Category: कवितेचा उत्सव 2

  चित्रकाव्य  

  – चलावे आता घरी –   ☆ सुश्री मधुवन्ती कुलकर्णी ☆

☆

विठोबा दयाळा

माझ्या रे लेकरा

आलासी कृपाळा

पंढरीनाथा॥

☆

झाला तो सोहळा

वैष्णव सोयरा

किर्तनाचा मेळा

वाळवंटी गा॥

☆

दमूनी आलासी

भेट दे माऊलिसी

चलावे आता घरी

विश्रांतीस गा ॥

☆

पुढील वरषी

जा म्हणे पंढरीसी

भगवी पताका

खुणावती गा॥

☆

गहीवरे नेत्र ते

विठोबा शिणला

भक्तांच्या काजासाठी

ह्रदयात विसावला॥

☆

चित्र साभार – सुश्री मधुवंती कुलकर्णी

© सुश्री मधुवंती कुलकर्णी

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

सौ. विद्या पराडकर

 कवितेचा उत्सव 

☆ मनमयुरा…  ☆ सौ. विद्या पराडकर ☆

मनमयुरा तू नाचूनी घे

श्रावणातल्या जलधारानी

देहपिसारा भिजवूनी घे

मनमयुरा तू नाचूनी घे

शितल ओला सुगंध हर्षित स्पर्श तो

वृक्ष लतांना बहर आणि जो

आनंदाने होऊनी बेहोश

चरचरा तू पाहून घे

मेघ गर्जना होता अंबरी

दामिनी येई पळत भूवरी

तेजस्वी पण क्षणभर त्या

ज्योतीला तू पाहूनी घे

गंधयुक्त या वातावरणी

समरसतेच्या विशाल अंगणी

जलाशयाच्या दर्पणातूनी

प्रतिबिंब अपुले पाहूनी घे

देवदूत तू  जीवनाधार

मानवाचा आधार

प्रसन्नतेचे मळे पिकवूनी

दे प्राशाया अमृत संजीवनी

मनमयुरा तू नाचुनी घे

श्रावणातल्या जलधारानी

देह पिसाराभिजवून घे

मनमयुरा तू नाचुनी घे.     

© सौ. विद्या पराडकर

पुणे.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी

 कवितेचा उत्सव 

☆ मागणे हे एक देवा 🌺☆ श्री सुहास सोहोनी ☆ 

विठ्ठल तू, माउली विठू तू,

तू पंढरिचा राजा, ॥

माय-बाप, कानडा, सखा तू

ये भक्तांच्या काजा, ॥

दामाजीचा महार तू,

तू एक्याचा पाणक्या ॥

बहिणाई आणखी जनीचा

जिवलग तू, तू सखा ॥

अभंग गाथा रूप तुझे अन्

ओवी चित्र तुझे ॥

कांद-मुळा-भाजीत घातले

रंग आगळे तुझे  ॥

सुईस जोडी दोर दिला तू

मडक्यासी आकार

दिधली पिवळी चमक सुवर्णा

उष्ट्याला जोहार ॥

भक्तिरसाचा मळा बहरला

ये भक्तीला बहर ॥

चंद्रभागेच्या वाळवंटि ये

भक्तिनदीला पूर ॥

वारस सारे अम्ही अज्ञजन

संतसज्जनांचे ॥

विठुराया वरदान अम्हा दे

कृपाकटाक्षाचे ॥

🌺

© सुहास सोहोनी 

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ सरी आठवांच्या… ☆ सुश्री अरूणा मुल्हेरकर ☆ 

 (वृत्त~दिंडी)

नभी दाटी ही गर्दघन ढगांची

तशी गर्दी का स्मृतींच्या थरांची ॥१॥

पावसाच्या ह्या सरी मोद देती

भिजत असताना आठवणी येती ॥२॥

विसरते मी स्थळ काळ बंधनांना

पुन्हा रमते मी जागवित स्मृतींना॥३॥

आठवे मज ते स्वैर बाल्य सारे

माय बापाचे लाड कोड प्यारे ॥४॥

दिले संस्कारा किती मला त्यांनी

उभे केले मज जीवनी सुखानी ॥५॥

भेट होता त्या राजकुमाराची

गंध दरवळला वाट यौवनाची ॥६॥

प्रीत सुमने ती उधळली सुखाने

बकुळ पुष्पासम जाहलो मनाने ॥७॥

चिंब भिजलो की प्रेम पावसाने

हरित झालो ना प्रीति  भाषणाने ॥८॥

दिवस गेले ते हवेसम उडाले

नाटकाचे हे अंक सर्व सरले ॥९॥

चित्त आता मम हरि नामस्मरणी

समज आली ही प्रभू तुझी करणी ॥१०॥

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈

श्री सुहास रघुनाथ पंडित

 कवितेचा उत्सव 

☆ अबोलिची फुले… ☆ श्री सुहास रघुनाथ पंडित ☆

अबोलिची फुले तुझ्यासाठी वेचताना

गोळा होतात सा-या आठवणी.

आठवतात ते क्षण

संध्याकाळचे,बागेमधले,

तुडवलेल्या पायवाटा,

कुरवाळलेली रानफुले,

बोलण्यापेक्षा न बोलण्यात

घालवलेले तास न् तास

सहवासातली मूक भाषा

स्पर्शाच्या लिपीने लिहीलेली

आज जरा जास्तच हळवेपणानं

आठवतय हे सारं

तुझ्यासाठी फुलं वेचताना.

आपलं गुपीत फक्त

फुलांनाच तर ठाऊक होतं

म्हणून तर नसेल?

© श्री सुहास रघुनाथ पंडित

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. जयश्री पाटील

 कवितेच्या उत्सव 

☆ आला दिनकर नभी… ☆ सौ. जयश्री पाटील ☆

आला नभी दिनकर

पूर्व दिशा उजळली

तिमिरातून सृष्टीला

हलकेच जाग आली

कोवळी किरणे उतरली

कळ्या फुले उमलली

दवबिंदूंची शोभा बघा

पानो पानी  बहरली

पक्षांचे किलबिल कूजन

फांदी फांदी वर नर्तन

फुलपाखरांचे भिरभिरणे

कोकिळेचे मधुर गायन

सुखद गारवा प्रभाती

मंदिरी स्वर आरती

गाई गोठ्यात हंबरती

वासरे प्रेमे बिलगती

सांगे उठ मानवाला

दिनकर रोज सकाळी

घे उंच उंच भरारी

तळप मजसम त्रिकाळी

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈