श्री नंदकुमार पंडित वडेर
प्रतिमेच्या पलिकडले
☆ जाऊ नको दूर तू… ☆ श्री नंदकुमार पंडित वडेर ☆
… सखे थोडं अजून थांबयचं होतसं…
..पावसाची सर ओसरल्यावर निघायचं होतसं…
..वेडे आतातर आलीस मला भेटायला…
..चल निघते बघ फारच उशीर झाला..
..असं लागलीच का म्हणायला…
..अजूनही नेहमीचा काळोख कुठयं पसरायला…
..खट्याळ पावसाचे काळ्या ढगांनी खोड्या काढल्या..
..अंधाराची शाल पांघरून बसलाय…
..तुझं नेहमी असचं असतं यायचं उशीरानं…
..नि जायचं मात्र लवकरच असतं…
..आज त्या पावसाचं कारणाची केलीस ना ढाल…
..तू किती कठोर आहेस..
..कशी कळावी तुला माझ्या हृदयाची उलाघाल…
..चल निघते उदयाला भेटू असं म्हणून …
..छत्री उघडून भर पावसातून निघालीस…
..दूर दूर जाताना तुझी लांब लांब सावली…
..मात्र मला वाकुल्या दावत गेली…
..पावसाचे ते तुझ्या छत्रीवर पडणाऱ्या टपोऱ्या …
..सरींनी डोळेमिचकावून हसण्यावारी माझी चेष्टा केली… .
..भेटीच्या आठवणीनें रस्ता ओलाचिंब झाला..
…मनात माझ्या भावनांचा पूर दाटून आला…
..भेटीची अतृप्तता वाढवून गेला…
..खटटू मनाचा हटट तू ऐकायला हवी होतीस… ..
.. सखे थोडं अजून थांबयचं ना होतसं…
..पावसाची सर ओसरल्यावर निघायचं होतसं…
..वेडे आताच तर आलीस मला भेटायला…
..चल निघते बघ फारच उशीर झाला…
..असं लागलीसच का म्हणायला…
© नंदकुमार पंडित वडेर
विश्रामबाग, सांगली
मोबाईल-99209 78470 ईमेल –nandkumarpwader@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
