श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 166
☆ ना चूक पाखरांची … ☆
झालीत यंत्र साऱ्या मुडदाड माणसांची
किंमत कुठे कुणाला डोळ्यांतल्या झऱ्यांची
बैलास काम आता उरलेच फार नाही
बैला विनाच चाके पळतात ह्या रथाची
देहास अर्थ नाही काहीच हा कसा तो
जळतो तरी दिसेना का राख कापराची ?
मातीस खोल खड्डे लोखंड पेरलेले
उगवून छान आली स्वप्ने इथे घरांची
सोडून सर्व गेले सरणावरी मला ते
जळतेय सोबतीला मोळीच लाकडांची
सारेच उच्च शिक्षित शेती कुणी करावी
शेते उपेक्षतेने बघतात वाट त्यांची
आकाश झेप घ्यावी माझीच तीव्र ईच्छा
गेले उडून पक्षी ना चूक पाखरांची
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈