श्रीमती मीनाक्षी सरदेसाई
चित्रकाव्य
– माय…. श्री सोमनाथ चौधरी ☆ प्रस्तुती – श्रीमती मीनाक्षी सरदेसाई ☆
☆
पोट तुझं भरलं असेल तर,
देवा माझ्यासाठी घेऊ का,
तुझं राहिलेलं उष्ट,
माझ्या घरी मी नेऊ का.?
☆
देवा इथे मात्र तुमची,
मस्त अंगत पंगत रंगलीय,
घरात पीठ नाही म्हणून,
सकाळीच आई बाबासोबत भांडलीय.
☆
आटवा भर पिठासाठी,
आई सगळ्या गल्लीत हिंडली,
सगळ्या शेजारच्यांनी,
तुझ्या निवदाची सबब सांगितली.
☆
देवा आज सकाळी मला,
सडकून भूक लागली,
अचानक तुला आठवून,
तुझ्या मंदिराकडे धूम ठोकली.
☆
देवा मला तुझा ,
कधी कधी हेवा वाटतो,
एका जाग्यावर बसून,
मस्त निवदाचा मलिदा लाटतो.
☆
दर्शनासाठी आलेल्या लोकांनी,
नारळाचा तुकडा हातावर ठेवला,
तुला मात्र देवा त्यांनी,
अर्धा नारळचं वाहिला.
☆
माफ कर देवा मला,
तुझा घास हिसकावतोय,
अर्ध्या कोर तुकड्यासाठी,
भाऊ माझा घरात रडतोय.
☆
देवा मी आता ठरवलंय,
तुझ्यासोबत बंड करायचं,
माझ्या भाकरीच्या प्रश्नासाठी,
स्वतःच पेटून उठायचं!”
❤️
कवी – श्री सोमनाथ चौधरी
प्रस्तुति – श्रीमती मीनाक्षी सरदेसाई
सांगली
मो. – 8806955070
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेचा उत्सव 
ऋतूनाद… 
वाचताना वेचलेले 
