Category: कवितेचा उत्सव 2

सौ. सुचित्रा पवार

 कवितेचा उत्सव 

☆ मी शबरी ☆ सौ. सुचित्रा पवार ☆

धन्य मी शबरी भिल्लाची

चरण क्षाळीते श्रीरामाची

 

झाडलोट करुनी कुटीची

वाट सुशोभित आगमनाची

नाजूक चरणे प्रभूंची

चरण क्षाळीते श्रीरामाची

 

वनमाळांची घेऊनिया परडी

कंदमुळांची चाखून गोडी

भेट साधीच अर्पायाची

चरण  क्षाळीते श्रीरामाची

 

चव उष्टावल्या बोरांची

माला सुगंधी पुष्पांची

मज न ठावे आवड देवाची

चरण क्षाळीते श्रीरामाची

 

युगेनयुगे वाट पाहून प्रभूची

थकली कुडी शबरीची

आस एकच प्रभुभेटीची

क्षाळीते चरण श्रीरामाची

 

नको मज देवा काही आता

पावन कर झोपडी जाता जाता

विनंती भोळ्या शबरीची

क्षाळीते चरण श्रीरामाची

धन्य मी शबरी भिल्लाची

 

© सौ.सुचित्रा पवार 

तासगाव, सांगली

8055690240

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री अशोक श्रीपाद भांबुरे

अजूनी माळरानातच, तुझा दरवळ कसा आहे

असे ही वाट काट्यांची, तनाचा छळ कसा आहे

 

जरी पाषाण हृदयी तो, तरी पाझर मनी त्याच्या

झऱ्याला अमृताच्या या, म्हणू कातळ कसा आहे

 

गळाचा पाहुनी गांडुळ, गळा तो फाडतो मासा

फणा काढून बसलेला, कळेना गळ कसा आहे

 

मला सोडून तू गेला, तुला विसरून मी गेले

तरीही काळजावरती, ठळकसा वळ कसा आहे

 

अजूनी यौवनातच मी, असा तो वागतो वेडा

वयाची उलटली साठी, तरीही चळ कसा आहे

 

छडीचा मार पाठीवर, तरी हा बोलतो सुंदर

विचारा गोंधळ्याला त्या, तुझा संबळ कसा आहे

 

विवाहाचे गणित साधे, विचारा प्रेम वेड्यांना

कधी ना पाहिला त्यांनी, तिचा मंगळ कसा आहे

 

© अशोक श्रीपाद भांबुरे

धनकवडी, पुणे ४११ ०४३.

[email protected]

मो. ८१८००४२५०६, ९८२२८८२०२८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

प्रेमावर जगते जगणे

ओठावर फुलते हसणे

 

मी माझे माझे म्हणता

म्हणताना होते फसणे

 

डोळ्याच्या धारा ठरती

दु:खाला पाझर फुटणे

 

मन कातर कातर होता

वाट्याला येते हरणे

 

अपमानी वर्तन ठरते

क्रोधाला जागे करणे

 

सगळ्यांना दिसते कळते

मोलाचे नकली रडणे

 

हरल्यावर नक्की असते

वै-याच्या हाती पडणे

 

त्यागाची दुसरी बाजू

विरहाने नुसते झुरणे

 

चुकल्यावर खंत करावी

जगण्यावर कसले रुसणे?

 

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

महंत कवी राज शास्त्री

  साप्ताहिक स्तम्भ – हे शब्द अंतरीचे # 57  

☆ प्रेम… ☆

प्रेम आंधळं असतं

म्हणायला सोप्प जातं

झाल्यावर मात्र

गोड सुद्धा कडू लागतं…०१

 

प्रेम आंधळं असतं

ते कुठे ही होतं

काळी गोरी बोबडी

प्रेम मानत नसतं…०२

 

प्रेम आंधळं असतं

हे कसं पटवायचं

घरच्यांसमोर सांगा

सामोरं कसं जायचं…०३

 

प्रेम आंधळं असतं

पुरावे आहेत बारा

तरी सुद्धा पहा हो

नाही होत कमी तोरा…०४

 

प्रेम आंधळं असतं

नाही कधी करायचं

पण प्रेम होऊनच जातं

अलिप्त कसं रहायचं…०५

 

प्रेम आंधळं असतं

गणित खूप कठीण प्रेमाचं

भले भले इथे शूर थकले

न उलगडे कोडं प्रेमाचं…०६

 

माझे चित्त तुला अर्पण

मीरा वदली कान्हाला

विष पिऊन दिला दाखला

प्रेमाचा असा बोलबाला…

 

© कवी म.मुकुंदराज शास्त्री उपाख्य कवी राज शास्त्री.

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीशैल चौगुले

 कवितेचा उत्सव 

☆ राधेमन…. ☆ श्रीशैल चौगुले ☆

(छंदवृत्तः स्त्रग्विनी)

मोर माझ्या मनी नाचता लाज ही

श्रीकृष्णाची जिवा ओढ जी आज ही.

 

बासरी ऐकता यमुन काठावरी

भानही हरपले विसरुनी साजही.

 

सांज ही दाटली मन कसे धुंदले

धावले मीच वृंदावनात गुजही.

 

राधिका भाबडी वेड का शामचे

रासलीला कि प्रेमभक्तभावन सई.

 

अंतरी नाम ध्यास मुरली धरल हा

तोच सावळ नटखट कृष्ण जो देवही.

 

© श्रीशैल चौगुले

९६७३०१२०९०

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री मुबारक उमराणी

 कवितेचा उत्सव 

☆ सूर… ☆ श्री मुबारक उमराणी ☆

आता नाय, मग नाय

असं म्हणून चालेल काय ?

 

खर काय? खोटं काय ?

बोलून एकदा टाक बाय

 

ओढी पाय ,होतं काय

दुसरं आम्हा येतंय काय?

 

याला फसव, त्याला फसव

याच्या शिवाय केलंय काय?

 

करी चाडी, भरी माडी

न भरणारी झाली वेडी

 

सत्यालाच डांबर पुस

खोटी फुस घरात घूस

 

माणूस कात्रून केल्या चिंध्या

झाडाच्याही खाल्ल्या फांद्या

 

बदनाम करुन पार बेडा

असत्याच्या तोंडात पेढा

 

याला पिडा, त्याला पिडा

खात फिरे पान विडा

 

रस्ता झाला पीकदाणी

अभद्र बोले याची वाणी

 

इथं फेक, तिथं फेक

वाढ दिनी मोठा केक

 

शब्दात धार करी गार

याच्याच गळ्यात घाली हार

 

सगळेच म्हणे चूक चूक

शहाणा आता झाला मुक

 

इथं पार्टी, तिथं पार्टी

वेडी झाली सारी कार्टी

 

दारु पूर, सोडी घुर

शहाणाही पळे दूर

 

मारून ठोसा, बदला नुर

सत्याचा ऐकू येईल सूर

 

© श्री मुबारक उमराणी

शामरावनगर, सांगली

मो.९७६६०८१०९७.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

श्री राजकुमार दत्तात्रय कवठेकर

 कवितेचा उत्सव 

☆ वेड…. ☆ श्री राजकुमार कवठेकर ☆

तुझ्या प्रीतीमुळे हेही, घडाया लागले आता

मला ही प्रेम गे माझे, मिळाया लागले आता

 

कसे या  वेड पाचोळ्यास लागे र्भिभिरायाचे

मनी ते वादळांसाठी झुराया लागले आता

 

मला ग्रीष्मातही या पावसाने चिंबसे केले

तुझे ते भेटणे जेंव्हा, स्मराया लागले आता

 

तुझ्याशी बोलताना शब्द जेंव्हा टाळले काही

कळाले वेगळे नाते,  जडाया लागले आता

 

जरा मागीतला होता, उठाया हात मी त्यांचा

कडेने ओळखीचेही, पळाया लागले आता

 

जगाची रीत ‘ही ‘जेंव्हा, आचरू लागलो मीही

जगाशी याच माझेही, जमाया लागले आता

 

लपायाच्या दडायाच्या जश्या का पाडल्या भींती

पणानी प्राण हे माझे, लढाया लागले आता

 

कुणाचे कोणही नाही, स्मशानी हे कळू येते

शवानी पेट घेता ‘ते’, वळाया लागले आता

 

रडायाचा जुना त्यांचा, असे रे शौक बाजारू

सुखांनी नाहताना ते, कण्हाया लागले आता

 

जरी ना माणसांना या, यशाची कौतुके माझ्या

तरूंचे चौघडे रानी, झडाया लागले आता

                  ***

© श्री राजकुमार दत्तात्रय कवठेकर

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री सुहास रघुनाथ पंडित

 कवितेचा उत्सव 

☆ मोगरा ☆ श्री सुहास रघुनाथ पंडित ☆

मोग-याची चार फुले

तुला देण्यासाठी आलो

धुंद तुझ्या सहवासे

सारे काही विसरलो

 

फुले तशीच खिशात

जरी गेली कोमेजून

तुझ्या कालच्या भेटीत

गंधारले माझे मन.

© श्री सुहास रघुनाथ पंडित

सांगली (महाराष्ट्र)

मो – 9421225491

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

 कवितेचा उत्सव 

☆ मुक्तिसूक्त.. ☆ श्री हरिश्चंद्र कोठावदे ☆ 

(वृत्त : पादाकुलक)

घमघमले हे कुठून अत्तर

कुठून आला गंध चंदनी

सडा अंगणी स्फटिकशुभ्रसा

शिंपित आली कोण चांदणी ?

 

दूर राउळी घणघण घंटा

नाद निनादे चराचरातुन

पार दिशांच्या आर्त प्रार्थना

भिजवी मजला कवेत घेवुन !

कशा अचानक पेटुन उठल्या

मिणमिण पणत्या नक्षत्रांसम

रुजले कंठी अभाळगाणे

दिव्य सुरांची रिमझिम रिमझिम !

 

अगम्य भवती धुके दाटले

धरा कोणती,कुठले अंबर ?

शोधित होतो ज्या सत्याला

स्वप्नाहुन ते दिसले सुंदर !

खळखळ तुटल्या कशा शृंखला

मुक्तिसूक्त ये अवचित कंठी

पल्याड माझ्या मीच पोचलो

सात सागरा माझ्या भरती !

 

© श्री हरिश्चंद्र कोठावदे

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈