Tag: #मराठी-कविता

श्री सुहास रघुनाथ पंडित

 कवितेचा उत्सव 

☆ अंधार असा घनभारी… कवी ग्रेस ☆ प्रस्तुती – श्री सुहास रघुनाथ पंडित ☆

(माणिक सीताराम गोडघाटे ऊर्फ कवी ग्रेस (१० मे, १९३७ – २६ मार्च, २०१२)

अंधार असा घनभारी

चंद्रातून चंद्र बुडाले

स्मरणाचा उत्सव जागुन

जणु दुःख घराला आले.

            दाराशी मी बसलेला

            दुःखावर डोळे पसरून

            क्षितीज जसे धरणीला

            श्वासांनी धरले उचलुन…

विश्रब्ध किनारे दूर

जाऊन कुठे मिळताती?

जणु ह्रदयामागून माझ्या

झाडांची पाने गळती

            नाहीच कुणी अपुले रे

            प्राणांवर नभ धरणारे

            दिक्काल धुक्याच्या वेळी

            हृदयाला स्पंदविणारे…

 – माणिक सीताराम गोडघाटे ऊर्फ कवी ग्रेस

संग्राहक – सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ ऋतूराज… ☆ सुश्री अरूणा मुल्हेरकर ☆ 

आला आला वसंत आला

चहूकडे आनंद पसरला

धरती ल्याली हिरवा शालू

बघता बघता गुलमोहर फुलला….

चैत्र महिना नव वर्षाचा

गुढी उभारती घरोघरी

वनवास संपवुनी चौदा वर्ष्ये

सीता राम परतले अयोध्यानगरी….

तरूवर हसले नव पल्लवीने

पक्षी विहरती स्वच्छंदाने

खळखळ वाहे निर्झर सुंदर

सृष्टी बहरली ऊल्हासाने….

कळ्या उमलल्या वेलीवरती

धुंद करितसे त्यांचा दरवळ

गुंजारव करी मधुप फुलांवर

वसंत वैभव किती हे अवखळ….

जाई जुई मोगरा फुलला

सुवर्ण चंपक गंध पसरला

रंग उधळित गुलाब आला

ऋतुराज कसा हा पहा डोलला….

ऋतु राजा आणिक धरती राणी

मुसमुसलेले त्यांचे यौवन

आम्रतरूवर कोकिळ गायन

वसंत वसुधा झाले मीलन….

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ माती… ☆ कवी मधुकर केचे ☆ 

माती

माती माती माती

गंध मातीतून

उरला व्यापून अंतराळ

उंच उडे गंध

उंच उडे जरी

पतंगाची दोरी मातीपाशी

म्हणोनीच जरी

गंध वर वर

मातीचा विसर पडो नेदी

 – कवी मधुकर केचे 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मंजुषा सुनीत मुळे

  वाचताना वेचलेले  

☆ काहीच नाही आपले इथे ☆ प्रस्तुती – सुश्री मंजुषा सुनीत मुळे ☆

काहीच नाही आपले इथे

हेच खरे दुखणे आहे

श्वास सुद्धा घेतलेले

काळाकडून उसने आहे

ज्याला त्याला वाटत असते

माझे असावे अंबर सारे

मर्जीनुसार झुकून फिरावे

गुलाम माझे होऊन वारे

पान आपण झाडावरचे

कधीतरी गळणे आहे

श्वाससुद्धा घेतलेले

काळाकडून उसने आहे

आतमध्ये प्रत्येकाच्या

लपून असतो एक चोर

टपून असतो एक कावळा

संधी शोधत बनून मोर

 नियतीकडून घर आपले

कधीतरी लुटणे आहे

श्वास सुद्धा घेतलेले

काळाकडून उसने आहे.

हवे ते मिळत नाही

मिळते ते रूचत नाही

दुःखच काय सुखसुद्धा

कुणालाही पचत नाही.

सुर्य जरी झालो तरी

एक दिवस ढळणे आहे

श्वास सुद्धा घेतलेले

काळाकडून उसने आहे

गंमत भारी आयुष्याची

कळून सुद्धा वळत नाही

जिंकणाऱ्या सिकंदरासही

हरणे काही टळत नाही

तारा होऊन चमकलो तरी

अखेर खाली निखळणे आहे

श्वास सुद्धा घेतलेले

काळाकडून उसने आहे.

किती खेळलो खेळ तरी

आपल्या हाती डाव नाही

स्मशानाच्या दारावरती

राजालाही भाव नाही

देहाचे या राज्य अखेर

सरणावरती जळणे आहे

श्वास सुद्धा घेतलेले

काळाकडून उसने आहे.

संग्रहिका – सुश्री मंजुषा सुनीत मुळे 

९८२२८४६७६२

श्री तुकाराम दादा पाटील

 कवितेचा उत्सव 

☆ सखा… ☆ श्री तुकाराम दादा पाटील ☆ 

(मात्रवृत्त जीवनलहरी)

६+६ (१२)  मात्रा

तुझा सखा बनेन मी

तुला मनी स्मरेन मी

जगात या जगायला

कसा तरी शिकेन मी

प्रवास संपतो तिथे

जरा पुढे निघेन मी

म्हणू कसा अधांतरी

तुझ्या मनी नसेन मी

आरसा दुभंगतोय

मला कसा दिसेन मी

प्रतारणा नको करू

किती झुरू मरेन मी

सुखात नांद तू सखे

व्यथांसवे जगेन मी

ख-या रुपास शोधण्या

नभाकडे बघेन मी

कुणास दोष द्यायला

,जगात या नसेन मी

लिहावया सृती तुझ्या

वनात ही बसेन मी

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री सुनिता गद्रे

 वाचताना वेचलेले 

 ☆ ती बाहेर जाता– लेखन सुश्री उन्नती गाडगीळ ☆ संग्रहिका – सुश्री सुनिता गद्रे ☆ 

🚶‍♂️स्त्री बाहेर जाते, तेव्हा घर,दार सुद्धा गदगदते. आडवते. विनवते..

🧜🏻‍♀️ ती बाहेर जाता–

ती बाहेर जाता..

उंबरा येतो आडवा..

करून स्वर रडवा..

धरतो ..चरण..

म्हणतो.. माझे ठेव स्मरण।।

     ती बाहेर जाता..

कडकडाट करते कडी..

म्हणे.. मज घालून बेडी?

कुठे चालली तू वेडी??

      ती बाहेर जाता…

दरवाजा येई पाठी..

जणू.. बाळ घट्ट मारे मिठी..

     .. .धरून.. पदर…

म्हणे.. येई लवकर।।

    .. ती बाहेर जाता..

रांगोळी हासे गालात..

म्हणे नको बसू कोंडून घरात

     बाहेरचं येईल रंगत।

        ती बाहेर जाता..

दारावरील गणेश आसनस्थ

म्हणे स्वत्व उजळं,कर्म कर स्वच्छ..

.तथास्तु।शुभं भवतु।

उन्नती गाडगीळ🌹🙏🏾

संग्राहिका –  सुश्री सुनीता गद्रे

माधवनगर सांगली, मो 960 47 25 805.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

ती,ती,ती आणि ती सुद्धा…  श्री प्रमोद वामन वर्तक  

शब्दांच्या झुल्यावर

झुलते ती कविता

वृत्तांच्या तालावर 

नाचते ती कविता

          भाव मनातले

          जाणते ती कविता

          जखम हृदयात

          करते ती कविता

शब्दांशी खेळत

हसवते ती कविता

घायाळ शब्दांनी

रडवते ती कविता

          साध्या शब्दांनी

          सजते ती कविता

          वेळी अवेळी

          आठवते ती कविता

मनाचा गाभारा

उजळवते ती कविता

जखम बरी करून 

व्रण ठेवते ती कविता

© श्री प्रमोद वामन वर्तक

संपर्क – (सिंगापूर) +6594708959, मो – 9892561086, ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈