Category: कवितेचा उत्सव 2

श्री तुकाराम दादा पाटील

 कवितेचा उत्सव 

☆ गुलाम…. ☆ श्री तुकाराम दादा पाटील ☆ 

न बोलता उगाच तू रुसून का बसायचे

मनातले कसे बरे तुझ्या मला कळायचे

नकोच मौन पाळणे गिळून राग संपवू

स्मरून काळ मागचा कधी पुन्हा हसायचे

निवारली किती तरी भयाण सर्व वादळे

खचून जायला नको सुखासुखी जगायचे

नशीब रोज सारखे फिरून  वाचणे नको

असेल ते मिळेल ना उगाच का झुरायचे

तुला मला हवे तसे जगून दाखवू खरे

धरून ध्यास वेगळा करून काय जायचे

नको मनास वाटले  अधांतरी  जगायचे

कठीन यातने पुढे कसे तरी झुकायचे

गुलाम होत जायचे रुढी रिती पुढे सदा

बळा पुढे झुकून जात शेवटी मरायचे

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री मुबारक उमराणी

 कवितेचा उत्सव 

☆ भान… ☆ श्री मुबारक उमराणी ☆

मऊमऊ मातीतच

खेळतच बसतीस

मातीसवे खेळतांना

खुदूखुदू हसतीस

पाणी माती मिसळुनी

होतो तुझा छान खेळ

अंगावर चिखलाचा

बसे चित्राचाच मेळ

भातुकली सजवता

बसे नटून खुशाल

छोट्या चिंधीत सजता

भातुकलीचे हो हाल

भातुकली खेळतांना

घेई रंगीत खेळणी

भातुकलीच्या हातात

फुटकीच हो चाळणी

तुटक्याही खेळण्यात

भातुकलीचा संसार

दिसे आनंदी सागर

 हेच जगण्याचे सार

एका चिंचेच्या पानात

जेवणाचा सजे थाट

भातुकलीच्या संसारी

भरे मोद काठोकाठ

आसुभऱ्या डोळ्यातही

गाते संसाराचे गाणं

मोती अश्रूथेंबातही

असे जगण्याचे भान

© श्री मुबारक उमराणी

शामरावनगर, सांगली

मो.९७६६०८१०९७.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीमती रंजना मधुकरराव लसणे 

 कवितेचा उत्सव 

☆ रंजना जी यांचे साहित्य # 83 – मानाचा मुजरा ☆

सह्याद्रीचा सिंह गर्जता झुकती या नजरा ।

छत्रपती शिवबांना हा मानाचा मुजरा ।।धृ।।

दुराचारी हे यवन  मातले करू लागले अत्याचार ।

मायभूमीला ग्रहण लागले ग्रासू पाहे अंधःकार।

शिवनेरीवर बाळ जन्माला जणू हा तेजपुंज तारा।।१।।

माय जिजाऊ नित्य  पेरते संस्कारांचे बीज।

रामकृष्ण अन्अर्जुनाच्या सांगे शौर्याचे तेज।

पराक्रमाची शर्थ जणू हा शक्ती युक्तीचा झरा ।।२।।

बाल लीला ही वीराची या असे जगा वेगळी ।

तलवारींचे खेळ खेळती बालवीर आगळी ।

स्वराज्याची शपथ घेतली साक्षी ठेवून रायरेश्वरा।।3।।

वीर मावळा संगे घेऊन करीतसे घोडदौड ।

स्वराज्याचे तोरण बांधिले घेऊन तोरणगड।

चंद्ररावांना घडता अद्दल बसला यवनांना हदरा ।।४।।

असुरी अफजलखान कोसळे ,बोटे सोडून शाईस्ता पळे।

पुरंदरचा तह सांगतो,स्वामीनिष्ठा प्रती कळवळे ।

आग्र्याहून सुटका ही तर, चपराक शाही दरबारा।।५।।

अगणित वीरांनी ही दिधल्या , प्राणांच्या आहूती।

गोब्राम्हण प्रतिपालक , शिवबा बनले छत्रपती ।

वीर मातेचे स्वप्न पुरवी हा सह्य गिरीचा हिरा ।।६।।

शिस्त मोडता घडते शासन , न्याय देविचे होई पूजन।

परस्त्रीलाही माता मानून , परधर्मांना अराध्य मानून ।

लोकहिताला सदै जागृत , राजयोगी हा खरा।

छत्रपती शिवबांना माझा

                  मानाचा हा मुजरा।

©  रंजना मधुकर लसणे

आखाडा बाळापूर, जिल्हा हिंगोली

9960128105

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री विजय गावडे

कवितेचा उत्सव  

☆ पंचात्तरीची शोढषललना… ☆ श्री विजय गावडे ☆  

स्वतंत्रते भगवती गाठशी पंच्याहत्तरि जरी l

अजून दिसशी शोढष ललना, विरांगना भुवरी  ll

आरक्त नयनी तुझ्या विलसते तेज दशदिशांचे lll

राखू अबाधित तव स्वातंत्र्या वचन असे आमुचे ll1ll

नकळे कितीदा असतील झाले आघात तव भू वरि l

घे वचना तव रक्षाया करु प्राण नि्छावर तरी II2II

स्वप्न असे तुज प्रस्थापित करु ‘विश्वगुरू’ मातें

भारतभूमी राहो अखंड दिपवूनी विश्वाते ll3ll

आगंतुक अन आक्रसताळी येती भवसंकटे

पुरुनी उरु त्या भेदून, तुडवून मार्गातील काटे  ll4ll

घडवू योद्धे, व्यापारी, खेळाडू, अन उमदे शेतकरी

उच्चप्रतिच्या नीतिमत्तेची कास धरू अंतरी ll5ll

स्वदेशीच्या चळवळीस करुनी जीवनाची वाहिनी

होऊ प्रवक्ते स्थानिक वस्तू अन सकळ कलां च्या जनी ll6ll

देशभक्तीची मशाल ठेऊ धगधगती सर्वदा

अनासक्त अन उज्वल घडवू पुढची जनसम्पदा ll7ll

निरोगी,  निरामय आयुष्या जन जन करु जागृती

‘योगगुरू’  हि तुझी उपाधी अखंड राखू धरती ll8ll

पुनच्छ वचना उच्चरून घेतली शपथ हि मातें

राखू अबाधित तव स्वातंत्र्या वचन घेई अंते ll9ll

© श्री विजय लक्ष्मण गावडे

कांदिवली, मुंबई 

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. स्वाती रामचंद्र कोरे

 कवितेचा उत्सव 

☆ थंडीची चाहूल ☆ सौ. स्वाती रामचंद्र कोरे ☆

सरे.. रिमझिम धारा

लागे..थंडीची चाहूल

दिवाळीसोबत… टाके

थंडी..हळूच पाऊल..१

बळीराजा.. आनंदून

करी..रब्बीची लागण

काळया.. आईच्या गर्भात

नव बीज.. अंकुरण….२

झाडाखाली.. दिसे सडा

जर्द.. पिवळ्या पानांचा

हुडहुडी.. भरण्याचा

ऋतू हा.. पानगळीचा..३

पाला.. पाचोळा सारा

होई…शेकोटीत गोळा

फड…रंगती गप्पांचे

मिळे.. आनंद वेगळा…४

बाळराजे.. पाळण्यात

निजे…शाल लपेटूनी

उबदार.. गोधडीत

आजीच्याच…आठवणी..५

सुका मेवा..पेरू,बोरे

तीळ.. शेंगदाणा चिक्की

शरीराची.. जपणूक

व्यायामाने.. होते नक्की..६

वाटे..हवासा गारवा

ऋतू..गुलाबी भेटीचा

शहारल्या..स्पर्शातून

धुंद..क्षण जपण्याचा..७

©  सौ. स्वाती रामचंद्र कोरे

भिवघाट.तालुका, खानापूर,जिल्हा सांगली

मो.9096818972

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

 कवितेचा उत्सव 

☆ सापडावा सूर माझा ☆ श्री शरद कुलकर्णी ☆ 

खुद्द आकाशाने

शोधावे मेघाला.

झाडांनी शोधावे

सावलीला .

तहान लागावी

वाहत्या पाण्याला.

पूर अनावर

नदी ,पापणीला .

कधी विसंगतीने

शोधावे भारुड.

जडावे गारुड

विपरीत .

एका जनार्दनी

आक्रोश घडावा

आणि सापडावा,

सूर माझा.

© श्री शरद  कुलकर्णी

मिरज

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

बा.भ.बोरकर

 कवितेचा उत्सव 

☆ सोस तू माझ्या जिवा रे ☆ बा.भ.बोरकर ☆

(बालकृष्ण भगवन्त बोरकर (30 नोव्हेम्बर 1910- 8 जुलाई 1984))

सोस तू माझ्या जिवा रे,सोसल्याचा सूर होतो,

सूर साधी ताल तेव्हा भार त्याचा दूर होतो.

दुःख देतो तोच दुःखी जाणता हे सत्य मोठे,

कीव ये दाटून पोटी दुःख तेणे होय थोटे.

या क्षमेने सोसले त्या अंत नाही पार नाही,

त्यामुळे दाटे फळी ती पोळणा-या ग्रीष्मदाही.

त्या क्षमेचा पुत्र तू हे ठेव चित्ती सर्वकाळी

शीग गाठी दाह तेव्हा वृष्टी होते पावसाळी.

त्या कृपेचे स्त्रोत पोटी घेऊनी आलास जन्मा,

साद त्यांना घालिता तू सूर तो येईल कामा.

फळी=फळात
शीग= कमाल मर्यादा

– बा.भ.बोरकर

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈