Category: कवितेचा उत्सव 2

श्री शरद कुलकर्णी

 कवितेचा उत्सव 

☆ नाते नव्याने… ☆ श्री शरद कुलकर्णी ☆

साद घालता मेघांना ,

हाकांचा पाउस आला.

थेंब जपला डोळ्याचा,

अनाहूत ओघळला .

मोर नाचले तमात,

कसे उस्फूर्त जोमात .

चमकल्या साैदामिनी,

मेघ जमल्या नभात.

रान बहकले थोडे,

वृक्ष चिंबचिंब झाले.

थेंबथेंब अमृताने,

विश्व अवघे नहाले.

धरा आकाशाचे जसे,

आज अद्वैत घडले.

क्षितिजासी अघटित ,

नाते नव्याने जडले.

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री विभावरी कुलकर्णी

 कवितेचा उत्सव 

☆ मधुमालती… ☆ सुश्री विभावरी कुलकर्णी ☆

फुललेली मधुमालती सुंदर दिसते

मंद सुगंध सगळीकडे पसरते

साधे पणाने मन प्रफुल्लित करते

पण तिला देवघरात स्थान नसते

 

कधी केसात वेणी बनून असते

कधी मुलांचे खेळणे बनते

कधी नुसतीच पायदळी जाते

कधी कचरा म्हणून हिणवली जाते

 

तरीही रोज रोज फुलते

आनंदाने बहरत जात असते

बघणाऱ्यांना आनंद देत असते

जणू आपल्याला संदेशच देत असते

 

कुणी कसेही वागले

कुठेही स्थान नसले

कोणी काळजी घेणारे नसले

तरीही आपण आपला धर्म सोडू नये

घेतला वसा टाकू नये

आनंद व सुगंध देणे थांबवू नये

 

© सुश्री विभावरी कुलकर्णी

सांगवी, पुणे

मोबाईल नंबर – ८०८७८१०१९७

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 

 कवितेचा उत्सव 

☆ सोबत (भुजंगप्रयात)… ☆ सुश्री अरूणा मुल्हेरकर ☆

नको रे लपंडाव खेळू असा तू

नको भावनांना दुखावू असा तू

 

ढगाआड चंद्रासवे तारकांना

किती कष्ट होती तया शोधताना

 

किती घेतल्या आणभाका मिळोनी

अजूनी मनी ठेविल्या मी जपोनी

 

कुठे सर्व गेली तुझी प्रीतवचने

तुझ्यावीण माझे अधूरेच असणे

 

जळावीण मासा तडफडे जसा रे

विनासंग माझी तशी ही दशा रे

 

सदा मी जगावे तुझ्या सोबतीने

हसावे रडावे तुझ्या संगतीने

 

असू देत ध्यानी तुझी साउली मी

तुला साथ देणार दर पाउली मी

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी

 कवितेचा उत्सव 

🌳 भाग्यरेषा… 🌳 श्री सुहास सोहोनी ☆

ना पुष्प लगडले

कधीहि फांदीवर

मग यावे कैसे

मधूर फळ रुचकर

खरखरीत पाने

हिरवट मळकट  दिसती

खोडावर खवले

दृष्टीसही बोचती —

 

वृक्षांच्या गर्दित

मीहि एकला वृक्ष

सामान्य कुळातिल

करावया दुर्लक्ष

संगोपन होण्या

कधीच नव्हतो पात्र

मोजतो जन्मभरि

दिवस आणखी रात्र —

 

ना मिळे भव्यता

पिंपळ वटवृक्षाची

ना सुंदरता ती

कदंब वा बकुळीची

भरगच्च दाटि ना

फांद्यांवर पर्णांची

ना पिले खेळती

अंगावर पक्षांची —

 

परि भाग्य लाभले    

भरुन काढण्या उणे

अन् देवदयेने सुदैव

झाले दुणे

मन तृप्त होउनी

न्हाले संतोषात

मज जन्म लाभला

पवित्र देवराईत !! —

 

© सुहास सोहोनी

रत्नागिरी

दि. १९-०३-२०२३.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ कर्मवीर… ☆ प्रा तुकाराम दादा पाटील ☆

(९  मे २०२३ – कर्मवीर भाऊराव पाटील पुण्यतिथी निमित्त या महामानवाला मी वाहिलेली काव्यश्रद्धांजली)

भावसुमांची गुंफून माला पूजा तव बांधली

हृतपटलावर मुहूर्त करूनी श्रद्धांजली वाहिली

 

अज्ञानाचा संहारक तू ज्ञानदीप आमुचा

अनेक वलया मधुनी तुझिया सूर्य तळपतो ज्ञानाचा

तू वीरांचा वीर अग्रणी कर्मवीर माऊली

 

महाराष्ट्राच्या कडेकपारी तूच बांधली ज्ञानमंदिरे

उद्धरली अन् त्यांच्यामधूनी रयतेची बलशाली पोरे

 सरस्वतीच्या हातामधली विणा झंकारली

 

कर्मवीरा तुज म्हणती अण्णा यातच तव श्रेष्ठत्व वसे

शिक्षणक्षेत्री कामधेनू तू तुझे भले पण तिथे दिसे

कर्तव्याच्या तुझ्या मेरुतही  रत्न खाण लागली

 

राजांना ही लाजवील तव कर्तव्याचा अमोल ठेवा

 श्रद्धा आमुची तुझ्याच चरणी देवाला ही वाटे हेवा

 तू देवातील देव आमुचा चरणधुली चर्चिली

 

करू कशी सांगता याची शब्द अपुरे पडती

अंतरात परी लाख लाख त्या तिथे नौबती झडती

तुझ्या कृपेच्या कल्पतरूतळी  समाधीच लागली

 

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈