Category: कवितेचा उत्सव 2

सुश्री गायत्री हेर्लेकर

 कवितेचा उत्सव 

☆ आधुनिक ओव्या– ☆ सुश्री गायत्री हेर्लेकर ☆

अरे  न्याहारी ,न्याहारी —

ठेवा पॅन गॅसवरी–

भाजी,लोणी ,चटणी–

पसरा ग—डोश्यावरी  ||१||

 

सुंदर माझा मिक्सर ग–

शोभतो– ओट्यावर,

पीठ रुबते भराभर–

वडा ईडली वरचे वर  ||२||

 

लाडका ग माझा फ्रीज,–

जसा राधेचा ग कान्हा,

ग्रेव्ही करुन एकदा,–

करते भाजी पुन्हा पुन्हा ||३||

 

ओव्हनची ग माझ्या–

कथा आहे न्यारी न्यारी,

त्याच्या कुशीत फुलते —

बिस्किट केकवरची चेरी ||४||

 

चैत्री सजली चैत्रगौरी–

श्रावणात मंगळागौरी,

आता करु पुरणपोळी —

 गणराया संगे आली गौरी ||५||

 

स्क्रीनपुढे सदा असतो–

लाडका ग बाळ माझा,

खायला न दुजे मागे–

देता मॅगी ,बर्गर, पिझा ||६||

 

लेक माझी ग लाडकी —

शिकाया दुरदेशी,

डोळा  का ग येते पाणी–

विडीयो कॉल रात्रंदिशी ||७||

 

माझ्या ग अंगणी—

ऊभी स्कुटर देखणी,

फिरते मी तिच्या संगे–

सखी माझी ग साजणी ||८||

 

हॉल सजला सजला–

टी,व्ही. मोठा भिंतीवर,

मालिकेतली भांडणे —

मौने पाहे घरदार ||९||

 

मन कंटाळे कंटाळे–

विसरले राम नाम,

हाती असता मोबाईल–

कसे करु कामधाम ?||१०||

 

मागे गेले नऊवार–

नको झाले सहावार,

नानाविध कुडत्यांसंगे–

पुरते एक सलवार ||११||

 

फ्लॅटमघला ग फ्लॅट–

हव्या बेडरुम तीन,

फुलवेन टेरेसवर —

जाईजुई ग मी छान ||१२||

 

© सुश्री गायत्री हेर्लेकर

201, अवनीश अपार्टमेंट, कोथरुड, पुणे.

दुरध्वनी – 9403862565

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

श्री सुहास सोहोनी

 कवितेचा उत्सव 

☆ प्राणायाम… ☆ श्री सुहास सोहोनी ☆ 

श्वास हिणवतो निश्वासाला

कनिष्ठ तू, मी श्रेष्ठ,

जीवनदायी, सत्वशील मी

प्रदूषीत तू भ्रष्ट — ॥

 

सात्विक, तेजस रुपडे माझे

शुद्ध नि जीवनदायी

श्वास खिजवितो निश्वासाला

तू तर धोकादायी —॥

 

प्राणवायु आधार जिवांचा

माझ्यातुन वाहतो

कर्ब विखारी दूषित तूझा

जीवांना संपवितो — ॥

 

श्वासाचे  वक्तव्य ऐकुनी

झाला अवमानित

जळफळतो निश्वास, करोनी

मुद्रा क्रोधीत — ॥

 

रागाने मग निश्वासाने

चढवुनिया आवाज

दिधले प्रत्युत्तर श्वासाला

चढला तुजला माज — ॥

 

जाइन ना बाहेर यापुढे

निश्चय करतो पक्का

दार बंद तूज, तुला न आता

आत यावया मोका — ॥

 

श्वास तसे निश्वास जाहले

ठप्प जेथल्या तेथे

शरिर तळमळे, प्राण विव्हळे

जीव घुटमळे जेथे — ॥

 

एकच मग कल्लोळ उडाला

विश्वी, तीन्ही लोकी

सूर्य चंद्र अन् इंद्रहि स्वर्गी

भीतीने कांपती — ॥

 

कलह मिटविण्या अवतरला मग

ब्रह्मदेव साक्षात

नाण्याच्या दो बाजू तुम्ही

भांडत बसलात — ॥

 

लहान मोठे बंधू तुम्ही

छापा कांटा जसे

तुमच्या मधील नाणे तुमचा

मधला भाऊ असे — ॥

 

जाणे-येणे, येणे-जाणे

काही क्षण मध्येच थांबणे

कर्तव्यासी करा साधुनी

अखंड आवर्तने — ॥

 

प्राणवायु तू घेउन येसी

नाम तुझे पूरक

कोंडुन धरिसी श्वास रोखुनी

नाम तुझे कुंभक

सर्व अशुद्धे फेकुन देसी

नाम तुझे रेचक

तुमच्या एकोप्याच्या मधुनी

जन्मतील ‘साधक’ — ॥

 

पूरक कुंभक रेचक यांचे

कथिले रामायण

रोज करावी क्रिया अशी जिस

म्हणती ‘प्राणायाम’ — ॥

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

 कवितेचा उत्सव 

☆ ऐन थंडीत… ☆ श्रीमती उज्ज्वला केळकर ☆

या आश्वस्त वृक्षांनीच

विश्वासघात केला आमचा

ऐन थंडीत.

आसरा अव्हेरणं

त्यांना अशक्य झालं,

तेव्हा त्यांनी

विटा काढून घेतल्या

आपल्या घराच्या भिंतींच्या

आता उघडे पडलेले आम्ही

वाट बघतोय

पिसे झडण्याची

किंवा

कुणा शिका-याच्या

मर्मभेदी बाणाची

……………….

© श्रीमती उज्ज्वला केळकर

संपर्क -17 16/2 ‘गायत्री’ प्लॉट नं. 12, वसंत दादा साखर कामगारभावन के पास , सांगली 416416 महाराष्ट्र

मो. 9403310170, email-id – [email protected] 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ रुसले ऋतू… ☆ श्री रवींद्र सोनावणी ☆

उठ मानवा उठ तुझ्यावर रुसून बसला ऋतू

पहा आठवून अशी कोणती केलीस आगळीक तू

 

कळ्या फुलांची मधुर फळांची केली तुजवर वर्षा

दंडित मंडित केलीस सृष्टी काय तुझी ही तृषा

 

इर्षा होती तुझ्या मनासी सृष्टीला या करू गुलाम

गगनाला ही लगाम घालू करतील तारे तुला सलाम

 

का नियतीला दावितोस तू विज्ञानाचा ताठा

तव गर्वाने विराण झाल्या हिरव्या पाऊल वाटा

 

गर्जतील ना मेघ नभातून नृत्य ना करतील मोर वनातून

शेतमळे ना पिकतील आता उतरलास तू सृष्टीच्या मनातून

 

झटपट श्रीमंती सुखसोयी म्हणजे नोहे खरा विकास

हव्यासाच्या पाईच तुझिया वसुंधरा जाहली भकास

 

जे देवाने दिले भरभरून त्याचा नीट करी सांभाळ

विनम्र हो तू नियती पुढती सौख्याचा होईल सुकाळ

 

सगळे काही मानवनिर्मित दे सोडून ही दर्पोक्ती

या गगनातून आनंदाचे मेघ बरसतील तुज वरती

 

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री शोभना आगाशे

 कवितेचा उत्सव 

☆ सावळ्या… ☆ सुश्री शोभना आगाशे ☆

तुझिया मागुनि, येईन त्यागुनि

निरर्थ या तनुला

सावळ्या नेशील का रे मला॥

 

प्रथम भेट तव बालपणीची

खोडी काढिसी गोपगोपींची

चोरी करिसी नवनीताची

विश्व दाविसी तुझ्या मुखातुनि

माय यशोदेला

सावळ्या नेशील का रे मला॥

 

चाहुल येता तारुण्याची

हुरहुर लावी धुन मुरलीची

अमूर्त मूर्ती तव रूपाची

वाटे येशील घन मेघातुनि

भिजवशील मजला

सावळ्या नेशील का रे मला॥

 

ऊन सावली संसाराची

आस नुरे मग तुझ्या भेटीची

कसरत असुनि तारेवरची

लिप्त जिवाला त्यातच करुनि

विसरुनि जाई तुला

सावळ्या नेशील का रे मला॥

 

ओढ लागता पैलतीराची

वेणुरवाची, तव भासाची

अता विनवणी ही शेवटची

वक्षी तुझ्या घे मला कवळुनि

जवळुनि पाहीन तुला

सावळ्या नेशील का रे मला॥

 

क्षण अखेरचे वेळ भेटीची

क्षितिजा नक्षी मोरपिसाची

कारुण्य पाझरे ओळ ढगांची

अनंग तुझिया अंगांगातुनि

वेढशील का मला

सावळ्या नेशील का रे मला॥

 

तुझिया मागुनि, येईन त्यागुनि

निरर्थ या तनुला

सावळ्या नेशील का रे मला॥

© सुश्री शोभना आगाशे

सांगली 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. नेहा लिंबकर

 कवितेचा उत्सव 

☆ गंध… ☆ सौ. नेहा लिंबकर ☆

गंध मोगऱ्याचा, चाफ्याचा,  गुलाबाचा 

मंद  मंद त्या वासाचा

 

गंध मृदगंधाचा, पावसाच्या सरींचा

गंधाळलेलया धुंद वार्‍याचा

 

गंध पराक्रमाचा,  वीरांचा

इतिहासाचे क्षण  जपण्याचा

 

गंध कोऱ्या करकरीत पुस्तकांचा

वाचनाने समृद्ध होण्याचा

 

गंध आजीच्या गोधडीचा

उबदार मायेत लपेटण्याचा

 

गंध आईच्या ममत्वाचा

कधीच न संपणाऱ्या मायेचा

 

गंध सप्त सुरांच्या मैफिलीचा

मंत्र मुग्ध श्रवण भक्तीचा

 

गंध उपासनेचा,  पूजेचा

निर्गुणा पर्यंतच्या प्रवासाचा

 

गंध अन्नपूर्णेच्या रसाचा

चवी चवीने  तृप्त होण्याचा

 

गंध  हाकेच्या  मैत्रीचा

मनमोकळ्या गप्पांचा अन् खळखळून हसण्याचा

 

गंध  हिरव्या मायभूचा अन् देशाचा

अभिमानाने मान उंचावण्याचा

 

गंध  सर्व आप्त परिवाराचा

नात्यांचा भावबंध बहरण्याचा

 

रंगुनीया गंधात  साऱ्या

गंधमय जीवन जगण्याचा…

 

© सौ.  नेहा लिंबकर

पुणे 

मो – 9422305178

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈