Marathi Kavita
श्रीशैल चौगुले
कवितेचा उत्सव
☆ गुरुचरण… ☆ श्रीशैल चौगुले ☆
☆
गुरु चरण / मन शरण/
नित्य स्मरण/देवधर्म//
*
गुरु मंदिर/भाव भक्तीत/
भव मुक्तीत/ज्ञानदान //
*
क्षमा सकळ/पुण्य नि पाप/
जन्म उःशाप/आत्मबंदी //
*
दिक्षा दर्शन / नाश वेदना /
मंत्र साधना//जीवलोकी //
*
गुरु महात्म / ध्यान लोचनी/
कर्म संचनी /प्रारब्धात//
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
सांज झाली सख्या रे... श्री आशिष बिवलकर ☆
☆
सांज झाली सख्या रे,
दिनकर गेला अस्तासी |
कातरवेळ छळते मज,
घोर जडला हृदयासी |
*
दिल्या घेतल्या वचन सुमनांची,
झालीत आता निर्माल्य |
वाटेवर एकटाच सोडून गेलास,
हृदयी दिलेस शल्य |
*
तुच घातलीस हृदयास फुंकर,
ओवाळून टाकला रे जीव तुझ्यावर |
घाव देऊन दूर गेलास,
व्रण चिघळतात रोज सांजवातेवर |
*
पक्षीही परतले पुन्हा घरट्यात,
किलबिलाटही नकोसा तो मना |
भयाण शांततेची ओढ लागली,
कुणास सांगू रे विरह वेदना |
*
धावून येतोय तिमिर अंगावर,
किर्रर्र आवाज घुमतोय भोवती |
सहवास नकोय कुणाचा,
एकांत हाच वाटतोय खरा सोबती |
*
सुगंध दरवळतोय रातराणीचा,
नाही उरलीय गंधातली गोडी |
अर्ध्यावर साथ का रे सोडलीस,
सुटता सुटत नाही रे कोडी |
*
नक्षत्रांची रास नभांगणात,
खिजवतोय मज शुक्रतारा |
प्रीत आपली विरून गेली,
लोचनातून वाहतेय धारा |
*
दोर कापलेत परतीचे,
माझ्याशीच मी लढतेय |
उतरला साजशृंगार सारा,
तुझ्याचसाठी रे सख्या झुरतेय |
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ काळोख… ☆ प्रा तुकाराम दादा पाटील ☆
☆
मी संत कुळीचा झालो संतांच्या सहवासाने
मन झाले साक्षात्कारी भक्तीच्या अभिमानाने
*
नादान जगाचे वारे घोंगावत होते भवती
मज वास्तव कळले माझे गाथेची वाचत पाने
*
भवसागर ओलांडाया झालीच तयारी होती
देहाची सुंदर नौका तरताना आनंदाने
*
काळोख गडद करणारे होतेच बिलंदर काही
त्यांनीच ठरवल्या जाती स्वार्थाच्या हव्यासाने
*
भलतेच कुणी तर होते समतेला तुडवत पायी
त्यानीच ठरवल्या जाती स्वार्थाच्या हव्यासाने
*
आताही होते आहे रणकंदन भलते येथे
सोसावे कितपत कोणी हे सगळे अपमानाने
*
खोट्याच्या वाजे डंका सत्याला नाही थारा
हे घडते सारे आहे कोणाच्या कर्तृत्वाने
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
डॉ. शैलजा करोडे
कवितेचा उत्सव
☆ “तुझ्या प्रेमात रमले…” ☆ डॉ. शैलजा करोडे ☆
☆
नव्या एका दुनियेत
मन माझे विहरले
हळू गालात हसता
रूप पुन्हा बहरले
*
जग भासते सुंदर
उणे न काही वाटते
चारीदिशा प्रितगंध
प्रेम मनात दाटते
*
थंड हवेची झुळूक
अंगी शहारे आणले
प्रिया बावरी मी झाले
तुझ्या प्रेमात रंगले
*
आठवता गोड क्षण
स्वर जणु कानी येतो
त्याचा पाठलाग मला
सैरभैर रानी नेतो
*
तुझ्या प्रेमात रमले
विसरले तृष्णा भूक
ओठ मिटून घेतले
शब्द झालेयात मूक
*
भाव माझ्या मनातले
बघ गीत जसे जमले
सात जन्म साथ हवी
तुझ्या प्रेमात रमले
☆
© डॉ. शैलजा करोडे (काव्यशलाका)
नेरुळ नवी मुंबई मो. 9764808391
ईमेल – [email protected]
सुश्री दीप्ती कुलकर्णी
कवितेचा उत्सव
☆ वसंत हा आला… ☆ सुश्री दीप्ती कुलकर्णी ☆
☆
आला वसंत हा आला
कूजनात जो रंगला
पंचमात आळविला
सुरांसवे तो दंगला ||१||
*
पर्णपाचू तो सजला
मोद मना-मना झाला
हर्षभरे तो नटला
स्वर्ग थिटा ही भासला ||२||
*
पुष्पासंगे बहरला
बहुरंगे प्रगटला
पीत, रक्त, नील छटा
पुष्पा देत जो सुटला ||३||
*
गालिचाही मखमाली
वाटेवरी झळकला
नेत्रद्वया सुखदायी
पवनाने उधळला ४||
*
मोहरला आम्रतरु
गंधानेही तो खुलला
ऋतुराज हा पातला
येता जो हर्ष फुलला ||५||
☆
© सुश्री दीप्ती कोदंड कुलकर्णी
कोल्हापूर
भ्र.९५५२४४८४६१
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
☆
खाजगी क्षेत्रात काम करता
आपोआप आपले होते गाढव
कामाचा बोजा वाढत जाता
जगण होऊन जातं बेचव
*
बाॅसच्या अपेक्षांची शिडी
दिवसेंदिवस वाढत जाते
खाली मान घालून काम करणे
असेच आपसूक घडत जाते
*
बंगला होतो गाडी येते
कापड चोपडासह अंगी भारी साडी येते
मिळवायचं ते मिळवून होतं
टिकवण्यास्तव लढाई चालूच रहाते
सुखनैव जगायचे तेवढे राहून जाते
*
सतत मनाची ओढाताण
शरीर थकते नसते भान
गाढव होऊन ओझे वहाता
स्वतःसाठी किती जगतो. .
याचे रहात नाही भान
☆
© सुश्री नीलांबरी शिर्के
म. ना. दे. (श्री मयुरेश देशपांडे)
कवितेचा उत्सव
☆ वसंता… ☆ म. ना. दे. (श्री मयुरेश देशपांडे) ☆
☆
आला का वसंता, धिम्या पावलाने
मागे पानझड, ऋतू पालटाने
*
आलीच कोकीळ, घेऊनी सांगावा
सुटला सुगंध, करण्या कांगावा
*
तुझ्या आगमने, कात टाकतील
धरुनी अंकुरे, सारे सजतील
*
आता स्फूरतील, गाणी प्रेमाचीच
साज चढायाला, साथ सुरांचीच
*
बरं का वसंता, तुझ्या पंचमीला
माय सरस्वती, ठेवितो पूजेला
☆
कवी : म. ना. देशपांडे
(होरापंडीत मयुरेश देशपांडे)
+९१ ८९७५३ १२०५९
https://www.facebook.com/majhyaoli/
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री त्रिशला शहा
कवितेचा उत्सव
☆ जुनी नवी संस्कृती… ☆ सुश्री त्रिशला शहा ☆
☆
जुने सारे बदलत चालले
नव्या संस्कृती चे वारे आले
*
रहाणीमान अन सवयी साऱ्या
नव्या रुपाने बदलत गेल्या
*
रेडिओवरच्या रुपक, श्रुतिका
टिव्हीवरच्या मालिका झाल्या
*
सायकल जाऊन दुचाकी आली
फोनसुध्दा मग स्मार्ट झाले
*
कपड्यांच्या तर कितीक फँशन
रोज नव्याने बाजारात आल्या
*
शिक्षणातही बदल तितकाच
नविन अभ्यासक्रमात झाला
*
पोळी, भाकरी मागे पडली
पिझ्झा बर्गरची आवड झाली
*
जुन्या संस्कृतीची कास आगळी
नव्याची मात्र धाटणीच न्यारी
*
काही बदल जरी स्तुत्य वाटले
तरी जुनेही काही वाईट नव्हते
*
जुन्यातील काही अवघड वळणे
नव्यामुळे थोडे सोपे झाले
*
कितीही जपली जुनी संस्कृती
तरी नविनचे करु स्वागत दारी
☆
© सुश्री त्रिशला शहा
कविराज विजय यशवंत सातपुते
कवितेचा उत्सव # 242 – विजय साहित्य
☆ राजे आमुचे शिवाजी..! ☆
(अष्टाक्षरी रचना)
☆
साल सोळाशेचे तीस
एकोणीस फेब्रुवारी
जन्मा आले शिवराय
गडावर शिवनेरी….! १
*
शिव जन्मोत्सव करू
शौर्य तेज कीर्ती गाऊ
माय जिजाऊंचे स्वत्व
रूप स्वराज्याचे पाहू..! २
*
किल्ले रायरेश्वरात
स्वराज्याची आणभाक
हर हर महादेव
शूर मावळ्यांची हाक…! ३
*
असो पन्हाळीचा वेढा
वध अफ्झल खानाचा
आग्र्याहून सुटकेचा
पेच प्रसंग धैर्याचा…! ४
*
वेगवान हालचाली
तंत्र गनिमी काव्याचे
युद्ध,शौर्य,प्रशिक्षण
मूर्त रूप शासकाचे…! ५
*
लढा मुघल सत्तेशी
स्वराज्याच्या विरोधका
शाही आदिल कुतुब
नष्ट गुलामीचा ठसा…! ६
*
नौदलाचे आरमार
शिस्तबद्ध संघटन
अष्ट प्रधान मंडळ
प्रजाहित प्रशासन…! ७
*
रायगडी अभिषेक
स्वराज्याचे छत्रपती
राजे आमुचे शिवाजी
हृदी जागृत महती…! ८
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री हरिश्चंद्र कोठावदे
कवितेचा उत्सव
☆ खुशाल टाळा… ☆ श्री हरिश्चंद्र कोठावदे ☆
☆
खुशाल टाळा टाळणार पण मजला कुठवर
चुकवा रस्ते, द्या गुंगारा
असेन मी तर हर वळणावर
*
नगरीमधुनी खुशाल तुमच्या करा बहिष्कृत
वेसपारच्या वाड्यावस्त्या
उत्सुक माझे करण्या स्वागत
*
लपवाछपवी फसवाफसवी सोपी नाही
क्ष-किरणांच्या नजरेमधुनी
दगा आतला सुटणे नाही
*
गृहीत धरणे सदाकदा मज धोकादायक
प्रशांत सागर परी तळाशी
वडवानल मी खात्रीलायक
*
कृतघ्नतेने तुमच्या भरला गळवट रांजण
आज क्षमेचे शांत चांदणे
उद्या कदाचित अग्निप्रभंजन
*
सोन्याची ही तुमची लंका तुमचे भूषण
अभिमानी ही माझी फकिरी
माझ्यासाठी माझे त्रिभुवन!
☆
© श्री हरिश्चंद्र कोठावदे
२५. ११. २०२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
