Category: कवितेचा उत्सव 2

सौ. पल्लवी ऋषिकेश कुलकर्णी

 कवितेचा उत्सव 

☆ सांग सये… ☆ सौ. पल्लवी ऋषिकेश कुलकर्णी ☆

सांग सये तुज कुठे मांडावे

कवितेच्या चौकटीतुनी का

भरून आल्या आभाळातूनी

तुझ्याच ठायी दिसते मजला

क्षितीजामधली गूढ निळाई ….. १

तुझ्या मौनाची निरगाठ ही

वाटे व्हावी सैल थोड़ी

सांधलेस तू सगे सोयरे

वळ गाठीचे तुझ्याच पायी ….. २

तिलांजली दिलीस सर्वांसाठी

तुझ्यातल्या स्त्रावांना होमातूनी

तुझ्यातल्या तुला कसे ग

दिलेस कायम दूर लोटुनी …. ३

बघ जरा तू सत्वर आता

काय मागते तुझी ही काया

झुगारून दे पायातील बेड्या

बोलावती तुला वाटा या वेड्या …….. ४

खुलु देत नवे पंख मनीचे

स्वार होऊनी जा तुझ्याच देशा

होईल मनोहर स्वप्न अंतरीचे

पूर्णत्वाची प्रचीती द्याया ….. ५

© सौ. पल्लवी ऋषिकेश कुलकर्णी 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ अजूनही…!  ☆ श्रीशैल चौगुले ☆ 

अजून वेळ पहाते वाट

तोच मनात विश्वास घेत

वचन एक ते भेटण्याचे

जगण्याला या आधार देत.

सारे आयुष्य नसते खोटे

आठवणी का मग छळती ?

ऋतू का सांगती बदलाव

श्रावण-वसंता घेता कवेत.

याच जीवनी प्रेम पुरावे

वळणावर भेट-दुरावे

हृदय स्पंदनी तेच दुवे

अश्रू विरही शब्दांसवेत.

विरले गीत तरी परंतु

कोकीळ गातो अजून तिथे

व्याकुळ सांज ओशाळ जिथे

कवण जीवंत हाक देत.

 © श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आनंदहरी

 कवितेचा उत्सव 

☆ पर्यावरण दिन – चल मित्रा, एक झाड लावू… ☆ श्री आनंदहरी ☆

कायद्याने जरी असला गुन्हा

शोधल्या पळवाटा पुन्हा पुन्हा

तोडत राहिलो झाड न् झाड

करत राहिलो सारेच उजाड

कळले नाही कधीच कुणा

आड आला मी, माझेपणा

निसर्गाचाही एक कायदा असतो

तो पाळायचा जन्मतःच केलेला वायदा असतो

‘ सारे काही विसरून जाऊ

उद्याचे काय ते उद्याच पाहू ‘

म्हणता म्हणता काळ सरला

श्वासासाठी प्राणवायू न उरला

तरीही अजुनी जाग नाही

जागेपणाचा काहीच माग नाही

झोपेचं जर घेशील सोंग

( जगणं होईल नुसतंच ढोंग )

भोगावे लागतील अनंत भोग

नको कविता लिहीत राहू

‘कोरडा भवताल’ फिरून पाहू

उठ, आतातरी बाहेर जाऊ

चल मित्रा, एक झाड लावू

..….चल मित्रा, एक झाड लावू !

© श्री आनंदहरी

इस्लामपूर, जि. सांगली

भ्रमणध्वनी:-  8275178099

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री अरूणा मुल्हेरकर

 कवितेचा उत्सव 

☆ कृतार्थ मी… ☆ सुश्री अरूणा मुल्हेरकर ☆ 

जीवन माझे कृतार्थ झाले

ज्या दिवशी मी आई झाले।।धृ।।

अंगणातल्या वेलीवरती एक कळी दिसली

चाहूल लागता बाळाची रोमांचित काया झाली

आगमनाने बाळाच्या घर माझे सजले।।१।।

इवल्याशा त्या मुखावरती

भाव निरागस किती मज दिसती

टॅह्या टॅह्या स्वर रुदनाचे ते कर्णातच घुमले।।२।।

फुटला पान्हा मातृत्वाचा

दिव्यानंद तो स्तनःपानाचा

चुटुचुटु करिता दुग्धप्राशन अमृतघट भरले।।३।।

बाळकृष्ण तो रांगत आला

आई आई बोलू लागला

बोल चिमखडे गुंजत कानी धन्य मजसी वाटले।।४।।

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ आता थोडं जगून घे… ☆ सुश्री जयश्री कुलकर्णी ☆ 

किती दिवस  उरलेत आता

 थोडं तरी जगून घे

येत नसेल कविता करता

 तीही थोडी शिकून घे

      आता थोडं जगून घे

 हातात हात घे तिचा

 म्हण थोडं फिरायला जाऊ

सुंदर आहे विश्व सारं

 त्यातलं सौंदर्य बघून घे

          थोडं तरी जगून घे

 सतत आपल्या कपाळाला आठ्या

 घालून सांग का बसतोस?

 अरे कधीतरी ,केव्हातरी ,

मनापासून हसून घे

          थोडा तरी जगून घे

प्रश्न कधी संपत नाहीत

 पण त्यात गुंतून बसू नकोस

 विश्वासाने कोणाच्या  खांद्यावर

 मान ठेवून रडून घे

          थोडं तरी जगून घे

आला क्षण थांबत नाही

 ठाऊक आहे सारं तुला

 पुढे चाललेल्या क्षणाबरोबर

 थोडा आनंद भोगून घे

      थोडं तरी जगून घे

© सुश्री जयश्री कुलकर्णी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈