Category: कवितेचा उत्सव 2

सुश्री दीप्ती कुलकर्णी

 कवितेचा उत्सव 

☆ वसंतोत्सव… ☆ सुश्री दीप्ती कुलकर्णी ☆

नवचैतन्ये वसंत नटला

तरुवेलींचा सुगंध सुटला ||धृ ||

      ‌ बहावा तरी सुंदर सजला

       पर्णपाचुतुनी बहरु लागला

       पीतफुलांनी डोलत सुटला

       पांथस्थांना खुणवु लागला ||१||

गुलमोहराच्या पायघड्यांनी

रस्ता सारा मखमली बनला

रक्तवर्ण हा तळपु लागला

ग्रीष्मासंगे फुलुनी आला ||२||

       पळस,पांगिरा,फुलांनी नटला

       हिरव्या कोंदणी ,ठसा उमटला

       मनासी वेधत,खुलवु लागला

       संगतीने ग्रीष्मात हरवला ||३||

आम्रतरुही मोहरुनी आला

कैरीफळांचे तोरण ल्यायला

कोकिळ कूजनी रंगुनी गेला

आमराईचे भूषण बनला ||४||

© सुश्री दीप्ती कोदंड कुलकर्णी

कोल्हापूर.

भ्र.९५५२४४८४६१

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. जयश्री पाटील

 कवितेच्या उत्सव 

☆ रूप ग्रीष्माचे… ☆ सौ. जयश्री पाटील ☆

चैत्र वैशाख महिन्यात

सूर्याची प्रखर उष्णता

रात्र छोटी दिवस मोठा

ग्रीष्माची चाहूल लागता

आग ओकतो नारायण

वाढे पृथ्वीचे तापमान

झळा घेऊनी येतो वारा

ग्रीष्माचे होता आगमन

रंगीत फुलांचे ताटवे

सुगंधाचा दरवळ

कोवळी पालवी फुटते

कुहू कुहू गातो कोकिळ

आम्रतरू मोहरतात

गुलमोहर बहरतो

देतात सावली थंडावा

अंगणी मोगरा फुलतो

ग्रीष्माचे रूप मनोहर

येतो रंगीत रूप घेऊन

रणरणत्या उन्हातही

पावसाची आस ठेवून

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ चिऊ… ☆ सौ. मुग्धा कानिटकर ☆

चिमुकली  ती चिऊताई

झेपावते खिडकीपाशी

इकडे तिकडे बघे क्षणभरी

मारून चोच मला खुणवी

थोडे दुर्लक्ष माझे जरी

जवळ मारते उड्या भारी

कामात गर्क मीअसे जरी

हळूच छान चिवचिव करी

येई  क्षणात झाडावरूनी

घेत भरारी येई परतूनी

तिला भिती खुप गोंगाटाची

मात्र स्वच्छतेवर  अतिप्रिती

पिते उन्हात नळातील पाणी

सुंदर प्रतिबिंब मजेत पाही

दाणे टिपून घेत भर्रदिशी

पकडते नाजूक फांदी

लपतछपत पानोपानी

माझ्या भोवती घाले घिरटी

तिचे येणे असे दिवसाकाठी

आनंदाचा झरा माझ्यासाठी

© सौ. मुग्धा कानिटकर

सांगली

फोन 9403726078

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. मंजुषा सुधीर आफळे

 कवितेचा उत्सव 

☆ वास्तु देव… ☆ सौ.मंजुषा सुधीर आफळे ☆

दिस आज, दीन झाले

उदास मी, हा तिष्ठतो

रिकाम्या घराचे ओझे

ओणव्याने रे सोसतो

शेतीवाडी टाकून तू

कुठे बरे, विसावला?

वास्तुपुरुष मी, माझा

संग तू कसा सोडला?

खरे तुझे, दारिद्र्य हे

इथे आज पसरले

लक्ष्मी, सरस्वती अशी

रुसली ते, बिनसले.

कर तयांची प्रार्थना

ज्ञानाची धरून कास

कृपा करी अन्नपूर्णा

मनी असावा विश्वास

आहे मी, इथेच असा

प्राण आणून डोळ्यांत

परतुनी ये मानवा

खरा मोद, निसर्गात

पुन्हा एकदा होऊ दे

गोकुळ आपले घर

कोकणात चैतन्याची

एकवार येवो सर

आंबा, सुपारी, फणस

माड, भात, काजूगर

शिवार, सडा फुलू दे

वाडीत दशावतार

हसावी, लाट किनारी

फेर धरी रे नाखवा

मातीच ती कोकणाची

धाडेल, तुला सांगावा.

© सौ.मंजुषा सुधीर आफळे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

 कवितेचा उत्सव 

☆ झेप… ☆ सुश्री प्रणिता प्रशांत खंडकर ☆

बीज रूजले वाढले, मऊ गर्भाचे अस्तर ,

खुडण्याच्या भीतीने का क्षणोक्षणी ती अस्वस्थ.

जन्मा आली लेक जरी, तरी जगणं दुष्कर ,

तूप वंशाच्या दिव्याला, हिला कोरडी भाकर. ||१||

लज्जेची नि पावित्र्याची, हिने राखायची चाड,

लांडग्यांच्या नजरेला,नको पडायला नख,

झाकायचे तन सारे, जरी गुदमरे श्वास,

डोक्यावर टांगलेली, बदनामीची तलवार. ||२||

वाढताना पित्याघरी, लेक परक्याचे धन,

वरदक्षिणा देऊनी, करायाचे कन्यादान.

माय उठता-बसता, घाली सासरचा धाक,

सांभाळीसी परंपरा, नको ओलांडू तू वेस. ||३||

सून सासरच्या घरी, दावणीला मूक गाय,

रांधा, वाढा, उष्टी काढा, हेच जीवनाचं सार.

शेज पतीची सांभाळी, वाढविण्या त्याचा वंश,

तोच कुंकवाचा धनी, त्याचा शब्दच प्रमाण. ||४||

कोसळल्या भिंती आता, खुले ज्ञानाचे कवाड,

कायद्याच्या कचाट्यात, भ्रूणहत्येचे राक्षस.

तिच्या कर्तृत्वाला आता, नाही क्षेत्राचे बंधन,

करितसे राज्यघटना, तिच्या हक्कांचे रक्षण. ||५||

समानतेच्या विचारा, रूजवू मुला-मुलींत,

हात घालणार नाही, कोणी,  द्रौपदीच्या निरीस.

मानवतेच्या धर्माला, सह्रदयतेची जोड,

ज्योत ‘तिच्या’ सन्मानाची, संस्काराने उजळवूयात.

© सुश्री प्रणिता खंडकर

सध्या वास्तव्य… डोंबिवली, जि. ठाणे.

वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈