरी माते

लक्ष,लक्ष प्रणाम तुज करते

जगाच्या पालन कर्त्या ची कांता तू ग

महालक्ष्मी म्हणून ओळख तुझी ग

भाद्रपद मासी सोडून आपले सासर

तीन दिवस जवळ केले माहेर

तव आगमने घरे दारे सजली

प्रसन्नता बघ मुखावर‌आली

नक्षत्रांचे दीप लावूनी अंबर बघ    सजले

मंगल तोरण नभोमडपी विविध रंगी रंगले

कोणती पैठणी तुज नेसवू ग

कोणत्या चोळीने तू खुलशी ग

पायी पैंजण रूणझुण रूणझुण

नथ खुलली सौंदर्य यौवन

जेष्ठा नक्षत्री पूजन करते

ललाट भाळी मळवट भरते

वाहू ‌तुजला पुष्पमाला ग

चमेली, चंपक, जाई जुई ग

सोळा पदार्थांचा नैवैद्य अर्पिते

भाव भक्ती ची निरांजन ओवाळीते

अलौकिक लावण्याने मंत्रमुग्ध होऊ या

दो हस्ताने प्रणाम करून या

तव चरण कमलाचा भ्रमर असे मी

तव पुनः दर्शनाची तृषार्त असे मी 

© सौ विद्या वसंत पराडकर

वारजे पुणे.

ई मेल- [email protected]

मो.नंबर – 91-9225337330 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ कवीश्वर… ☆ सौ. मुग्धा कानिटकर ☆

कवी रचतो सृष्टी

सृष्टी नाम शब्द

शब्द  होई काव्य

काव्य नूतन नित्य

नित्य रंगवी स्वरूप

स्वरूप निनादे स्वर

स्वर करत संकल्प

संकल्प साधत वाङ्मय

वाङ्मय प्रकट वाणी

वाणी  दर्शन ईश्वर

ईश्वर वर्णाकृती जशी

जशी साक्षात चित्रवाणी

चित्रवाणी खेळ प्रकाश

प्रकाश अनंत दिव्य

दिव्य भासे विश्व

विश्व पालक विष्णू

विष्णू  हाच कवीश्वर

विष्णू हाच कवीश्वर

© सौ. मुग्धा कानिटकर

सांगली

फोन 9403726078

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈