Category: कवितेचा उत्सव 2

श्री सुजित कदम

 कवितेचा उत्सव 

☆ सुजित साहित्य # 145 ☆ आठवांच्या आसवांनी…! ☆ श्री सुजित कदम ☆

आभाळालाही असते तुझ्या पदराची ओढ

जरी असला अंथाग तरी ममता अजोड..!

ओठी जेव्हा पहिलाच शब्द आई अंकुरतो

आईलाही तेव्हा तिचा शब्द आई आठवतो..!

आई शब्दात असतो माया ममतेचा झरा

आई शब्दानेच होतो वेदनेचा अंत सारा..!

जात्यावरची ही ओवी त्यात नशीबाच गाणं

काळ्या आईच्या कुशीत आई पेरते बियाण..!

आई स्नेहाची साऊली घाली मायेची पाखर

तिच्या साऊलीत मिळे रोज प्रेमाची भाकर..!

देवळात गेल्यावर लीन जाहलो भक्तीने

असो आई माझी सुखी देवा मागतो मागणे..!

आई विना आयुष्यची झाली आहे परवड

संकटाची रोजनिशी रोज नवी धडपड..!

तुच माझी जिजाविठा आहे तुलाच कदर

आठवाच्या आसवांनी तुझा भिजला पदर…!

©  सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री ज्योत्स्ना तानवडे

  चित्रकाव्य  

– शाम मोहिनी – ☆ सुश्री ज्योत्स्ना तानवडे ☆

☆

कुंजवनात कदंबाला

झोका सुरेख झुलतसे

राधामोहन भावमग्न

देखणे चित्र शोभतसे ||

☆

झुल्यावरती कान्हासंगे

झुलते तल्लीन होऊनी

सावळ्यात सामावताना

घेतले नयन मिटुनी ||

☆

लोकलज्जा तुटले बंध

कृष्णप्रीती जडली बाधा

सर्वस्वाने एकरूपता

विसरली ‘मी’ पण राधा ||

☆

कृष्णमय होऊनी राधा

भान विसरुनी जगते

पूर्वजन्मीच्या पुण्याइने

अद्वैत प्रीतीत रमते ||

☆

चित्र साभार – सौ.ज्योत्स्ना तानवडे

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

एक होती जात आणिक धर्म नाही वेगळे

काल माझे गाव केवळ पेटले द्वेषामुळे

☆

कोण अपुले कोण परके हे कळाले पाहिजे

वैर सारे या पुढे आता जळाले पाहिजे

☆

झाड त्यांनी लावलेले खोल ही पाळेमुळे

काल माझे गाव केवळ पेटले द्वेषामुळे

☆

धर्म जाती सोडुनी या एक होऊ सर्वथा

माणसांना तोडणा-या टाकुनी देऊ प्रथा

☆

या ,स्वतःची शान राखू थांबवू ही वादळे

काल माझे गाव केवळ पेटले द्वेषामुळे

☆

दीनबंधू जाहले जे भाग्य त्यांचे थोरले

अल्पस्वल्पच लोक,कोणी वीष येथे पेरले

☆

गौर कोणी,कृष्ण कोणी,कोण होते सावळे

काल माझे गाव केवळ पेटले द्वेषामुळे

☆

प्रेमभावानेच येथे माणसाने वागणे

हेच माझे ध्येय आणिक हेच माझे सांगणे

☆

कळत आहे सर्व काही परि तयांना ना वळे

काल माझे गाव केवळ पेटले द्वेषामुळे

☆

© प्रभा सोनवणे

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 172

☆ स्वामित्व…  ☆

हे विश्व तुझ्या बापाचे नव्हते आणिक नाही

स्वामित्व तुला देहाचे नव्हते आणिक नाही

अंगावर साधी तेव्हा लंगोटीही नव्हती

काहीच तुझ्या नावाचे नव्हते आणिक नाही

स्वामित्व जरी मुंग्यांचे नाग डसत हे होते

वारूळ कधी सापाचे नव्हते आणिक नाही

हे आप्त निघाले वैरी मात मिळाली म्हणुनी

हे राज्य इथे दुबळ्यांचे नव्हते आणिक नाही

सत्तेसाठी नाही ते रयतेसाठी लढले

हे राज्य इथे जाचाचे नव्हते आणिक नाही

शृंगार करूनी बसली नजरा वाटेवरती

काहीच तशा अर्थाचे नव्हते आणिक नाही

देहास निघाला घेउन एकटाच यात्रेला

कोणीच तुझ्या गावाचे नव्हते आणिक नाही

© अशोक श्रीपाद भांबुरे

महंत कवी राज शास्त्री

  हे शब्द अंतरीचे # 114  

☆ वेदनेच्या कविता… ☆

वेदनेच्या ह्या कविता सांगू कशा 

मूक झाली भावना ही महादशा..धृ

अश्रू डोळ्यांतील संपून गेले पहा 

स्पंदने हृदयाची थांबून गेली पहा 

आक्रोश मी कसा करावा, कळेना हा.. १

नाते-गोते आप्त सारे विखुरले 

रक्ताचे ते पाणी झाले आटले 

मंद मंद मृत शांत भावना.. २

ऐसे कैसे दिस आले, सांगा इथे 

कीव ना इतुकी कुणाला काहो इथे 

आंधळे हे विश्व अवघे भासे इथे.. ३

सांगणे इतुकेच माझे आता गडे 

अंध ह्या चालीरीतीला पाडा तडे 

राज कवीचे शब्द आता तोकडे.. ४

© कवी म.मुकुंदराज शास्त्री उपाख्य कवी राज शास्त्री

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈