श्री हरिश्चंद्र कोठावदे
कवितेचा उत्सव
☆ बेपत्ता… ☆ श्री हरिश्चंद्र कोठावदे ☆
(वृत्त : पादाकुलक)
किती दिसांनी त्यक्त मंदिरी
येवुन कोणी दिवा लावला
घंटानादे ढळे समाधी
मूर्तीमधला देव जागला !
तुडुंब भरल्या कृष्णघनांचे
किती दिसांनी ऊर मोकळे
चिंब धरित्री भिनल्या धारा
नवसृजनाचे पुन्हा सोहळे
इतिहासाची गहाळ पाने
पत्ता शोधित आली दारी
दंतकथांचे हो पारायण
नवसमराची पुन्हा तयारी !
किती दिसांनी दुभंग वारुळ
एक तपाची होय सांगता
नवीन स्पंदन,नव संजीवन
नवा अनंत नि उरात आता !
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈