Marathi Kavita
सुश्री नीलांबरी शिर्के
चित्रकाव्य
– फुल देखणे…– ☆ सुश्री नीलांबरी शिर्के ☆
☆
फुल देखणे मला न भुलवी
गंधित परिमल ना बोलावी
हवा मज मकरंद आतला
चोच माझी अलगद मिळवी
☆
एक थेंब त्या मधुस्वादाने
खरी तृप्तता मनास मिळते
नाजुक सुमनातुन मध घेणे
निसर्गत: मज वरदानच ते
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री हरिश्चंद्र कोठावदे
कवितेचा उत्सव
☆ कविते !… ☆ श्री हरिश्चंद्र कोठावदे ☆
(वृत्त :आनंदकंद – (गागाल गालगागा गागाल गालगागा))
कविते ! तुझीच बाधा, आजन्म भोवणार
वणव्यात चांदण्याची, मी गोष्ट सांगणार —
ना बाण कागदी हे, रक्ताक्षरे उरीची
गंगौघ आसवांचा, गंगेत नाहणार —
आयुष्य श्रावणी हे, उन पावसात चिंब
सतरंग जीवनाचे, रसिकांस दावणार —
कबरीत काळजाच्या, दफने किती करावी
दूभंग या धरेला, आकाश सांधणार —
गंधाळतील दुःखे, झंकारतील सूर
टाहोत मैफिलीच्या, संगीत छेडणार —
नगरी अमानुषांची, होणार छिन्नभिन्न
योद्धेच शब्द आता, रणशिंग फुंकणार —
कोणी नसेल संगे, माझ्यात मी असेन
तूझ्याच विश्वरूपा, माझ्यात पाहणार —
माझाच ध्रूव जेव्हा, अढळातुनी ढळेल
खेचून मी स्वतःला,चौकात आणणार !!!!
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीमती रंजना मधुकरराव लसणे
कवितेचा उत्सव
☆ रंजना जी यांचे साहित्य # 156 – माझे अण्णा ☆ श्रीमती रंजना मधुकरराव लसणे ☆
☆
वालुबाई पोटी।
जन्माले सुपुत्र।
भाऊराव छत्र।
तुकोबांचे।।१।।
वाटेगावाचे हो
भाग्य किती थोर।
उजळली भोर।
तुकोबाने।।२।।
कथा कादंबरी।
साहित्यिक तुका।
पोवाड्यांचा ठेका।
अभिजात।।३।।
गण गवळण।
वग, बतावणी।
समाज बांधणी।
अविरत।।४।।
वर्ग विग्रहाचे।
ज्ञान रुजविले।
किती घडविले।
क्रांतीसूर्य।।५।।
लाल बावट्याचे।
कार्य ते महान।
समाज उत्थान।
कार्यसिद्धी।।६।।
अविरत काम।
कधी ना आराम।
प्रसिद्धीस नाम।
अण्णा होय।।७।।
दीन दलितांचा।
आण्णा भाष्यकार।
टीपे कथाकार।
दुःखे त्यांची।।८।।
कथा कादंबऱ्या।
संग्रहांची माला।
कम्युनिस्ट चेला।
वैचारिक।।९।।
कलावंत थोर।
जगात संचार।
इप्टा कारभार।
स्विकारला।।१०।।
भुका देश माझा।
भाकरी होईन।
जीवन देईन।
शब्दातून।।१०।।
अनेक भाषात।
भाषांतर झाले।
जगात गाजले।
साहित्यिक ।।११।।
त्रिवार असू दे
मानाचा मुजरा ।
साहित्यिक खरा।
स्वयंसिद्ध।।१२।।
☆
© रंजना मधुकर लसणे
आखाडा बाळापूर, जिल्हा हिंगोली
9960128105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ नाते… ☆ प्रा तुकाराम दादा पाटील ☆
नाते सुरेख होते तोडून काय केले ?
संसार वेगळाले थाटून काय केले ?
धरल्या चुकून वाटा गेला निघून कोठे
उपरी घरे कुणाची जोडून काय केले?
आता गटातटाना आलाय ऊत भारी
वेशीत लक्तराना टांगून काय केले?
नुसतेच बंड झाले झाला विकास नाही
जाती निहाय किल्ले बांधून काय केले ?
सत्तांध लालसांचे थैमान खूप झाले
बागी बनवून तुम्ही भांडून काय केले ?
जनता पिचून गेली जगणे महाग झाले
गावास शांत साध्या जाळून काय केले ?
बदनाम कोण होते कळले कुठे कुणाला
संकेत चौकशीचे पाळून काय केले ?
उरला कुठे जिव्हाळा माया मरून गेली
जनतेस सौख द्याया शोधून काय केले ?
नीती कुठे पळाली संस्कार व्यर्थ झाले
असली परंपरांना तोडून काय केले?
बदलून वेशभूषा गुपचूप भेटताना
भेटून एकमेका झाकून काय केले?
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # 178 – विजय साहित्य
☆ वटपौर्णिमेचा सण… ☆ कविराज विजय यशवंत सातपुते ☆
☆
वटपौर्णिमेचा सण
दृढ करतो विश्वास
सहजीवनात दोघे
एक सूत्र ,एक ध्यास. . . . . ! १
वटवृक्षाच्या पारंब्या
संसाराची वंशवेल.
वटपौर्णिमेचा सण
सुखी संसाराचा मेळ.. . . . ! २
पौर्णिमेला चंद्रकांती
पूर्ण होई विकसित
वटपौर्णिमेचा सण
होई कांता प्रफुल्लित. . . . ! ३
कांत आणि कांता यांचे
नाते नाही लवचिक
वटपौर्णिमेचा सण
एक धागा प्रासंगिक. . . . ! ४
भावजीवनाचे नाते
वटवृक्षाचा रे घेर
वटपौर्णिमेचा सण
घाली अंतराला फेर. . . . . ! ५
सालंकृत होऊनीया
वटवृक्ष पूजा करू
सणवार परंपरा
मतीतार्थ ध्यानी धरू…..! ६
पती आहे प्राणनाथ
यम आहे प्राणहारी
वटपौर्णिमेचा सण
सौभाग्याची आहे वारी. . . . ! ७
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष मुळे
☆ कविता ☆ “सोचता हूं ये अक्सर…” ☆ श्री आशिष मुळे ☆
गुलशन इक बसता है
इस नाचीज के भीतर
पंछी इक उड़ता है
यु आंखो से होकर
सोचता हूं ये अक्सर….
बरस जा ए फ़िरदौस
तूं मेरी जन्नत बनकर
कहीं बह ना जाऊं
यूहीं तुम्हें खोकर
सोचता हूं ये अक्सर….
यहां ना है बादल
है सूरज खिला हसकर
ना है कोई दौड़ ना है शर्यत
आंसू पीछे आओ छोड़कर
सोचता हूं ये अक्सर….
मन की मेरी वादिया
कितनी है खुबसुरत
रहो ना पल दो पल
तूं मेरी होकर…
सोचता हूं ये अक्सर….
© श्री आशिष मुळे
≈ संपादक – श्री हेमन्त बावनकर/सम्पादक मंडल (हिन्दी) – श्री विवेक रंजन श्रीवास्तव ‘विनम्र’/श्री जय प्रकाश पाण्डेय ≈
सुश्री वृंदा (चित्रा) करमरकर
कवितेचा उत्सव
☆ संस्कार… ☆ सुश्री वृंदा (चित्रा) करमरकर ☆
उपेक्षिसी माणसा का
काळ्या तुझिया आईला ?
आजवरी वाढविले
अरे लेकरा तुजला —
एक बीज तू पेरता
धान्य देते ओंजळीने
संस्कार ते दातृत्वाचे
विसरला तू कशाने —
शिक्षणाने प्रगतीची
उघडली रे कवाडे
परी विकूनी मजला
जाशी दूर कुणीकडे? —
शेतीतच प्रगतीचा
ओघ अरे वाहू देत
नव्या जोमाने कर तू
बाळा कष्टाची शिकस्त —
घाम गाळता शेतीत
मोती घर्माचे बनती
अरे बळीच्या रे पोरा
किती श्रमाची श्रीमंती ! —
संस्कारांना जपता तू
खरा माणूस होशील
जीवनाचा अर्थ सारा
खरा तुज गवसेल —
© वृंदा (चित्रा) करमरकर
सांगली
मो. 9405555728
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुजित कदम
कवितेचा उत्सव
☆ सुजित साहित्य # 164 ☆ संत कान्होपात्रा…☆ श्री सुजित कदम ☆
कान्होपात्रा कवयित्री
शामा नर्तिकेची लेक
गाव मंगळवेढ्यात
जन्मा आली संत नेक…! १
अप्रतिम लावण्याने
कान्होपात्रा आकारली
पुर्व पुण्याई लाभती
विठू भक्ती साकारली…! २
नायकीण पेशाची त्या
मोडुनीया परंपरा
कान्होपात्रा जपतसे
विठू भक्ती भाव खरा…! ३
देह मंदिराचा सोस
त्यागुनीया झाली संत
संकीर्तन प्रवचन
चिंतनात भगवंत…! ४
कान्होपात्रा घेई भेट
ज्ञानेश्वर माऊलींची
संत संगतीचा लाभ
ठेव कृपा साऊलीची…! ५
केले अभंग गायन
हरीनामी सदा दंग
गावोगावी पोचवीला
अंतरीचा भक्ती रंग…! ६
तेहतीस अभंगाचे
कान्होपात्रा निजरूप
संत सकल गाथेत
प्रकटले शब्द रुप….! ७
नित्य पंढरीची वारी
पदोपदी हरीभक्ती
घात केला सौंदर्याने
नाही जीवन आसक्ती…! ८
बिदरचा बादशहा
करी तिची अभिलाषा
शील रक्षणाच्या साठी
बदलले मूळ वेषा..! ९
वेष बदलून गेली
कान्होपात्रा महाद्वारी
भोग लालसा यवनी
पाठलाग अविचारी…! १०
पांडुरंगी झाली लीन
पंढरीत समर्पण
भक्तीभाव अभंगाने
केले जीवन अर्पण…! ११
© श्री सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री वर्षा बालगोपाल
चित्रकाव्य
☆ जन्मांतरीचे साथी… ☆ सुश्री वर्षा बालगोपाल ☆
☆
किती भाग्य थोर लिहिले आपल्या माथी
तू आणि मी, आपण जन्मांतरीचे साथी॥
☆
किती हिवाळे उन्हाळे अन पावसाळे
पाहिले आपण आनंदाने सोबतीने
दिस कष्टाचे जरी केल्या सुखाच्या राती
तू आणि मी, आपण जन्मांतरीचे साथी॥
☆
एक झालो आपण सुखाच्या या संसारी
हसत लावल्या दु:खा सुखाच्या झालरी
दोन वाती असूनही एक झाली ज्योती
तू आणि मी, आपण जन्मांतरीचे साथी॥
☆
मुले नातवांसवे सजे संसाररथ
प्रेमजिव्हाळ्याच्या हिरवळीचा हा पथ
दूरदेशी सारे पण, हात तुझा हाती
तू आणि मी, आपण जन्मांतरीचे साथी॥
☆
चल जाऊ मंदिरी प्रार्थूया ईश्वराला
मुलांना यश किर्ती जोगवा पदराला
विनात्रास जिणे त्यांचे ही आम्हा पावती
तू आणि मी, आपण जन्मांतरीचे साथी॥
☆
© सुश्री वर्षा बालगोपाल
9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री मंजुषा सुनीत मुळे
चित्रकाव्य
☆ “एक इवलंसं रोपटं ..” – अज्ञात ☆ प्रस्तुती – सुश्री मंजुषा सुनीत मुळे ☆
(जागतिक पर्यावरण दिनाच्या हार्दिक शुभेच्छा..!)
इवलंसं रोपटं मी
तू म्हणालास तर मरून जाईन –
ओंजळभर पाणी दे मला
आयुष्यभर तुझ्या कामा येईन –
दिलं जीवदान मला तर
तुला जगायला प्राणवायू देईन –
जगवलंस मला तर
तुझ्या देवांसाठी फुलं देईन –
फुलवलंस मला तर
तुझ्या मुलांसाठी फळं देईन –
तळपत्या उन्हामध्ये
तुझ्या कुटुंबाला सावली देईन –
तुझ्या सानुल्यांना खेळावया
माझ्या खांद्यावर झोका देईन –
तुझ्या आवडत्या पाखरांना
मायेचा मी खोपा देईन –
कधी पडला आजारी तर
तुझ्या औषधाला कामा येईन –
झालो बेईमान जरी मी
शेवटी तुझ्या सरणाला कामा येईन –
कवी : अज्ञात
प्रस्तुती : सुश्री मंजुषा सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
