सुश्री प्रभा सोनवणे
कवितेच्या प्रदेशात # 228
☆ मॅडम ☆ सुश्री प्रभा सोनवणे ☆
(स्मृति शेष – प्रोफेसर वंदना जोशी, नासिक)
☆
ते काॅलेजचे फुलपंखी दिवस,
नेहमीच आठवतात,
मॅडम, तुमच्या घरी जागवलेली,
हरतालिका!
कुणी कुणी म्हटलेली गाणी!
माया नं म्हटलेलं,
“आजकल तेरे मेरे प्यार के चर्चे “
लक्षात राहिलंय!
मला ते काॅलेज सोडावं लागलं,
मधेच—–
पण तुम्ही भेटत राहिलात,
नंतरही,
कुठल्या कुठल्या कविसंमेलनात!
“तू माझी विद्यार्थिनी आहेस,
याचा खूप अभिमान वाटतो “
असं म्हणायचा नेहमी,
मॅडम कविता त्याच काॅलेजात गवसली,
कुठे ? कशी आणि का?
ते सांगायचं मात्र राहून गेलं….
कधीतरी निवांत भेटू….
“काही प्रश्न विचारायचे आहेत”
म्हणालात!
“सगळ्या आवडत्या विद्यार्थिनींचं गेट-टुगेदर
घेऊया शिरूरच्या माझ्या “मन्वंतर” बंगल्यात!”
दोन महिन्यांपूर्वीच म्हणालात,
आणि अशा कशा निघून गेलात?
न परतीच्या प्रवासाला ?
माझा अर्धवट सोडवलेला पेपर,
मी आता कुणाकडे पाठवू…
तपासायला??
परत एकदा,
मी निरुत्तर… अनुत्तीर्णच,
परिक्षा न देताच!!!!
☆
© प्रभा सोनवणे
३० मे २०२३
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
