कविराज विजय यशवंत सातपुते
कवितेचा उत्सव # 162 – विजय साहित्य
☆ वसंत गीते ☆ कविराज विजय यशवंत सातपुते ☆
भावमनातील वसंत गीते ,पुन्हा पुन्हा ऐकावी .
हात घेऊनी हातामधे, ही चैत्रवेल झुलवावी.
शब्दकळ्यांच्या हिंदोळ्यावर ,भावगौर सजवावी.
अर्थगर्भीच्या सदाशिवासह ,अनुदिनी नित्य पुजावी.
सप्तपदीची चांदण गाथा, पदोपदी नांदावी .
कधी मागुती कधी बरोबर, साथ तुझी लाभावी .
संसाराचा सारीपाट हा, उमाशंकरा चुकला नाही .
खेळत गेलो खेळ नव्याने ,तरी वाटते बाकी काही.
सहजीवनाच्या मनांगणी त्या ,स्वप्न पाउले वाजावी .
अनुरागाची प्रेमप्रीतीची ,अविरत शब्दफुले बरसावी.
सदा घेतला राग समजुनी , कधी कोपली स्वप्नाली.
वसंततिलका मोहरताना, चुकभूल ती द्यावी घ्यावी.
पानगळीचे ऋतू देखणे, त्यात पाउले नाचावी .
चैत्रपौर्णिमा नव्या पिढीची,त्यात आयुष्ये मिसळावी.
सांजवेळ ही आयुष्याची, पुन्हा नव्याने वाचावी .
आठवणीतून जन्मा येते ,अशी कविता शोधावी.
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
