Category: कवितेचा उत्सव 2

डॉ. शैलजा करोडे

 कवितेचा उत्सव 

☆ “कविता माझी ओळख…” ☆  डॉ. शैलजा करोडे ☆

☆

सखी जीवाभावाची ती

अभिव्यक्ती कवितेची

शब्द मळा फुलविते

गोडी मज व्यासंगाची

*

बळ देई झुंजण्याचे

संकटाशी तो सामना

मिळे स्फूर्ती नी चैतन्य

पूर्ण करीते कामना

*

अश्रू पुसे दुःखितांचे

घाली मायेची फुंकर

बळ देई जगण्याचे

वाट उजळी धूसर

*

शृृंगारते नवी नवी

न्हाते ती नवरसात

बाज लावणी ठसका

वीरगाथा पोवाड्यात

*

दिला मान व सन्मान

विशेषण कवयित्री

माझी ओळख कविता

तिचा ध्यास दिन रात्री

☆

© डॉ. शैलजा करोडे (काव्यशलाका)

नेरुळ नवी मुंबई मो. 9764808391

ईमेल – [email protected] 

सौ. अर्चना गादीकर निकारंगे

 कवितेचा उत्सव 

☆ अनुभूती… ☆ सौ. अर्चना गादीकर निकारंगे ☆

☆

 जीवनात विषय, प्रसंग खूप असतात

 निवडक मात्र मनाला स्पर्शतात

न स्पर्शलेले काही गौण नाही

त्यावर व्यक्त व्हायला मनाची तयारी होत नाही.

*

खूप काळ लोटूनसुदधा त्यातली एखादी

गोष्ट वा प्रसंग मनात रुंजीधरून राहतात.

तिच्या किंवा त्यांच्या नकळत मग त्यांच्या

सुंदर अशा काव्यपंक्ती घडतात.

*

बनलेल्या काव्यपंक्ती कवीच्या

अनुभवाची सत्यता असतात.

म्हणूनच वाचणार्‍याला त्या एक

निखळ आनंद देऊन जातात.

*

स्वानुभवाने डवरलेली कविता

कवीसाठी सत्यानुभव असतो,

तिला वाचणार्‍यासाठी ती मात्र

निर्मळ, शुदध असा उपहार ठरतो

☆

© सुश्री अर्चना गादीकर निकारंगे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ राधाकृष्ण… ☆ श्रीशैल चौगुले ☆

☆

कृष्णमेघ लोचनात

राधिका ती संभ्रमात

पापण्याशी त्या नभात

दाटूनीया अकस्मात.

*

वायू होऊन बासरी

राधिके हृदयांतरी

बावरले भावबंध

कृष्णाच्याच प्रेमांतरी.

*

सृष्टी झाली मोरपीस

अन् धारांची ती राधा

मोहन प्रकटे हळू

रिक्त मनी शाम सदा.

*

तरि घटावर मुख

ठेऊन चिंतनी व्यस्त

भुमीचे हे वृंदावन

राधा-कृष्ण प्रीत मस्त

 ☆

© श्रीशैल चौगुले

सौ. ज्योती कुळकर्णी 

 कवितेचा उत्सव 

☆ स्वागत… ☆ सौ. ज्योती कुळकर्णी ☆  

☆

आम्ही आहोत सगळे हिंदू

जोडू बघतो विश्वातले बंधू

द्वेष अाम्ही शिकलो नाही

वाटून घेतो असलेले काही

*

मुळात आम्ही उत्सवप्रिय

सगळ्याच सणांमधे सक्रीय

आम्ही आहोत परंपराप्रिय

मनानी नेहेमीच राहू भारतीय

*

लावून गुढ्या तोरणे दारात

गुढी पाडव्याच्या नववर्षात

आनंदाचा सोहळा उत्सवात

आप्तजनांच्या भेटीची बरसात

*

करूया स्वागत सौर वर्षाचेही

अवघे विश्व एक होऊ पाही

त्याग करूनी आंग्ल प्रथेचा

उत्सव मात्र हिंदू परंपरांचा

*

दारी रांगोळी गोड खाऊनी

उजळू दीप घरा घरामधूनी

सोमरसाला फाटा देऊनी

साजरा करूया आनंदानी

 ☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

पुण्यात्मा…  श्री आशिष  बिवलकर ☆

☆

अखेर संपली ती झुंज,

तुटली श्वासांची माळ |

घाला घालून गेला,

निर्दयी झाला काळ |

*

निष्प्राण देह उरला मागे,

तो ही झाला चितेच्या स्वाधीन |

हातात काहीच नसते आपल्या,

मनुष्य जन्म असतोच पराधीन |

*

आठवणींच्या शिवाय,

काही ना उरले आता मागे |

मागे वळून पाहता,

स्मृती पटलावर गुंतले धागे |

*
दुःखाचे कोसळले आभाळ,

आसवांचा बांध फुटला |

हळ हळ करत व्यक्त,

जो तो आज आतून तुटला |

*
देवाची सेवा करता करता,

देवाच्या घरी तो गेला |

मोक्ष प्राप्ती प्रारब्ध जीवाचे,

जन्म मृत्यूचा फेरा पूर्ण केला |

*

सुन्न झाले आज मन,

सुन्न झाली ही मती |

ईश्वरा प्रार्थना एकच,

दे पुण्यात्म्यास सद्गती |

☆
(श्री महागणपती देवस्थान बदलापूरचे पुजारी आणि आमचे सहकारी प्रशांत पांडे यांचे काल दुःखद निधन झाले.. अतिशय सुस्वभावाने त्यांनी माणस जोडली.. All in one कोणतही काम असलं तरी स्वतःहून मदतीला पुढे येणं हा त्याचा स्वभाव…कधीही भरून निघणारी हानी झाली..त्यांना माझ्याकडून ही शब्दरूपी श्रद्धांजली..ॐ शांती…शांती…शांती 🙏) 

☆

© श्री आशिष  बिवलकर

दि. 04 मार्च 2025

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ मर्मबंध… ☆ प्रा तुकाराम दादा पाटील ☆

☆

मी जे जगलो त्याचा हा तर मर्मबंध आहे

या गझलेचा अर्थ पसारा लांबरुंद आहे

*

साध्य साधना करून येथे पूर्ण कर्म केले

निवांत झाल्या देहकुडीचा श्वास मंद आहे

*

काळजातल्या कथाव्यथांचे स्तोम खूप झाले

त्याच सुखाच्या आठवणींचा मंद गंध आहे

*

संसाराच्या धकाधकीची रीत छान साधी

जगणे तेथे कालक्रमाने जेरबंद आहे

*

स्वैरपणाने भटकायाची शांत वेळ नाही

वातावरणातील जराशी हवा कुंद आहे

*

जमेल तितकी अध्यात्माची साथ घेत जावी

तप करण्याला सोबत तुमच्या संतवृंद आहे

*

स्वतंत्रतेचा आज जमाना फार ठारवेडा

जगात आता जगणे म्हणजे मुक्त छंद आहे

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ आडात नाहि पाणी आता… ☆ श्री हरिश्चंद्र कोठावदे ☆

(वनहरिणी)

☆ 

आडात नाहि पाणी आता, सांग कसा रे भरू पोहरा

हरदासाची सरली पोथी, काय नवे ते सांगू तुजला

*

नवजाताच्या नजरेमधले, कुठे कालचे कुतुहल आता

सरळसोट अन् रटाळ केवळ, उरली झापडबंदी आता

*

तीच पुरातन नगरे आणिक अवशेषांची तीच विराणी

त्याच वाहत्या जखमा आणिक अश्रूंचीही तीच कहाणी

*

शोकामधले सरले गुंजन, वाहुन वाहुन सुकले ओघळ

तेच कालचे घाव आजही, जातिवंत तो शिणला विव्हळ

*

अंतहीन त्या अंध रातिला, का दावावा सूर्य उद्याचा

का फासावा पराभवांना, रंग विलक्षण हौतात्म्याचा

*

सृजनाचा हा जन्मोत्सव की, जन्मा आले मरण नव्याने

असा कसा हा दीपराग की, ज्योती गिळल्या काळोखाने

*

किति टांगावी वेशीवरती, मी माझी ही अशी लक्तरे

कुठवर न्यावी भर बाजारी, घरंदाज ही माझी दुःखे

*

मगरमिठीतुन तुझिया कविते, विमुक्त मजला जरा होउ दे

तुझ्या पारही बरीच दुनिया, दुनियादारी मला शिकू दे !

☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कविराज विजय यशवंत सातपुते

कवितेचा उत्सव

☆ श्रीरामनवमी विशेष – राम अलौकिक सेतू… ☆ कविराज विजय यशवंत सातपुते ☆

☆

चैत्र‌ शुद्ध नवमीस,

होई राम जन्मोत्सव.

राम नवमीचा दिन ,

मांगलिक महोत्सव…!१

*

मानव्याचा दैवी अंश,

रामलीला अवतारी.

कोटी श्लोक याची गाथा,

दृष्ट दानव संहारी…!२

*

धर्म,मोक्ष,अर्थ,काम,

राम आदर्श आरसा.

राजनीती कुलाचार,

शौर्य,धैर्याचा वारसा…!३

*

राम हरी अवतार,

विष्णु अंश नारायण .

चार दाशरथी चंद्र ,

अयोध्येचे नभांगण…! ४

*

राम राम म्हणोनीया,

जन भेटती जनाला.

रामरक्षा फलदायी,

रामचंद्र जपमाला…! ५

*

राम नात्यांचा संस्कार,

देई जगता आधार.

एका एका प्रसंगात,

राम सगुण साकार…!६

*

राम लक्षुमण जोडी,

तैसे भरत शत्रुघ्न.

कैकयीच्या अट्टाहासे,

आले संशयाचे विघ्न…! ७

*

राम दैत्य संहारक,

राम लिला निजरूप.

धीरोदात्त क्षात्रतेज ,

राम कैवल्य स्वरूप..! ८

*

एक वचनी राघव ,

राम कौसल्या नंदन.

राम भावंडांचा प्राण,

राम संस्कारी चंदन…! ९

*

राम सखा,राम स्वामी ,

राम भक्तीचे आलय.

चिरंजीव हनुमान,

झाला‌ भक्त राममय…! १०

*

राम मैत्रीचे द्योतक

राम शबरीचे बोर

शुद्ध भाव मानव्याचा

दूर‌ सारी चिंता घोर..! ११

*

राम अलौकिक सेतू,

दशानन रिपू नाश.

राम सीता जपनाम,

दूर करी भवपाश…! १२

*

राम प्रजाहित दक्ष

राम रुप लवलाही

रामरक्षा‌ स्तोत्रातून

कृपा‌ प्रासादिक राही..! १३

*

आप्त जनांचे दैवत,

आशीर्वादी कृपादृष्टी.

राम जणू कृष्णमेघ,

करी सदा स्नेह वृष्टी…! १४

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

श्री राजकुमार दत्तात्रय कवठेकर

 कवितेचा उत्सव 

☆ आता आतूरता… ☆ श्री राजकुमार कवठेकर ☆

☆

विसरता सारे

मंदावले वेग…

थंडावली धग…

*

विसरता सारे

विरले आकांत…

जाहलो निवांत…

*

विसरता सारे

स्थिरावले मन…

दृढावे आसन…

*

विसरता सारे

सोपी पायवाट…

उजळे पहाट…

*

आता आतूरता

कोणत्या क्षणाला…

विसरेन ‘मला’….

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈