मराठी साहित्य – कवितेचा उत्सव ☆ “दगडांचे झाले गोटे” ☆ श्री आशिष मुळे ☆

 कवितेचा उत्सव 

☆ “दगडांचे झाले गोटे” ☆ श्री आशिष मुळे ☆

दगडांचे झाले गोटे

प्रवाहात परंपरांच्या 

घासून रगडून वाहून 

सारखे सगळे झाले —

दगडांचे झाले गोटे

कमावून बसले खोटे

काळाच्या वाहत्या पाण्यात

निरर्थक निद्रिस्त ओझे —

दगडांचे झाले गोटे

मारण्यास उपयुक्त मोठे

वा पाडण्यास ठिणगी

अति उत्साहीत माठे —

दगडांचे झाले गोटे

काही रंग लावून बसले

काही रंग देत बसले

आतून बेरंगच् राहिले —

दगडांचे झाले गोटे

कोणीतरी मांडून ठेवले

दुसऱ्याने येऊन विस्कटले

गोटे मात्र गोटेच राहिले —

© श्री आशिष मुळे