मराठी साहित्य – कवितेचा उत्सव ☆ यावी सर हलकीच आता… ☆ श्री सुहास रघुनाथ पंडित ☆

By Hemant Bawankar1 Comment

श्री सुहास रघुनाथ पंडित

? कवितेचा उत्सव ?

☆ यावी सर हलकीच आता… ☆ श्री सुहास रघुनाथ पंडित ☆

ग्रीष्मामधले नको निखारे,नको उन्हाचा भाता

यावी सर हलकीच आता

 

कृष्णघनांची व्हावी गर्दी यावे थेंब टपोरे

माळावरूनी फिरून यावे मृद्गंधाचे  वारे

बघता बघता चिंब भिजावा अवघा डोंगरमाथा

यावी सर हलकीच आता

 

फडफडणारे पंख भिजावे,तुषार पानोपानी

आसुसलेले गवत नहावे पिवळ्या कुरणामधूनी

दूर दिसावी माळ खगांची नभात उडता उडता

यावी सर हलकीच आता

 

रंगमंच हा सहज फिरावा क्षणात दुसरा यावा

कुंचल्यातूनी जलधारांच्या अवघा ग्रीष्म पुसावा

नूर मनाचा बदलून जावा वसंत सरता सरता

यावी सर हलकीच आता

 

ग्रीष्मामधले नको निखारे नको उन्हाचा  भाता

यावी सर हलकीच आता.

 

© श्री सुहास रघुनाथ पंडित

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ रंगीत भोंगे… ☆ श्री उदय गोपीनाथ पोवळे ☆

By Hemant BawankarNo Comments

श्री उदय गोपीनाथ पोवळे

? कवितेचा उत्सव ?

☆ रंगीत भोंगे… ☆ श्री उदय गोपीनाथ पोवळे ☆

दोन भोंगे समरासमोर, मिरवत होते दिमाखात

आरती अजान गात होते, रहात होते एकांतात

 

दृष्ट लागली देवाचीच, अल्ल्लालाही कबूल नव्हते

भोंग्यांमुळेच जाग यायची, दोघानांही ते मान्य होते

 

न्यायदेवतेने आदेश दिले, आवाजावर बंधन घातले

समस्त भोंगे जातीवर, मर्यादेचे आभाळ कोसळले

 

स्वतःच्याच रुबाबात दोघे, आदेशाचे पालन नव्हते

भटजी मौलवी हेच त्यांचे, पालन कर्ता हार होते

 

राजकर्त्यांना कैफ आला, निवडणुका त्या जवळ आल्या

जातपातीच्या चुलीवर, पोळ्या त्यांनी भाजायला घेतल्या

 

शांत असलेल्या भोंग्यांनाही, भगवे हिरवे रंग चढले

अजान हनुमानचालीसानी, महा राष्ट्र ते दुमदुमले

 

भगव्या हिरव्यांनी ठरविले, गळे आपले नाही कापायचे

नेत्यांसाठी आपणच आपले, बळी कदापी नाही घ्यायचे

 

शेवटी ठरविले भोंग्यांनी, आपणच ह्यातून मार्ग काढू

नेत्यांसाठी न भांडता, आपणच वेळेचे बंधन पाळू

 

सामोपचाराने दोघांनी, पहाटेचा आवाज विसावला

भगव्या हिरव्या भोंग्यांनी, शांतीचा सफेद स्विकारला

 

काकड आरतीच्या भोंग्यालाही, वेळेचे बंधन झाले

हिंदू देशातील महा राष्ट्राचे, समस्त डोळे पाणावले

 

मुगींच्या पायांतील घुंगुरांचा, आवाजही वर पोचत असतो

भोंग्यांशिवाय तुमचा आवाज, त्यांना ऐकायला येत असतो

 

भोंग्यांशिवाय मनातला हुंकार, त्यांच्या हृदयी पोचत असतो

भोंग्यांशिवाय मनातला भाव, त्यांच्या जास्त जवळचा असतो

 

© श्री उदय गोपीनाथ पोवळे

१५-०५-२०२२

ठाणे

मोबा. ९८९२९५७००५ 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ सौन्दर्य घळीचे … ! ☆ श्री प्रमोद वामन वर्तक

By Hemant BawankarNo Comments

श्री प्रमोद वामन वर्तक

?️?  चित्रकाव्य  ?️?

☆ ? सौन्दर्य घळीचे … ! ? ☆ श्री प्रमोद वामन वर्तक ☆ 

☆

धुरकट निळाई धुक्याची

पसरे दो डोंगरांच्या कुशीत,

हिरव्या पिवळ्या लव्हाळ्या

लटकती दगडांच्या कपारीत !

☆

शुभ्र दुधाळ जलप्रपात

पडे संथ नदी जळात,

वाटे नदीपात्री फिरावे

सॊदर्य घळीचे न्याहाळत !

☆

छायाचित्र – प्रकाश चितळे, ठाणे.

© प्रमोद वामन वर्तक

ठाणे.

१०-०५-२०२२

मो – 9892561086

ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ जीवन… ☆ सुश्री अरूणा मुल्हेरकर☆

By Hemant BawankarNo Comments

सुश्री अरूणा मुल्हेरकर

? कवितेचा उत्सव ?

☆ जीवन… ☆ सुश्री अरूणा मुल्हेरकर ☆ 

जीवन आहे नितांत सुंदर  ध्यान असू दे जगताना

विसरुन जा तू गत दुःखांना नको खिन्नता हसताना

 

आयुष्याच्या वाटेवरती वळणे असली फार जरी

त्या वळणांवर हसत रहावे सुखदुःखांना बघताना

 

माहेराचे अंगण सोडुन लेक निघाली सासरला

कष्टी झाले मन आईचे निरोप तिजला देताना

 

चुकला नाही वनवासही जो रामाला अन् सीतेला

प्राक्तनात जे लिहिले आहे ते बघते मी घडताना

 

संसाराची दोनच चाके आपण दोघे समजावे

सुखदुःखांना सोबत घेऊ संसारातच रमताना

 

चंदन झिजुनी गंध पसरतो वार्‍यासोबत सभोवती

संसाराचा गाडा उपसत आई बघते झिजताना

 

नाही केव्हा विचार आला छंद स्वतःचे जपण्याचा

कायम तत्पर दुसर्‍यासाठी अनेक कामे करताना

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ रंजना जी यांचे साहित्य # 103 – नकोस देऊ आज साजणा ☆ श्रीमती रंजना मधुकरराव लसणे ☆

By Hemant BawankarNo Comments

श्रीमती रंजना मधुकरराव लसणे 

? कवितेचा उत्सव ?

☆ रंजना जी यांचे साहित्य # 103 – नकोस देऊ आज साजणा ☆

नकोस देऊ आज साजणा भास नव्याने सारे।

आठवणींच्या मोर पिसांचे रंग उधळती तारे।

 

मऊ मुलायम कुरणावरती प्रीत पाखरू येई।

साद घालता ओढ लाविते नित्य जिवाला कारे।

 

शब्दतार तव नाद छेडती धुंद जणू हे गाणे।

मुग्ध जाहला देह स्वरांनी भाव अनामिक न्यारे।

 

गुंजन करितो भ्रमर कळीशी गूज तयांचे चाले।

अधर थरथरे अवचित जुळता नयन राजसा घारे।

 

तव स्पर्शाची किमया न्यारी गाली येई लाली।

स्पर्श फुलांचा गंध दरवळे दाही दिशांत वारे।

©  रंजना मधुकर लसणे

आखाडा बाळापूर, जिल्हा हिंगोली

9960128105

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ नात्याची विण… ☆ सौ. पल्लवी ऋषिकेश कुलकर्णी ☆

By Hemant Bawankar1 Comment

सौ. पल्लवी ऋषिकेश कुलकर्णी

? कवितेचा उत्सव ?

☆ नात्याची विण… ☆ सौ. पल्लवी ऋषिकेश कुलकर्णी ☆

चुली चुली तुला एक विचारु काय ग

आई आणि तुझं नातं आहे तरी काय ग …. १

 

दिवसभर एकमेकींच्यात गुंतलेल्या असता

एवढे हितगुज तरी काय करता

 एकमेकींच्यात असे तुम्ही सुखातता काय ग

आई आणि तुझं नातं आहे तरी काय ग ….. २

 

तिच्या खरबडीर हाताने तुला ती सारवते

तुझ्या उबित ती आपल्या वेदनांना हरवते

असेच तुमचे नाते मुक पणे फुलवता काय ग

आई आणि तुझं नातं आहे तरी काय ग ….. ३

 

तिच्या मनातील तगमग तुझ्या पोटी धगधगते

तुझ्या पोटातील माया तिच्या हाती जाणवते

सुख दुःख दोघींचे तुम्ही वाटुन घेता काय ग

आई आणि तुझं नातं आहे तरी काय ग ….. ४

 

दोघींमुळे घरादाराला येतो जेव्हा तृप्तीचा ढेकर

देही तेव्हा उसळत असेल भुकेचा डोंगर

एकमेकींच्या जाणिवांना कसे झाकुन ठेवता ग

आई आणि तुझं नातं आहे तरी काय ग ….. ५

 

तुझ्या दिव्य प्रकाशात तेजाळते माझी आई

तिच्या नयनांच्या निरांजनी तुच असे ठाई ठाई

एकमेकींच्यात असे कसे लवणापरी रहाता ग

आई आणि तुझं नातं आहे तरी काय ग ….. ६

 

पाण्याच्या शिपकाऱ्याने शांत होता तुझा दाह

आईचाही रात्री मग विसावतो थकलेला देह

दुराव्याच्या या क्षणी दोघींच्या मनी असता काय ग

आई आणि तुझं नातं आहे तरी काय ग ….. ७

 

© सौ. पल्लवी ऋषिकेश कुलकर्णी 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ राधेला नाही कळला… ☆ श्री तुकाराम दादा पाटील ☆

By Hemant BawankarNo Comments

श्री तुकाराम दादा पाटील

? कवितेचा उत्सव ?

☆ राधेला नाही कळला… ☆ श्री तुकाराम दादा पाटील ☆ 

राधेला नाही कळला

हा मुरलीधर ही नटवा

ती धरते त्याच्या वरती

मनमानी लटका रुसवा

 

सांजेला अवखळ कान्हा

येतोच तिला भेटाया

ती आहे वेडी त्याची

सखयानो तिजला सजवा

 

का राग धरावा कोणी

कोणावर कळले नाही

पण नकळत काही थोड्या

घडतात चुका हे पटवा

 

प्रेमाने प्रेमालाही

समजून जरासे सांगा

आनंद पुन्हा मिळवाया

गमतीने नुसते हसवा

 

घर आहे साधे पण ते

सजवाच कला कुसरीने

सांगावा धाडायाला

वा-याला वार्ता कळवा

 

ठरलेल्या भेटी साठी

आतूर मनाने थांबा

त्याच्या ही वाटे वरती

फुलबाग फुलांची फुलवा

 

जुळतात सुखाचे धागे

मग भाव खुणांचे सारे

स्पर्शाने येतो तेव्हा

अंगावर काटा हळवा

 

भेटीत तुम्हाला कळते

हा स्वर्ग सुखाचा असतो

मग सिंहासन हृदयाचे

सोन्याने पुरते मढवा

 

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ सुजित साहित्य #110 – आसरा…! ☆ श्री सुजित कदम ☆

By Hemant BawankarNo Comments

श्री सुजित कदम

? कवितेचा उत्सव ?

☆ सुजित साहित्य # 110 – आसरा…! ☆

इवलासा जिव 

फिरे गवोगाव

आस-याचा ठाव 

घेत असे..

 

पावसाच्या आधी 

बांधायला हवे

घरकुल नवे 

पिल्लांसाठी..

 

पावसात हवे

घर टिकायला

नको वहायला

घरदार..

 

विचाराने मनी

दाटले काहूर

आसवांचा पूर 

आटलेला..

 

पडक्या घराचा 

शोधला आडोसा

घेतला कानोसा

पावसाचा..

 

बांधले घरटे

निर्जन घरात

सुखाची सोबत

होत असे..

 

घरट्यात आता

रोज किलबिल

सारे आलबेल

चाललेले..

 

© सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – मराठी कविता ☆ कवितेच्या प्रदेशात # 132 ☆ काहूर… ☆ सुश्री प्रभा सोनवणे ☆

By Hemant BawankarNo Comments

सुश्री प्रभा सोनवणे

? कवितेच्या प्रदेशात # 132 ?

☆ काहूर… ☆

माझ्या मनीचे काहूर

कुणा सांगू सईबाई

असे एकाकी हा जीव

जशी अंगणात जाई

 

जशी अंगणात जाई

अंगोपांगी फुलारते

मनी सुगंधाची कळी

अपसूक उमलते

 

अपसूक उमलते

निळे कमळ पाण्यात

गतकाळाचे तरंग

कसे दाटती डोळ्यात

 

कसे दाटती डोळ्यात

जुन्या आठवांचे थवे

भाग्य तेच तेच लाभे

फक्त जन्म नव नवे

 

© प्रभा सोनवणे

१६ मे २०२२

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ भोंगे… ☆ श्री शामसुंदर महादेवराव धोपटे ☆

By Hemant BawankarNo Comments

श्री शामसुंदर महादेवराव धोपटे

 

? कवितेचा उत्सव ?

☆ भोंगे… ☆ श्री शामसुंदर महादेवराव धोपटे ☆

पाहून रंगबिरंगी भोंगे

मन अशांत झाले माझे

जशी मागणी तसे रंग

दुकानदार हे मज सांगे

 

हिरवा तो मशिदीचा

अजान त्यातून वाजे

केशरी तो मंदिराचा

चाळीसा हनुमान गाजे

 

मी विचारले हळूच मग

हिरव्यातून  चालीसा

अन् भगव्यातून अजान

वाजत नाही काहो दादा

 

म्हणे तो रंगात नसते काही

भोंग्या चे तत्व समजून घेई

प्रामाणिक तो असे ध्वनिला

बदलन्या रंग तो माणूस नाही

 

देऊ तुम्हास कोणता भोंगा

दुकानदार मज विचारे भाऊ

केसरी की हिरवा ते सांगा

की लाल निळा रंगवून देऊ

 

म्हणालो मी दे मज भोंगा

बिन रंगाचा जो कुठेही साजे

ज्यातून फक्त नी फक्त

जन गण मन हेच वाजे

© श्री शामसुंदर महादेवराव धोपटे

चंद्रपूर,  मो. 9822363911

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares