Category: कवितेचा उत्सव 2

श्री शेखर किसनराव पालखे

☆ साप्ताहिक स्तम्भ – शेखर साहित्य # 3 ☆

☆ कविता – ते आणि मी  ☆

 

ते मरतात रुळांवरती-निष्प्राण

मी लिहितो आणखी एक कविता मुर्दाडपणे

ते चालतात,पायाचे तुकडे करतात

मी घेतो वाहवा भेगाळलेल्या टाचांच्या फोटो साठी -बेशरमपणे

ते होरपळतात कच्याबच्यांसह तापल्या मातीत

मी पंख्याखाली थंड होत रहातो-शांतपणे

ते तुडवत रहातात आपल्या खोपटाची वाट

मी पहात असतो माझ्या घराच्या सावलीतून -निवांतपणे

ते शोधतात आयुष्यभर ‘भाकरीचा चंद्र

मी तपासत असतो डझनाचे बाजारभाव -कुतूहलाने

ते मरतात आणि

शेखर कविता करतो.

 

© शेखर किसनराव पालखे 

पुणे

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

सुश्री प्रभा सोनवणे

(आज प्रस्तुत है सुश्री प्रभा सोनवणे जी के साप्ताहिक स्तम्भ  “कवितेच्या प्रदेशात” में  स्त्री विमर्श पर एक अतिसुन्दर काव्यात्मक अभिव्यक्ति  सुपर माॅम। आज माँ के कार्यों का  दायरा एवं दायित्व समय के साथ बढ़ गया है जिसकी सुश्री प्रभा जी ने अत्यंत सुन्दर विवेचना की है। मुझे पूर्ण विश्वास है  कि आप निश्चित ही प्रत्येक बुधवार सुश्री प्रभा जी की रचना की प्रतीक्षा करते होंगे. आप  प्रत्येक बुधवार को सुश्री प्रभा जी  के उत्कृष्ट साहित्य को  साप्ताहिक स्तम्भ  – “कवितेच्या प्रदेशात” पढ़ सकते  हैं।)

☆ साप्ताहिक स्तम्भ – कवितेच्या प्रदेशात # 61 ☆

☆ सुपर माॅम ☆

ती नसते तळ्यात मळ्यात,

ती डायरेक्ट खळ्यात…..

 

करून घेते सारी कामं फटाफट….

तिला आवडत नाही कुठलीच पळवाट….

 

सहा वाजता उठून ती जाॅगिंग करते…

सात च्या ठोक्याला स्वयंपाकीणबाई बेल वाजवते…

ती देते सूचना….चहा नाश्त्याच्या…

 

ती मुलीला हाक मारते..पाठवते

अंघोळीला…

तोवर दुसरी कामवाली आलेली असते…

 

ती करते मुलीची वेणीफणी…

 

दुस-या कामवाली ला सांगते दिवसभराची कामं…निवडणं, टिपणं…डस्टिंग…धुणी भांडी…मुलीला शाळेतून आणणं…तिचं खाणं पिणं, खेळायला पाठवणं…सारं आजीच्या देखरेखीखाली  !

तिसरी कामवाली उरलेली कामं करायला !

 

घरात सासू सास-यांना ही वागवते

सन्मानाने !

नातीला ही लळा असतो आजी आजोबांचा !

 

नव-याचा, मुलीचा आणि स्वतःचा

डबा भरून,ती बाहेर पडते….

आपली कार सफाईदारपणे बाहेर काढते…

 

मुलीला स्कूलबस मध्ये बसवून “तो” त्याच्या कार ने ऑफिस कडे रवाना…

 

त्यांनी समंजस पणे वाटून घेतलेली असतात कामे…

 

दोघं ही करिअर माईंडेड…

आपापल्या क्षेत्रात यशस्वी,कर्तृत्ववान वगैरे….

आणि कुटुंब वत्सल ही…

 

तीन तीन कामवाल्यांना सांभाळतात…सढळ हाताने पगार देऊन!

 

ती मुलीचं होमवर्क करून घेते स्वतः…तिचं नृत्य…खेळ…चित्र…वाचन..

सा-याकडे लक्ष देते जातीने!

 

रविवारी ती अगदी घरासाठी असते…

तिच्याकडे वेळच नसतो सहा दिवस….

हा एक दिवस ती बायको, आई, सून बनून राखते घराचं घरपण…

ती खरंच एक सुपर वुमन….

 

नव-याच्या खांद्याला खांदा लावून हार्डवर्क करणारी…निष्णात…नामवंत!

 

मुलगी म्हणते तिला आई…आणि बाबा विषयी ही बाळगते आपार प्रेम आणि आदर…..

 

कुठलंही अवडंबर न करता ती

जपते आपला धर्म..संस्कृती…

साजरे करते सणवार….

 

नव-याला साथ देणारी ती असते अर्धांगिनी….दक्ष आई आणि काळजी घेणारी सून  !

 

घर आणि ऑफिस चा समतोल साधणारी सुपर माॅम……

ती कधीच नसते तळ्यात मळ्यात,

डायरेक्ट खळ्यात  !!!

 

© प्रभा सोनवणे

मोबाईल-९२७०७२९५०३,  email- sonawane.prabha@gmail.com

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

श्री अशोक श्रीपाद भांबुरे

 

पाणी डोळ्यांत घेऊन, पाणी शोधाया निघाले

नदी नाले शोधताना, होते रक्तही आटले

 

कंठी घागरीच्या दोर, जाते पाण्यासाठी खोल

गेली ठेचाळत खाली, नाही लाभलेली ओल

 

तुळशीच्या रोपालाही, नाही एक वेळ पाणी

पाने सुकाया लागली, त्यांस वाली नसे कोणी

 

अशी भेगाळली भुई, वाटे बघुनिया भीती

गाई-गुरांना न चारा, कशी जपायची नाती

 

चारा पोटात जाईना, गाय दूधही देईना

दुष्काळाच्या शृंखलेला, काही मार्ग सापडेना

 

योजनांच्या घबाडाचे, वाटेकरी हे लबाड

फळे खातात स्वतः हे, गरिबाला देती फोड

 

होई निसर्गाचा कोप, नाही राजाकडे न्याय

माणसाच्या मानेला या आज जोखडाचे भय

 

© अशोक श्रीपाद भांबुरे

धनकवडी, पुणे ४११ ०४३.

ashokbhambure123@gmail.com

मो. ८१८००४२५०६, ९८२२८८२०२८

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

कवी राज शास्त्री

(कवी राज शास्त्री जी (महंत कवी मुकुंदराज शास्त्री जी)  मराठी साहित्य की आलेख/निबंध एवं कविता विधा के सशक्त हस्ताक्षर हैं। मराठी साहित्य, संस्कृत शास्त्री एवं वास्तुशास्त्र में विधिवत शिक्षण प्राप्त करने के उपरांत आप महानुभाव पंथ से विधिवत सन्यास ग्रहण कर आध्यात्मिक एवं समाज सेवा में समर्पित हैं। विगत दिनों आपका मराठी काव्य संग्रह “हे शब्द अंतरीचे” प्रकाशित हुआ है। ई-अभिव्यक्ति इसी शीर्षक से आपकी रचनाओं का साप्ताहिक स्तम्भ आज से प्रारम्भ कर रहा है। आज प्रस्तुत है आपकी एक भावप्रवण कविता “ अभंग …”)

☆ साप्ताहिक स्तम्भ – हे शब्द अंतरीचे # 11 ☆ 

☆ अभंग… ☆

केशव माधव,

अनंत अगाध,

झालो मी सावध, परमेशा…०१

 

महाराष्ट्र माझा,

संतांची ही भूमी

माझी कर्मभूमी, हीच झाली…०२

 

देव अवतार,

इथेच जाहले

संतांनी पूजिले, ईश्वर ते…०३

 

सात्विक आचार,

सुंदर विचार

महाराष्ट्र घर, माझे झाले…०४

 

संत ज्ञानेश्वर,

संत तुकाराम

जीवन निष्काम, संतांचे हे…०५

 

शौर्याची पताका,

इथे फडकली

तोफ कडाडली, गडावर…०६

 

शिवबा जन्मला,

शिवबा घडला

माता जिजाऊला, आनंद तो…०७

 

मराठी स्वराज्य,

शिवबा स्थापिले

मोगल पडले, धारातीर्थी…०८

 

ऐसा माझा राजा,

छत्रपती झाला

निर्भेळ तो केला, कारभार…०९

 

दगडांच्या देशा,

प्रणाम करतो

अखंड स्मरतो, बलिदान…१०

 

कुणी आक्रमण,

तुझ्यावर केले

हल्ले किती झाले, पृथ्वीवर…११

 

चिरायू हा होवो,

कण कण तुझा

नमस्कार माझा, स्वीकारावा…१२

 

कवी राज म्हणे,

निसर्ग सौंदर्य

आणि हे औदार्य, कैसे वर्णू…१३

 

© कवी म.मुकुंदराज शास्त्री उपाख्य कवी राज शास्त्री.

श्री पंचकृष्ण आश्रम चिंचभुवन,

वर्धा रोड नागपूर,(440005)

मोबाईल ~9405403117, ~8390345500