Category: कवितेचा उत्सव 2

श्री सुनील देशपांडे

 कवितेचा उत्सव 

☆ “कैसे द्यावे उत्तर…” ☆ श्री सुनील देशपांडे ☆

जबाबदारी नको कोणती

हक्कासाठी मारू पत्थर

झुंडशाहीला लोकशाहीने

सांगा कैसे द्यावे उत्तर

मला हवे ते मला मिळावे

मी म्हणतो ते एकच उत्तर

ठोकशाहीला लोकशाहीने

सांगा कैसे द्यावे उत्तर

मोडू तोडू सदा कायदा

नशेत बरळू आम्ही निरंतर

झोकशाहीला लोकशाहीने

सांगा कैसे द्यावे उत्तर

सीमेवरती शत्रू ठाकला

सडेतोड ते देऊ उत्तर

अराजकाला लोकशाहीने

सांगा कैसे द्यावे उत्तर

© श्री सुनील देशपांडे

मो – 9657709640

email : [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ नंदादीप… ☆ प्रा तुकाराम दादा पाटील ☆

मनाच्या सुरक्षित कोप-यात

सतत तेवणारा

तुझा नंदादीप

भवसागरात भरकटलेल्या

माझ्या आकांक्षांच्या गलबताला किना-यावर प्रकाशमान झालेल्या परोपकारी दिपस्तंभासारखा वाटतो.

तो खुणावत असतो,

सांगत असतो,

ये , थांब इथं,

हा संपन्न किनारा सुरक्षित आहे तुझ्यासाठी.

इथ भक्कमपणे पाय रोवून बघ एकदा

आकाशाकडे

कर सेवा विशाल धरतीची

ती स्वीकारतील तुला,

पुरवील तुझ्या सर्व आकांक्षा,

पण अट एकच,

श्रद्धेनं वास्तवाला आलिंगन देण्याची,

चालत राहण्याची, .

स्वकष्टाने प्रकाशित होण्याची,

तरंगत राहून स्वप्नं

पूर्ण होत नाहीत कधी,

इथं वावरणारे सारेच तुला

सटीक समृद्धिची भाषा शिकवतील

दिशा दाखवतील

उज्वलतेच्या

कारण इथं अस्तित्वात असलेलं सारं

इथंच वाढणारं आणि

इथंच  मुरणारं आहे.

इथे नाही गाज झुलवत ठेवणारी.

इथल्या प्रत्येक प्रकृतीला तुला मिठी मारता येईल माझीच म्हणून.

मग तुला  नंदादीपाची

गरज भासणार नाही

कालांतराने तूच होशील नंदादीप वास्तवतेतला, पुजणारा, भजणारा, मानणारा.

आणि तिच्याच चरणी लीन होणारा.

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

 कवितेचा उत्सव 

☆ मी म्हणाले… ☆ श्रीमती उज्ज्वला केळकर ☆

मी म्हणाले , ये

लवकर ये

रिमझिमत ये

फूलकोषात झिरपत ये

नदी-नाले भरत ये

बीजातला अंकुर जागवत ये

नवे जीवन घडवत ये

सृष्टी सुजलाम् सुफलाम् करत ये

तू आलास

लगेचच आलास

दौडत आलास. झोडत आलास.

फूल-पाने मोडत-तोडत

नदी-नाल्यांना पूर आणत

बीजातला अंकुर कुजवत

अवघे जीवन नष्ट करत

सृष्टीमध्ये विनाश घडवत

तू आलास

असा रे कसा आलास ?

© श्रीमती उज्ज्वला केळकर

संपर्क -17 16/2 ‘गायत्री’ प्लॉट नं. 12, वसंत दादा साखर कामगारभावन के पास , सांगली 416416 महाराष्ट्र

मो. 9403310170, email-id – [email protected] 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ विजया कैलास हिरेमठ

 कवितेचा उत्सव 

☆ “मी आणि माझा एकांत” ☆ सौ विजया कैलास हिरेमठ ☆

मी आणि माझा एकांत

यांची पडता गाठ

एक नाही दोन नाही

प्रश्न सुटतात साठ…

माझ्यातील मला

दिशा नवी मिळते

काय चूक काय बरोबर

इथेच तर कळते..

कधी कुठं त्याला गाठायचं

हे लागलं कळायला

त्याची न माझी वेळ मग

आपोआप लागली जुळायला…

जगाच्या पसाऱ्यातही

मी असते पसार

कितीही असली गर्दी

वाटतो एकांताचाच आधार…

आपल्यातच दडलेले रहस्य

इथेच तर उलगडते

कमी जास्त सारं काही

स्वतःमध्येच सापडते….

त्याच्यासोबत प्रत्येक क्षण

असतो नवा कोरा

दिवस असो वा रात्र

वाटतो वेळ अपुरा…

💞शब्दकळी विजया💞

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.उज्वला सुहास सहस्त्रबुद्धे

 कवितेचा उत्सव 

☆ चांद्रयान मोहीम ☆ सौ.उज्वला सुहास सहस्त्रबुद्धे ☆

 काल चांदणे खुदकन हसले,

   नभांगणी या रात्री !

अवनी वरच्या यान भेटीने,

   केली जगाशी मैत्री !……१

यान उतरले चंद्रावरती,

  पहात होत्या चांदण्या!

चमचम करीत सज्ज जाहल्या,

  स्वागतास जाण्या !…..२

पहात होते अनुपम सोहळा,

 पृथ्वीवरचे जन !

आनंदाने न्हाऊन  गेले ,

भारतीयांचे मन !……३

भारत भूचा विजय दिन,

  असे हा अवर्णनीय!

चांद्रयानाने कोरले वरती,

   सुवर्णाचे ते पाय……४

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

 कवितेचा उत्सव 

☆ ‘चांद्रयान – ३‘ ☆ सुश्री प्रणिता खंडकर ☆

आकाशाशी जोडले नाते धरणीमातेचे,

 चांद्रयान चंद्रावर गेले, तिरंगा डौलाने फडके!

 शास्त्रज्ञांनी देखियले हो स्वप्न भव्य येथे,

  इस्त्रोमधूनी हालवली मग पहा त्यांनी सूत्रे,

 प्रयत्न त्यांचे आज पहा हे यशस्वी झाले,

चांद्रयान चंद्रावर गेले, तिरंगा डौलाने फडके! ||१||

  चंद्रावरती प्रथम उतरूनी, विक्रम हा केला ,

  जगामध्ये या  वाजतसे हो भारताचा डंका,

  बांधली  राखी चांदोबाला, आज वसुंधरेने,

 चांद्रयान चंद्रावर गेले, तिरंगा डौलाने फडके! ||२||

  कडकडाट टाळ्यांचा झाला, दुमदुमली अवनी,

  शास्त्रज्ञांच्या डोळ्यांमधूनी आनंदाश्रू झरती,

  सार्थक झाले आज वाटते त्यांच्या तपस्येचे,

  चांद्रयान चंद्रावर गेले, तिरंगा डौलाने फडके! ||३||

    अपयशातून रचली आम्ही आज  यशोगाथा,

       ठेवू उन्नत सदैव आम्ही भारतभूचा  माथा,

     रवी-शुक्र हे लक्ष्य आमुचे, आता या पुढचे,

    चांद्रयान चंद्रावर गेले, तिरंगा डौलाने फडके! ||४||

    आकाशाशी जोडले नाते धरणीमातेचे,

     चांद्रयान चंद्रावर गेले, तिरंगा डौलाने फडके!

© सुश्री प्रणिता खंडकर

संपर्क – सध्या वास्तव्य… डोंबिवली, जि. ठाणे.

ईमेल [email protected] केवळ वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈